Madreva wa pikipiki waaswa kuacha mwendo kasi kwa usalama wao

Na Kambi Mbwana, Dar es Salaam

MKUU wa jeshi la Polisi wilayani Handeni, OCD Zuber Chembera, amewataka watu kuacha kuendesha pikipiki kwa mwendo wa kasi, maana ni hatari kwa maisha yao.

OCD Zuber Chembera, aliyesimama.

Akizungumza juzi wilayani Handeni, Chembera alisema kuwa kati ya wengi wanaopata matatizo barabarani hasa waendeshaji wa pikipiki, ajali zao zimesababishwa na mwendo wa kasi.

Alisema pikipiki inapopata ajali ikiwa kwenye mwendo wa kawaida, haiwezi kuleta madhara makubwa vikiwamo vifo vinavyoendelea kutikisa katika maeneo mbalimbali ya Tanzania.

“Ni bora tuambiane kuwa mwendo wa kasi hauna maana, ukizingatia kuwa pikipiki zinaleta madhara kwa watu wengi mno, hivyo tuache kukimbia bila mpango.

“Ajali nyingi za pikipiki barabarani chanzo chake ni mwendo wa kasi, maana dreva wanaona ndio njia nzuri ya kuwafikisha wanapokwenda, jambo ambalo si sahihi,” alisema.

Wilaya ya Handeni ni miongoni mwa zile zinazokumbwa na ajali za pikipiki, wakati juzi katika kijiji cha Komsala, wilayani Handeni mkoani Tanga, vijana wawili wamekufa baada ya kugongana na baiskeli, huku mmoja akisalimika.