Skylight wafanya makubwa sherehe za Bilicanas

Na Kambi Mbwana, Dar es Salaam

BENDI ya muziki wa dansi hapa nchini ya Skylight, usiku wa kuamkia leo, ilifanya shoo ya aina yake katika maadhimisho ya miaka 20 ya Club Bilicanas, iliyofanyika katika ukumbi huo wenye hadhi ya Kimataifa.

Skylight iliweza kutoa burudani kabambe kwa mashabiki na wadau wa burudani walioingia kwa wingi katika ukumbi huo unaopendwa na wengi hapa nchini kutokana na mazingira yake.

 Sehemu ya wanamuziki wa bendi ya Skylight wakiwa kazini

Akizungumzia maadhimisho hayo, mkurugenzi wa Club Bilicanas, Frank Charles, alisema sherehe hizo ni kufurahia uwepo wao kwenye burudani kwa miaka 20 tangu kuanzishwa kwake, huku wasanii mbalimbali wa muziki wa kizazi kipya, maarufu kama Bongo Fleva, wakipangwa kuonyesha uwezo wao jukwaani.

Mbali na Club Bilicanas kusherehekea miaka 20 ya burudani nchini, pia Kampuni ya Clouds Media Group, nayo ilisherehekea miaka 13 ya kazi yao, katika ukumbi huo, ikiwa ni baada ya kufanya maandalizi kwa kushirikiana.

Hata hivyo, burudani hizo nusura ziharibike baada ya mvua kuanza kuzengea katika maeneo hayo, hivyo wadau waliokuwapo ndani ya uzio ambao shughuli ilikuwa ikifanyika, walikimbilia ndani.

 

Viingilio katika sherehe hizo zimepangwa kuwa Shilingi 10,000 na kwa wale waliolipa sh 15,000 walipata fursa ya kujumuika katika burudani nje na ndani ya ukumbi na pia kulipoandaliwa kwa ajili ya burudani hizo.

 

Wasanii waliopangwa kufanya burudani kwa pamoja walikuwa ni Skylight bendi, Ommy Dimpoz, Linah, Recho, Amini, Richie Mavoko, Barnaba, Makomandoo na Bob Junior, maarufu kama Rais wa Masharobaro.

Club Bilicanas ilianza rasmi kutoa burudani mwaka 1992 na ndani ya muda wote huo imejikusanyia sifa na wateja lukuki wa ndani na nje ya nchi kutokana na programu mbalimbali zinazondeshwa ndani ya Club hiyo.