Unafiki wa wadau wa michezo ni hatari kwa Taifa

Kambi Mbwana, akishiriki katika matukio muhimu ya Vodacom Tanzania, ambao ndio wadau wakubwa wanaodhamini ligi ya Tanzania Bara. Kushoto ni Rukia Mtibwa na Matina Nkurlu, mtaalamu wa habari wa Vodacom Tanzania.

Picha juu nis: Mkuu wa kitengo cha Udhamini wa Vodacom Tanzania Tanzania, George Rwehumbiza.

                                    Pichani; Meneja Mawasiliano wa Vodacom Tanzania, Salum Mwalim.

Picha ya Yanga na Simba wakiwa uwanjani.

Waandishi wa habari wakiwa kazini, hawa ni wadau wakubwa wanaostahili kuthaminiwa na kupigania maendeleo ya michezo Tanzania.

                                          Mwenyekiti wa klabu ya Simba, Ismail Aden Rage

Mwenyekiti wa klabu ya Yanga, Lloyd Nchunga

.

Mohamed Mharizo akiwa na Zaituni Kibwana. Hawa ni wadau wakubwa wa michezo wakiandikia magazeti ya New Habari (2006) Ltd, Mtanzania, Dimba, Rai, Bingwa na The African. Kwa  ushirikiano wa wote wanaweza kuendeleza michezo Tanzania. Mungu ibariki Tanzania.

UNAFIKI WA WADAU WA MICHEZO NI HATARI KWA TAIFA

HUWA najiuliza uwapi umuhimu wa mtu kujiita mdau wa michezo, hali ya kuwa ni timu moja tu, kama sio Simba basi Yanga, ndio anayoipenda na kuiheshimu kuliko nyingine yoyote nchini?

 

Yupo wazi akose ibada au kufanya kazi yake kwa sababu ya kukimbilia mechi hiyo ya Simba na Yanga, timu kongwe zisizostahili kuigwa hata kidogo kwa matatizo yao lukuki, wanayofanya miaka nenda rudi.

 

Hali ni mbaya zaidi ya ubaya. Ila ndio hao hao wanajiita wadau wa michezo, wakati hawana nia ya kuhudhulia mchezo wa aina nyingine yoyote ukiacha huo mpira wa miguu, tena wa Simba na Yanga.

 

Nakuwa mnyonge na kushukuru Mungu. Nasema hivyo maana nchi hii inaharibiwa na mfumo huo mbovu. Mashabiki hao ndio wenye nguvu na ushawishi mkubwa majumbani mwao na wote kuelemea kwa timu vigogo.

 

Na ndio wenye nguvu pia maofisini mwao. Kwa bahati mbaya au nzuri, neon la udau wa michezo linafikiriwa vingine. Angalia, licha ya Simba na Yanga kujimudu kimaisha na kiuchumi, bado Kampuni ya Bia Tanzania TBL kupitia bia yao ya Kilimanjaro, wanaidhamini klabu hizo.

 

Tena ni udhamini mkubwa mno. Kwa miaka mitano hii, Simba na Yanga zitafaidi fedha nyingi mno, bila kusahau mengineyo yenye tija na mguso kwa wakongwe hao, kama vile magari, vifaa vya michezo, fedha za kuendesha mikutano yao ya mwaka na nyinginezo.

 

Hayo ndio matatizo ya wadau wetu wa michezo. Kwani licha ya klabu hizo kujimudu, ila wanaongezewa ulaji. Wakati huo wenzao wanaambulia fedha ndogo zinazotolewa na wadhamini wakuu wa ligi hiyo.

 

Vodacom ambao ndio wadhamini wa ligi hiyo, wanatoa fedha za safari kwa timu zote 14 kuanzia Yanga ambao ndio mabingwa watetezi na timu ya Oljoro FC, waliopanda daraja msimu huu.

 

Ni mfumo mbaya mno. Kwani aliyekuwa nao anazidi kuongezewa na wengine wakibaki kama walivyo. Hayo ndio matatizo makubwa. Kwa mtindo huo huwezi kuifananisha Villa Squad na Yanga au Simba.

 

Kwa mfumo huu wa Shirikisho la Soka nchini (TFF) Villa Squad haiwezi kuwika wala kubaki msimu ujao. Hapo kwenyewe haina kitu, vipi ipangiwe mechi mbili kwa siku tatu? Itoke Mwanza iende Bukoba itaweza?

 

Kikweli haiwezi. Lakini Simba wao wanaweza kufanya hilo vizuri, maana akiba kubwa wanayo. Kwanza wanazo kupitia wadhamini wakuu Vodacom na ukiongeza hao TBL kupitia bia yao ya Kilimanjaro.

 

Sina nia ya kulaumu, maana hayo ndio matatizo yetu. Na hao hao baadaye hukaa kwenye vikao vyao na kujiita wadau wa michezo. Nani kasema? Wadau wa aina hiyo ni sumu kwa maendeleo ya michezo.

 

Hivi karibuni nilipata nafasi ya kuangalia mazoezi ya timu ya Taifa ya ngumi, yaliyokuwa yakifanyika katika Uwanja wa Ndani wa Taifa, jijini Dar es Salaam .

 

Nilishangaa kama sio kushikwa na uchungu. Wachezaji hao wanaojiandaa na mashindano ya ‘All African Game’, yanayotarajiwa kufanyika nchini Msumbiji, baadaye mwaka huu, hawana vifaa vya michezo.

 

Walikuwa wakilalamika hali hiyo ila hawakusikilizwa. Waliachwa kama watoto yatima. Inatia uchungu. Sasa hao wanaojiita wadau wa michezo wako wapi? Kwanini tusiwaite wadau wa mpira wa miguu?

 

Kwanini? Kuna ubaya gani sasa kuitwa wadau wa Simba na Yanga? Jamani, hakuna haja ya kufichana tunapotaka kuzungumzia mambo ya maana katika Taifa hili linalokwenda kwa kusua sua.

 

Tuweke maslahi ya Taifa kwanza kabla ya siasa zenu. Mnatumia vibaya vyombo vya habari na kuwapasha habari za uongo wananchi wenu. Ndio, kwani watu hao wanaojiita wadau huita wanahabari ili wapewe sapoti hiyo.

 

Nadhani hayo ni mambo yanayotakiwa yaangaliwe upya kwa maslahi ya michezo yetu hapa nchini. Najua timu kubwa ni suala lisiloweza kuzuilika, ikiwamo hiyo Simba na Yanga.

 

Hata Ulaya mambo hayo yapo. Zipo timu kubwa zinazogusa hisia za wengi, ikiwamo Manchester United, Chelsea , Liverpool , Arsenal na nyinginezo, ila pia wadau wao ni tofauti na wetu.

 

Kuna ubaya gani wadau hao kuzipa ‘sapoti’ na timu changa mfano wa Coastal Union , Moro United, Villa Squad, Oljoro na nyinginezo?

 

Si tunataka maendeleo sisi kwa mpira wa miguu? Si mnajiita wadau wa michezo nyinyi, kuna haja gani ya kuelemea Simba na Yanga? Haya ni maswali tunayotakiwa tujiulize sisi sote kwa maendeleo ya Taifa.

 

Kwa mtindo huo michezo haiwezi kupiga hatua kamwe. Tutaendelea kulalama tu kwakuwa hatuna mfumo mzuri. Tuambiane tu. Nadhani hata wadhamini Vodacom nao wanatakiwa walijuwe hili.

 

Licha ya kuiweka ligi hiyo kwenye presha kubwa ila bado mambo ni magumu. Kasoro nyingi, ikiwamo kuchelewa kwa fedha za kujikimu na kugharamia safari zao, ni sababu moja wapo ya kuharibu mfumo wao wa ligi yenye ushindani.

 

Hapo ndipo pabaya, kwani hilo sio tatizo kwa Simba na Yanga. Kwanza wana akiba kubwa ya wanachama na mashabiki wenye nazo huku pia wakiwa na udhamini mnono, wakiwamo TBL.

 

Nadhani tuliangalie hilo kwa mapana zaidi. Tujifunze kuweka mikakati yenye tija na mguso kwa maendeleo ya michezo hapa nchini. Najua inakuwa ngumu kusema ukweli ila hakuna haja ya kuogopana.

 

Huo ndio ukweli. Kinachotakiwa ni kuona ligi inakuwa na nguvu na ushindani, kitu kitakachowafanya wachezaji wapate nafasi kubwa zaidi, hasa kucheza soka la kulipwa duniani, ikiwamo Barani Ulaya.

 

Ni ligi yenye nguvu na ushindani ndiyo inayoweza kuiweka timu ya Taifa, Taifa Stars katika hali nzuri. Wachezaji wataonekana kimataifa. Huo ni mpango na mkakati wenye tija kwa wote.

 

Kwanini tupore haki za watu? Kwanini tujiite wadau wakati sisi ni mashabiki wa Simba na Yanga pekee? Kama wewe upo kwenye kitengo kikubwa, angalia jinsi gani unaweza kuinua mchezo wa masumbwi.

 

Kama wewe ni Meneja wa Kampuni, jua ipo michezo mingi na klabu nyingi zinazoweza kufanikiwa kwa kupitia wewe. Hatutaki sifa za kijinga kwa kusaini hundi kwa Simba na Yanga. Wao sio kila kitu katika nchi hii.

 

Zipo timu nyingi zinazohitaji msaada huo. Katika ligi iliyomalizika huku Yanga akiwa bingwa, zipo timu zilizoshuka daraja kwasababu ya ukata. Miongoni mwa timu hizo ni Majimaji ya mjini Songea na Ashanti United.

 

Walikuwa na wachezaji wazuri, ila tatizo ni ukata. Kama kula yao ni tabu hawawezi kuifunga Simba na Yanga wanaoweka kambi sehemu nzuri na kula vizuri.

 

Huu ni wakati wa kuangalia upya nyendo zetu kwa faida ya michezo. Tuwe na fikra pevu. Kila mtu awe makini. Bila hivyo tutaendelea kuwa wadau wa Simba na Yanga, licha ya kushindwa kufanya vizuri nyanja za kimataifa.

 

Kila siku ni Simba na Yanga tu hali ya kuwa zipo timu nyingi na zenye uwezo wa kufanya mapinduzi katika mpira wa miguu nchini. Ukiacha Azam FC, Mtibwa Sugar, Kagera Sugar na nyingine za jeshi, klabu nyingine wana njaa kubwa.

 

Hazina uwezo kifedha wala wadhamini. Wao wenyewe ndio kila kitu. Viongozi wachache wasiokuwa na chochote wanapeana mchango kwa ajili ya timu yao .

 

Watu kama hao hawawezi kuzibania Simba na Yanga wenye kila kitu cha kujivunia. Huo ndio ukweli wa mambo wadau. Tuwe makini katika hilo kwa maendeleo ya michezo kwa ujumla.

 

Yapo makampuni mengi mno. Zipo taasisi kubwa na wafanyabiashara wenye nguvu, hivyo huu ni wakati wao wa kuingia zaidi michezoni. Nasema michezoni, maana ni mjumuiko wa michezo mingi, bila kuangalia mpira wa miguu pekee.

 

Hilo ndio jambo la busara kufanywa na hao wanaojiita wadau wa michezo kwa faida ya kizazi cha Tanzania , maana hakuna ubishi kuwa michezo ni ajira na inaweza kuingiza sifa kwa Taifa letu.

 

Naomba kutoa hoja.

 

kambimbwana@yahoo.com

0712 053949

0753 806087

Waandishi wa habari za michezo wamegeuzwa kandambili

Waandishi wa habari juu na Ofisa Habari wa TFF Boniface Wambura picha ya chini.



NIMEKUWA karibu kufuatilia sakata la waandishi wa habari za michezo, Chama cha Waandishi wa Habari za Michezo TASWA na Shirikisho la Soka nchini (TFF), ambao wote kwa pamoja wanatakiwa wafanye kazi zao kwa ushirikiano mkubwa.

Mengi nayaona na kuyaacha yapite. Mengine yananichekesha mara baada ya kusumbua akili yangu kwa dakika kadhaa kuyachambua kadri ninavyoona inafaa. Hata hivyo, katika hili la waandishi wa habari za michezo kugeuzwa kandambili, siwezi kuvumilia.

Nasema hivyo kwasababu mchango wa waandishi wa habari unajulikana na wanatakiwa waheshimiwe kwa namna moja ama nyingine. Takribani mwaka mmoja sasa, watu hawa wameendelea kunyanyasika.

Mara kadha wanajituma kupita kiasi kuwahabarisha wadau wa michezo, hata hivyo mwisho wa siku wanachoambulia ni matusi ya reja reja. Utawakuta wakishinda kutwa nzima katika ofisi za Shirikisho la Soka nchini (TFF), wakisubiri vitambulisho vya kuingia uwanjani.

Hiyo huja katika mechi za Kimataifa, ambazo kabla ya mechi hizo, vyombo vya habari na waandishi wao hufanya juhudi kubwa kutoa habari kwa wadau na mashabiki na kuingia kwa wingi uwanjani, kitu kinachowafanya waingize fedha nyingi.

Hapa lazima tufanye jambo. Maana hali hii ikiendelea, waandishi wa habari za michezo wataendelea kuwa kandambili, kuogewa na baadaye kuachwa nje.

Mbaya zaidi, juhudi zinazofanywa haziwezi kuokoa thamani yao. Mchango wao ni mkubwa mno. Hawa hawastahili kunyanyasika. Waandishi hawa wanaosifiwa kila siku kwa kazi zao, waliwahi kuachwa katika kivuko kwa sababu nilizoshindwa kuzielewa.

Mengi yalizungumzwa. TFF yenyewe ilisema waandishi wa habari baadhi yao, walitoa maneno ya kashfa zilizowachukiza wahusika. Sawa, huwenda ni kweli. Ila, nani alistahili kulipa gharama za kivuko, ni waandishi wenyewe au TFF waliowaita?

Kwanini utaratibu wa kuingilia uwanjani ubadilishwe? Je, zile zilizokuwa zikitumika kabla yao, wakati Fredrick Mwakalebela ndio Katibu Mkuu, ni mbaya? Kwa mujibu wa takwimu zilizofika TFF na TASWA, waandishi jumla ya 170 waliombewa vitambulisho vya kuingilia uwanjani.

Kwanini mpaka sasa havijatoka? Ukiangalia kwa jinsi vyombo vya habari vilivyokuwa vingi ni idadi ndogo mno. Nasema hivyo kwasababu wanachoandika ni thamani na matangazo ya bure kwa TFF.

Kama wangepaswa walipe kama matangazo kwa kila kinachoandikwa na magazeti, redio au televisheni, ni dhahiri fedha hizo hawana uwezo wa kulipa? Kama waandishi wamechangia kuingia mamilioni ya shilingi, kuna ubaya gani waandishi 170 kuingia bure uwanjani, tena sio wote wanaoweza kuhudhulia mechi.

Ngoja niseme ukweli maana najua ndio unaoweza kuokoa ushirikiano unaoelekea mwishoni kwa waandishi wa habari na TFF, japo kuwa najua naweza kujiweka tabuni kwa wale wasiopenda kuambiwa ukweli. Uwanjani kila mtu huwenda kwa kazi yake. Wengine huwenda uwanjani kwa ajili ya kuandika makala na mengineyo.

Wengine huingia kwa ajili ya kuripoti mechi. Hugawana majukumu. Hakika hali ni mbaya mno. TFF wanasema wahariri wasiingie bure uwanjani.

Na kama wakitaka kuingia, vyombo vyao vya habari viwalipie. Jamani, mhariri ni nani na mwandishi ni nani? Ndio  maana nasema suala hili lazima lichukuliwe kipaumbele maana hali inazidi kuwa mbaya? Leo, mambo yanavyozidi kuwa magumu, ushirikiano ni jambo la lazima,

Tamaa ya pesa nyingi zinazotokana na waandishi wa habari zisipoteze thamani yao na kusababisha kususa. Unaweza kushangaa, ila kikweli siwezi kuvumilia. Nawaonea huruma TFF kupitia kwa Rais wao Leodgar Tenga na Katibu Mkuu wake Angetile Osiah.

Muda wao mwingi wanautumia kurushiana maneno na waandishi wa habari 170 waliombewa vitambulisho na kukosa ujuzi na maarifa ya kuendeleza michezo. Timu ya Taifa, Taifa Stars ilishindwa kwenda Sudan huku wao wapo ofisini.

Yanga, Simba wamekuwa watawala wa soka nchini. Wasemalo wao ndio linalofanywa. Wamekaa tu. Wakija kuzungumza ni aina ya kadi chache za waandishi wakitaka wasiingie uwanjani, maana nafasi zitajaa.

Kwanini? Nani amewatuma? Huu ni wizi mtupu na ubabaishaji mkubwa? Osiah ni mwandishi anajua mchango wa ndugu zake hao wasiokuwa na thamani kwa TFF ya leo. Ujinga huu utakwisha lini? Inakuwaje mvutano huo umalize mwaka?

Kwa kila mechi, vyombo vya habari viwalipie waandishi wao 170 kwa tiketi ya elfu 10,000 kila moja ni sawa na shilingi 1,700,000. Vipo vyombo vingi vya habari, lakini magazeti 13 kwa siku yalipiwe Shilingi 1,000,000 ni ndogo ya pesa zilizolipiwa kwa waandishi.

TFF wameangalia suala hili? Mnajua thamani ya matangazo? Kwanini Watanzania mnapenda kupayuka yuka ovyo? Iwapi thamani ya elimu zenu? Mmesomea wapi hadi mkose walau robo ya kuangalia faida na hasara?

Sina nia ya kuwarushia makombora wadau hao na viongozi wa TFF, kwakuwa lengo langu ni zuri. Napenda tujenge nyumba yenye maendeleo.

Tanzania inazidi kufanya vibaya kwenye medani ya Kimataifa. Huu ni muda wa kukaa pamoja kuangalia tatizo lipo wapi na sio kukimbizana na waandishi au kuwagandisha kusuburia kadi zinazobadilishwa kila siku ya Mungu.

Leo hii ligi inaendelea, lakini hutashangaa kuambiwa mwandishi yupo TFF anasubiria kadi na tiketi ya kuingilia uwanjani. Huu ni ujinga. Hii ni aibu yenu na ninasema japo kuwa najua ni vibaya kumsema mtu mkubwa.

Kwanini? Nadhani hapa ipo haja ya waandishi wa habari kuikataa dhambi hii ya kufanywa kandambili, kuwatangazia mechi zao na mwisho wa siku husahau na kukimbilia fedha zinazopatikana kwa mchango wa waandishi.

Ona wakati mwingine uwanja haujai kabisa. Utawaona wamekaa na wadhamini wao, wamewapa viti maalum, lakini wanahabari wamechanganyika na mashabiki. Huyu anarusha chupa, yule amesimama akitoa matusi?

Hawajatengewa sehemu yao ya kukaa na kufanya kazi zao kwa ufanisi. Nadhani hili liangaliwe kwa mapana zaidi.

Chonde chonde TASWA, BMT, TFF na Serikali kupitia Wizara ya Habari, Vijana, Utamaduni na Michezo chini ya Waziri wake, Emmanuel Nchimbi, kuirudisha thamani ya waandishi wa habari za michezo.

Inakera ndio maana siwezi kuvumilia

kambimbwana@yahoo.com

0712 053949

0753 806087