Amri ya serikali yavunjwa Handeni

Mfugaji akipitisha ng'ombe zake katika barabara mpya, licha ya kupigwa marufuku na Mkuu wa Wilaya ya Handeni, Muhingo Rweyemamu.

Na Kambi Mbwana, Handeni

LICHA ya Serikali kwa kupitia Mkuu wa Wilaya ya Handeni, Muhingo Rweyemamu, kupiga marufuku wafugaji kupitisha ng’ombe zao katika barabara inayoendelea na ujenzi wake, kuanzia wilayani Korogwe hadi Handeni, amri hiyo inavunjwa kutokana na mifugo kupitishwa, hivyo kuiharibu kabla haijakamilika.

Uchunguzi uliofanywa na Handeni Kwetu na kuweka ushahidi wa ng’ombe kunaswa na kamera yetu, ulibaini jinsi amri hiyo inavyovunjwa na wafugaji pamoja na wenyeviti wa vijiji vinavyopita katika maeneo yao kushindwa kuwadhibiti.

Wakizungumza kwa masharti ya kutotajwa majina yao, wakazi wa kijiji cha Komsala, walisema kuwa uongozi wa kijiji chao hauna nguvu ya kuwazuia wafugaji hao wanaopita mara kwa mara kwenye barabara mpya.

Hao ndio njia yao, maana hawa wafugaji wanapenda kupitisha katika barabara mpya na hakuna wa kuweza kuwazuia, wakiwapo viongozi wa kijiji chetu na wote.

Hii barabara itaharibika kabala haijakabidhiwa au kuchelewesha kukamilika kwake, maana wenzetu ni wazito kuelewa na wengineo wanalingia fimbo zao,” waliiambia Handeni Kwetu mapema leo, baada ya makundi ya ng’ombe kuonekana zikipita barabara mpya na kuacha ya zamani.