Kero ya leo: Mitandao ya simu isiunganishie watu nyimbo kwenye simu bila kupenda

MIMI ni mfuatiliaji mzuri wa matukio kupitia mitandao mbalimbali ya kijamii ndani na nje yaa nchi, huku pia nikiwa shabiki mkubwa wa muziki hapa nchini.

Msanii Diamond, akiwa kwenye poziiii

Pamoja na kuwa na uhodari huo, lakini nachukizwa sana na mwenendo wa mitandao ya simu za mikononi kuunganisha watu nyimbo bila kupenda.

Hii ni kwasababu kuna watu ambao wamekuwa wakiunganishwa kwenye huduma hiyo ya muito wa simu katika mitandao bila kuomba, hivyo kumsumbua au kumtia gharama isiyokuwa na sababu.

Mimi ni miongoni mwa watu wanaokumbana na tatizo hilo. Mtandao wangu ambao siutaji kwa jina umekuwa ukinikata pesa eti wakisema wamechukua gharama ya wimbo wangu unaosikika katika simu yangu.

Kwa bahati mbaya, wimbo unaosemwa mimi sijaomba. Hata pale ninapopiga simu katika mtandao wangu kuwataka waondoe huduma yao, wanaendelea kunifanyia udanganyifu.

Hakika siwezi kukubaliana hata kidogo, hivyo lazima hawa wadau wenye makampuni hayo wafuate utaratibu maana kwa sasa hali hii haiwezi kukubaliwa hata mara moja.

Kuna wakati mtu unaumia kuona unatozwa fedha ambazo usingependa kukatwa kwa sababu ya huduma ambayo si kila mtu anaipenda, jambo linaloleta mkanganyiko.

Huu ni wakati ambao hawa wenye makampuni ya simu waone imetosha, hasa kwa kuhakikisha kuwa baadhi ya huduma zao, zikiwamo za mwito wa akupigae zinatolewa kwa wanaopenda tu.

Mariam Jumaa

Kinondoni, Dar es Salaam

Na wewe pia unaweza kututumia kero yako na sisi tutaipachika ili isomwe na watu wengi zaidi. Tuma kwa email kambimbwana@yahoo.com au +255 712053949.