Simba waipigia chapuo Azam tv na kuwasimanga wapinzani wao Yanga

Na Kambi Mbwana, Dar es Salaam

UONGOZI wa klabu ya Simba, umesema kuwa mpango wa udhamini wa kuonyesha mechi kwenye Azam TV utakuwa na maanufaa makubwa katika soka la Tanzania, hasa kwa timu zisizokuwa na uwezo kujikimu kiuchumi.

Hayo yamesemwa na Msemaji wa Simba, Ezekiel Kamwaga, ikiwa ni siku chache baada ya klabu ya Yanga kutangaza kutoutambua udhamini wa Azam katika kuonyesha mechi zao.

Akizungumza jana jijini Dar es Salaam, Kamwaga alisema kuna timu zinazohitaji udhamini, hivyo kuanza kuangalia namna ya kuufanya mpango wa Azam TV ufe, ni kuathiri mfumo wa soka letu.

Alisema wao Simba wamekubali kuingia kwenye udhamini huo kwasababu una malengo ya kukuza soka letu, hasa kwa kuangalia fedha zinazopatikana zinaingia kwenye mifuko ya timu husika.

“Kuna timu zinashiriki ligi kwa ugumu kutokana na kukosa bajeti za kuwafanya waendelee kusafiri na kuweka maandalizi ya mechi zao, hivyo naamini mpango huu utakuwa na tija kwao.

“Huu ni mpango mzuri kwa timu zote zinazoshiriki ligi hiyo, hivyo naamini tunaelekea katika hatua sahihi hasa kwa timu zilizokuwa zinakabiriwa na matatizo ya kifedha,” alisema.

Hata hivyo, mpango huo unaendelea kupingwa na timu ya Yanga mechi zao kuonyeshwa kwenye  Azam tv, huku Shirikisho la soka nchini (TFF), likiwataka Yanga waendelee na msimamo huo kwa mechi zao za nyumbani tu.