Uwanja wa kisasa wa Yanga ni zaidi ya burudani ya soka Tanzania

Na Kambi Mbwana, Dar es Salaam

KAMPUNI ya Beijing Construction Engineering Group, jana imeonyesha rasmi picha za Uwanja Mpya wa Yanga utakavyokuwa mara baada ya kuingia mkataba wa ujenzi wake mwishoni mwa mwezi ujao kwa ajili ya kufanikisha ujenzi huo.

Uwanja mpya wa Yanga utakavyoonekana baada ya kukamilika.

Uwanja huo utakaokuwa na hadhi ya aina yake, utajengwa kwa thamani waya zaidi ya Dola Milioni 50, huku ukichukua eneo la hekta 11.5 katika eneo lote la Yanga, Jangwani City.

Akizungumza jana jijini Dar es Salaam katika kikao cha viongozi wa Yanga, kilichoongozwa na Mjumbe wa Bodi ya Udhamini ya Yanga, Francis Kifukwe, Meneja Msaidizi wa kampuni hiyo iliyojenga pia Uwanja wa Taifa, Zhang David Chengwei, alisema kuwa kukamilika kwa ujenzi huo itategemea na makubaliano kutoka kwa Yanga.

Alisema endapo watafikia makubaliano vizuri, uwanja huo unaweza kukamilika mapema kuliko ulivyokuwa Uwanja wa Taifa, uliokamilika kwa miaka mitatu kutokana na utaratibu wa fedha na makubaliano kutoka kwa Serikali ya Jamhuri ya Muungano wa Tanzania.

“Utakuwa ni uwanja wenye hadhi na uwezo mzuri kiasi ambacho kitaiweka Yanga katika kiwango kizuri mno, ingawa hayo pia yatategemea makubaliano yetu na klabu kwa ujumla.

Katika ujenzi huu kwanza tulipewa kazi ya kuandaa ramani nzuri kwa ajili ya Uwanja huo wa kisasa wa Yanga, hivyo tunawaachia wahusika kwa ajili ya kuona kile kitakachofuata baada ya kuwaonyesha jinsi kazi hiyo itakavyoanza,” alisema Chengwei.

Aidha, Kifukwe alisema kuwa, waliwaagiza wataalamu hao tangu mwishoni mwa mwaka jana, jambo ambalo wamelifanikisha kwa kuwaita na kuzungumza nao kwa kirefu huku wakionyesha kwa vitendo mwanzo na mwisho wa ujenzi huo wa Uwanja.

“Baada ya kuonyeshwa jinsi uwanja huu utakavyokuwa utakapokamilika, tutakaa kwa pamoja kujadili gharama rasmi na kuwajulisha pia wana Yanga hatua hii, maana hii ni klabu ya wanachama na wanapaswa kufahamishwa hatua kwa hatua.

“Tutapitia wote gharama za Dola Milioni 50 kwa chagua la kwanza, Dola Milioni 40 na 30, huku tukitarajia kukutana na serikali kuangalia namna gani ramani ya Hekta 11 itatimia,” alisema Kifukwe.

Kwa mujibu wa Kampuni hiyo iliyopewa kazi ya kujenga uwanja huo wa kisasa wa Yanga, kukamilika kwake kutabadilisha kabisa eneo hilo na kuvutia zaidi kutokana na ramani na jinsi walivyoupanga uwanja huo utakaokuwa wa kuvutia.