Anna Kibira aujia juu mpira wa miguu

Na Mwandishi Wetu, Dar es Salaam

Mwenyekiti wa Chama Cha Netiboli Tanzania (CHANETA), Anna Kibira, amelaumu wadau wa michezo kuelemea sana kwenye mpira wa miguu Tanzania.

Akizungumzia hilo, Kibira alisema kwamba katika tasnia ya michezo yote, wadau wamekuwa wakiangalia zaidi mchezo wa kandanda, jambo ambalo ni baya kwa maendeleo ya michezo mingine.

Alisema jambo hilo linasababisha kwa kiasi kikubwa kuharibu michezo, hivyo serikali pamoja na wadau wote lazima waliangalie jambo hilo kwa kina.

“Hii ni mbaya sana maana wenzetu wakitaka kufanya jambo lao, linafanikiwa kwa haraka kwasababu wanapata msaada wowote wautakao.

“Sisi wa netiboli tunaona mpira wa miguu umezidi kutubana na kutuweka katika mazingira magumu kupita kiasi, ingawa wote tunachangia kwa kiasi kikubwa kukuza maendeleo ya michezo na kuitangaza Tanzania,” alisema Kibira.

Kwa mujibu wa Kibira, kuna kila sababu ya wadau wote kuona huu ni wakati wa kuungana kwa pamoja kuendeleza michezo yote, kama wanavyofanya katika sekta ya mpira wa miguu.