BABA WA TAIFA

Nyerere asingekufa kwa maradhi, angeuliwa na CCM

Na Kambi Mbwana, Dar es Salaam

LEO ni Oktoba 14. Tanzania nzima inaingia katika kumbukumbu ya kifo cha mwasisi wa Taifa hili, Baba wa Taifa, Mwalimu Julius Kambarage Nyerere, aliyekufa Oktoba 14, mwaka 1999 nchini Uingereza alipokwenda kwa matibabu.

Kwa mujibu wa madaktari wake, Nyerere mtu muhimu kabisa katika Taifa hili, alikufa kwa maradhi ya kansa ya damu (leukemia), akiwa katika harakati nyingi za kuokolewa maisha yake, katika Hospitali ya St Thomas, London, Uingereza.

                                         Mwalimu Julius Nyerere

Kifo chake kilitetemesha wengi, wakiwamo wanachama wa Chama cha Mapinduzi (CCM) na wale wasiokuwa na vyama vya siasa. Katika kuiangalia kumbukumbu yake, naweza kusema kifo chake kitaendelea kuwa pigo hasa kwa CCM.

Chama ambacho licha ya kukipenda na kukiheshimu kupita kiasi, kimegeuzwa na wachache wao, walioamua kuja kufanya biashara kwa mgongo wa kisiasa.

Nathubutu kusema kwamba, uhakika wa kuendelea kuishi kwa baba wa Taifa, ungekuwa mdogo mno kwa mwenendo wa CCM kuanzia miaka ya 2000 hadi muda huu.

Kama asingeshikwa na maradhi hayo, basi ni dhahiri msiba huo ungekuwamba, huku sababu kubwa ikiwa siasa chafu, rushwa ya uchaguzi, hasa ndani ya CCM, sambamba na siasa za makundi na kushughulikiana wao kwa wao.

Nyerere, asingeweza kudumu, maana watu anaowaamini wanageuka na kuvaa joho la ukatili, wakiwa ndani ya chama kilichounganisha watu wengi. Chama ambacho kwa namna moja ama nyingine, kimeundwa kwa jasho la walalahoi.

Watu ambao kwa miaka 35 sasa, maisha yao, uhuru wao ni mdogo mbele ya matajiri wachache wanaoingia kulangua kwenye siasa. Kwanini nasema hivyo. Nyerere kwa mtazamo wake, alisema bila CCM nchi hii itayumba.

Aliyasema haya kwa imani kubwa aliyokuwa nayo kwa Watanzania na  mbele ya chama chake hicho cha CCM, ambacho kwa sasa kipo chini ya Mwenyekiti wake, Jakaya Mrisho Kikwete.

Hali ya mambo inavyoendelea, uwezekano wa CCM kutawala milele ni mdogo mno. Kumekuwa na mabadiliko makubwa ya upepo wa kisiasa. Chuki za wazi wazi ndani ya uongozi wa chama hicho kikongwe zimetamalaki.

Uhai wake ungekuwa mdogo mno. Watu wanageuka na kufanya siasa zisizokuwa na tija kwa CCM na bado wanachekewa. Wenye maono yao wanatembea na kusema vibaya juu ya kauli za Nyerere, wakisema hazitakiwi kufuatwa.

Kinachofuata sasa ni kuona kejeli za wazi wazi kwa baba wa Taifa, maana waliobakia kwenye mfumo wa chama, hawana mawazo mazuri ya kukitetea chama mbele ya umati wa watu wanaona kwamba chama kimezeeka na kinatakiwa kufa.

Wale ambao wanatembea kwa matao wakisema kifo rasmi cha CCM ni mwaka 2015. Wanasema kaburi lake limeshaandaliwa. Hizi ni kejeli ambazo nachelea kusema kuwa zingemfurahisha Nyerere, hata kama leo angekuwa hai.

Hizo tu na nyingine nyingi zingempa presha na jaka moyo, hivyo uhai wake kuwa mdogo mno. Kama huo sio ukweli, basi upo mbali na uongo. Nikiwa kama Mtanzania, naheshimu kwa dhati mchango wa Baba wa Taifa.

Amefanya mengi mazuri, ikiwamo kuruhusu kwa kauli moja mfumo wa vyama vingi vya siasa, kama ishara nzuri ya kukua kwa Demokrasia ndani ya nchi hii ambayo kwa sasa inaendelea kutafunwa na mchwa aliowasema.

Mchwa hao wamekuwa wakijenga mtandao wao kwa njia za hatari mno. Wengine wanafika mbali kwa kuingia ubia na wafanyabiashara wakubwa kwa ajili ya kuitafuna nchi hii.

Watanzania masikini hawana haki tena. Kila kinachofanyika ni usanii mtupu. Bado tu hiyo suio dalili za kuangamiza roho za wapendwa wetu? Je, Nyerere angechekea haya yanayofanyika sasa, ikiwamo fedha kutumika nyingi hata kwenye chaguzi za ndani?

Wanataka nini? Mgombea kumwaga noti katika Uchaguzi wa Umoja wa Vijana CCM, (UVCCM) anatafuna nini? Fedha hizo anazitoa wapi na ili apate nini? Chama kimehamshwa kutoka kwa wakulima na wafanyakazi na kuingia kwenye mikono ya walanguzi, wafanyabiashara wakubwa wenye malengo yao kisiasa.

Ukifanya hesabu za wafanyabiashara wakubwa wanaoingia kwenye siasa utachoka. Ni wengi mno. Kila mtu humo ni mwanasiasa na mgongo wake ni CCM. Hao ndio wanaoharibu mfumo mzima wa CCM, ingawa wakiambiwa watabisha.

Tuambiane ukweli hata utatuuma. Tusidanganye kuwa tunamuenzi Nyerere wakati mambo yanaendeshwa kienyeji na wajanja wachache wananufaika. Huo ndio ukweli wa mambo.

Kila mmoja awe na nia ya kuwakomboa Watanzania wenzake kwa kutumia fursa mbalimbali zinazopatikana na rasilimali zilizopo. Kama madini yetu yanachimbwa na sisi kuambulia mashimo, bado tunamuenzi Nyerere?

Kama wazee wetu wasiokuwa na elimu waliwabaini wajanja, watumia nguvu zao vibaya, wakoloni na kuwatimua, vipi wasomi wa leo wanawaingiza kwa mgongo wa uwekezaji?

Elimu yao ipo wapi na inatumika vipi kuwakomboa watu wote. Hili lazima lisemwe hadharani kwa ajili ya kujenga haki ya kila mwananchi. Tanzania hii sio ya watu wachache wanaonufaika na familia zao, huku walalahoi wakiendelea kushinda njaa.

Kwa bahati mbaya, haya yanatokea wakati serikali ipo chini ya CCM, chama ambacho mwasisi wake, Nyerere alikitabiria kutawala milele kwa kusema bila hicho nchi itayumba. Kama hivyo ni kweli, ina maana Rais huyo wa Kwanza wa Tanzania, hajajua kuwa kuna siku hali itakuwa mbaya kwa chama chake.

Kwa wataalamu wa mambo ya siasa wanajua kuwa bila chama cha Mapinduzi chini ya Kikwete kukaa na kuangalia tatizo, uwezekano wa kushinda katika chaguzi tatu zijazo, yani mwaka 2015, mwaka 2020 na 2025 ni mdogo mno.

Na hilo likitokea, basi damu nyingi itamwagika kama inavyomwagika sasa, maana wenye nia ya kutawala wamekuwa wakipakaza sumu na kushitaki kwa nguvu ya umma (wananchi), wakisema CCM imeshindwa kuwakomboa Watanzania kwa kuwaacha kwenye madhira ya umasikini huku viongozi wao wakila raha na familia zao.

Nadhani kwa kupitia kumbukumbu ya kifo cha mwalimu Nyerere, Watanzania na viongozi wa Taifa hili, wakiwamo wana CCM wana kila sababu ya kujitazama upya kama kweli wanahitaji kumuenzi mwenyekiti wao wa zamani.

Wafanyie kazi ushauri wake, uongozi wake na sera zake zilizotukuka badala ya kusema kwenye vijiwe vya siasa, wakati chama chao kinayumba. Kuna mchambuzi mmoja, aliwahi kuandika katika makala yake, Nyerere akifufuka leo anakufa tena.

Najaribu kuyaelewa mawazo yake, maana akifufuka leo, atakuta CCM mpya yenye kila aina ya uozo, huku dalili za kubaki madarakani kwa miaka mingi ijayo ikikosekana, kama hali itaendelea kuwa kama ilivyokuwa sasa.

Wakati ni huu. Bado CCM imara, Taifa imara linawezekana kwa kuangalia makosa yao, mapungufu yao kwa ajili ya kusonga mbele na sio kurudi nyuma wala kubaki lilipo.

Mungu ibariki Tanzania.

kambimbwana@yahoo.com

0712 053949

0753 806087

Mwisho

Milovan kuelezea sare yao na Coastal leo

Na Kambi Mbwana, Dar es Salaam

KOCHA Mkuu wa timu ya Simba, Milovan Cirkovic, leo anatarajia kuanika chanzo cha sare yake na Coastal Union ya Tanga pamoja na muendelezo wa ligi hiyo, huku wakikipiga na Kagera Sugar, kesho katika Uwanja wa Taifa.

Kutoka sale na Coasta Union kumepokelewa kwa shingo upande na mashabiki wa timu hiyo, hasa wale waliokwenda kuishuhudia mechi hiyo ya aina yake na kuipatia Simba pointi moja, hivyo kufikisha pointi 17.

                                         Ofisa Habari wa Simba, Ezekiel Kamwaga

Simba wanaingia uwanjani kucheza na Kagera Sugar huku wakiwa na machungu ya kusimamishwa na Wagosi wa Kaya, licha ya kujipanga kwa ajili ya mchezo huo uliohudhuliwa na mashabiki wengi wa jijini Tanga na maeneo mengine ya nchi.

Akizungumza jana jijini Dar es Salaam, Ofisa Habari wa Simba, Ezekiel Kamwaga, alisema kocha huyo atazungumza yote yaliyosababisha asihndwe kupata pointi tatu kutoka kwa Wagosi wa Kaya, mechi iliyopigwa Jumamosi, katika Uwanja wa Mkwakwani.

Alisema kwamba anaamini kwa kujua mapungufu yake, ni sababu ya kuwaamisha mashabiki wake kuwa watashinda mbele ya Kagera Sugar wanaotoka mjini Bukoba na kuikuta Simba yenye machungu na mchezo huo.

“Simba tuna uchungu na mechi hiyo ya Kagera Sugar, ila sitaki kuzama sana kwenye mambo ya kiufundi maana yataongelewa na kocha wetu kwa ajili ya kuwatoa hofu mashabiki na wanachama wote hapa nchini.

“Naamini kuna mengi yametokea na yatatokea katika ligi hii yenye ushindani wa aina yake, lakini huenda limepatia ufumbuzi na kocha wetu, Milovan hivyo kuendeleza wimbi la ushindi na hatimae kunyakua ubingwa kwa mara ya pili mfululizo,” alisema Kamwaga.

Ligi ya Tanzania Bara imezidi kuwa na ushindani wa aina yake, huku kila timu ikipania kushinda katika mechi zake zote, jambo linalozifanya timu kongwe za Simba na Yanga zitumie nguvu kubwa ili kuzipa ushindi.

FM Academia kuvamia Hill Take Ijumaa

Na Kambi Mbwana, Dar es Salaam

BENDI ya muziki wa dansi ya FM Academia, maarufu kama Wazee wa Ngwasuma, wanatarajia kufanya shoo ya nguvu katika Ukumbi wa Hill Take, uliopo Ukonga, jijini Dar es Salaam, Ijumaa ya Oktoba 19.

Kuvamia ukumbi huo ni sehemu ya kuwapatia burudani mashabiki wao wa Ukonga, wakiamini kuwa litaacha watu hoi kutokana na mipango yao waliyoiweka kwa ajili ya kufanya shoo ya nguvu na kuwaburudisha mashabiki wao.

Akizungumza jijini Dar es Salaam na Handeni Kwetu, Mkurugenzi wa Fedha na Utawala wa bendi hiyo, Kelvin Mkinga, alisema kwamba mipango kwa ajili ya shoo hiyo imekamilika kwa ajili ya kuwapatia raha mashabiki wao wa Ukonga.

Alisema bendi yao imekuwa ikitamba na nyimbo mbalimbali zinazopendwa na watu wengi, hivyo anaamini mashabiki wao watapata raha za aina yake na kuendelea kuwaunga mkono katika tasnia ya muziki wa dansi hapa nchini.

“Ni bendi yenye mipango imara katika tasnia ya muziki wa dansi, hivyo naamini mashabiki wetu watakuja kwa wingi katika ukumbi huo kwa ajili ya kucheza na Wazee wa Ngwasuma wenye nyimbo zinazopendwa na wengi.

“Nyimbo kama ‘Heshima kwa Mwanamke’, ‘Otilia’ na nyinginezo ni kati ya zitakazoporomoshwa na waimbaji wetu, hivyo naaamini mashabiki watakuja kwa wingi kuburudika pamoja na kudhihirisha FM Academia ni zaidi yao,” alisema Mkinga.

FM Academia ipo chini ya Rais wa Vijana, Nyosh Al Sadaat, akiwa sambamba na wakali wengine akiwamo Patchou Mwamba, ambaye pia ni mkali katika tasnia ya filamu baada ya kushiriki katika filamu mbalimbali hapa nchini.

Tumeshindwa werevu, tujifunze na ujinga

Na Kambi Mbwana, Dar es Salaam

NI aibu kila siku kuendeleza kilio kile kile cha ubabaishaji wa soka la Tanzania, linaloongozwa na Shirikisho la Soka nchini (TFF). Wadau wa michezo wamekuwa wakilia sana juu ya uendeshaji mbovu wa soka, hasa uamuzi wa utata wa marefa, timu kutumia fedha nyingi, rushwa katika kusaka ushindi kwenye mechi zao.

 

Ratiba isiyokuwa na mashiko kwa baadhi ya timu, huku wasimamizi wa soka, wakiwa wepesi wa kuangalia zile mechi zenye faida, yani zinapokutanisha timu za Simba na Yanga.

 

Ni kama vile tumeshindwa werevu, hivyo walau sasa tujifunze na ujinga katika kudidimiza zaidi soka letu, maana sioni mipango inayoweza kuinua michezo, ukiwamo mpira wa miguu unaopendwa kwa kiasi kikubwa hapa nchini.

 

TFF inayoongozwa na Rais wake, Leodgar Tenga, akiwa na watendaji wake wengine, kama vile Angetile Osiah, Mkurugenzi wa Ufundi, Sunday Kayuni na wengineo, wamekuwa hohe hahe hadi kuchelewesha Kampuni ya kuendesha ligi.

 

Haya yanasababisha ligi na mpira wa miguu kwa ujumla kuwa wa kusua sua, maana yale yanayofanywa leo ndiyo yale yale yaliyolidumaza soka la Tanzania, huku likiachwa na nchi nyingine, kama vile Kenya, Uganda na kwingineko.

 

Leo hii timu ya Taifa ya Tanzania, inafanya kazi kubwa sana kuweza kuibuka na ushindi katika mechi zake zinapokutana na nchi za Uganda na Kenya. Lakini, timu hizo ni zile zilizokuwa zinafungwa mara kwa mara na Taifa Stars.

 

Ukiyasema haya, watashindwa kukuelewa, hivyo kuchelewesha kwa kiais kikubwa maendeleo ya michezo hapa nchini. Angalia, ligi kutoendeshwa na Kampuni kama invyotakiwa na wadau, kunaroa ladha halisi.

 

Watu wanajiendesha wanavyotaka wao. Timu inajiandaa na mechi yake, lakini inapelekewa barua ya haraka, ikitangaza kusogeza mbele au kurudisha nyuma mechi husika. Timu ya African Lyon, inazuiliwa kudhaminiwa na Kampuni ya Zantel, maana ligi ipo chini ya Kampuni ya Vodacom Tanzania.

 

Sawa, ila fedha zinazotolewa na vodacom zinatosha k,wa timu hizo? Kama zinatosha, je, hao Vodacom wanazitoa kwa wakati? Kumekuwa na ghiriba nyingi katika uendeshaji wa ligi ya Tanzania, hivyo kusababisha kutoelewana.

 

Kwa mfano, baadhi ya timu ikiwamo African Lyon zinalalamika kuwa hawajashirikishwa katika udhamini huo wa Vodacom. Wanfika mbali zaidi kwa kusema kuwa hawajapa nafasi ya kuangalia aina ya mkataba huo.

 

Pamoja na hayo, mkataba wa Vodacom na TFF juu ya ligi hiyo ulisumbua kwa wiki kadhaa, hadi kuchelewesha kutoka kwa ratiba na kuanza kwa ligi hiyo. Haya ni maajabu makubwa na matatizo ya ligi hiyo ya Tanzania Bara.

 

Ukiangalia kwa haraka, yote hayo ni majibu kuwa ligi haiwezi kuwa na tija kama kutakuwa na malalamiko ya kupitiliza. Timu zinalalamikia ukandamizaji huo ambao kwa kiasi kikubwa unachekewa na hao TFF.

 

Nalisema hili bila kuficha, maana ni ajabu ya mipango yenye matege. Tutawezaje kuwa na wachezaji bora wakati ligi yetu haieleweki? Sisi ni wa hapa hapa kwanini tunakuwa na mipango ya kucheza Kombe la Afrika au Dunia?

 

Hii ni aibu kubwa. Ndio maana hata ukiangalia mechi hizo, utagundua kwamba hakuna mikakati wala ufundi zaidi ya ushindi wa lazima. Kwa wale wenzetu wa Simba na Yanga ndio kabisa.

 

Kwanza wana mtaji mkubwa wa mashabiki na wanachama wenye  nazo hivyo kuweza kufanya lolote wanalohitaji. Haya lazima tuyaangalie upya. Tuwe na dhamira ya kweli na kuacha udanganyifu, ubabaishaji katika kuinua michezo.

 

Kunyume cha hapo hatutakuwa na jipya katika uendeshaji wa soka, ndio maana Taifa linaachwa nyuma na harakati za nchi nyingine za Afrika juu ya kuendeleza michezo.

 

Sikatai Taifa lina wachezaji imara na wenye vipaji vya hali ya juu, ingawa nao wanaangushwa na aina ya viongozi wa soka la Tanzania. Ubabaishaji ni mkubwa katika kila nyanja, ikiwamo uwanjani na usajili kwa ujumla.

 

Kumekuwa na janja janja nyingi, huku Simba na Yanga zikisikilizwa kupita kiasi, ingawa ukisema hili watakataa. Huwezi kubisha kuwa tuna vijana mahiri lakini hawawezi kusonga mbele kama hatutakuwa na mipango endelevu.

 

Wachezaji kama vile Mrisho Ngassa, Juma Kaseja, Nurdin Bakari, Juma Nyoso, Nadir Haroub Canavaro, Haruna Moshi Boban na wengineo wana vipaji vizuri na wanaweza kufanikisha maendeleo ya michezo hapa nchini.

 

Tatizo hawawezi kwenda mbele bila kuongozwa na hao wanaowaongoza ndio wameoza kabisa. Haya lazima yasemwe kama tuna lengo la kuboresha soka letu. Huo ndio ukweli wa mambo.

 

Vinginevyo tutakuwa tunacheza soka la nyumbani bila kuwa na maendeleo yoyote, inagwa Mataifa mengine yanazidi kuchanja mbuga. Viongozi wa soka kuanzia ngazi ya klabu, mikoa na Taifa kwa ujumla wajipange katika hilo.

 

Wasiopenda kasi ya mabadiliko wawekwe kando kwa ajili ya Tanzania. Nasema hivyo huku nikiamini kuwa mashabiki wanaopenda soka ni wengi mno. Ukitaka kuhakikisha hilo, hudhuria mechi za Simba, Yanga au timu ya Taifa.

 

Kama mipango itawekwa, basi soka la Tanzania litapanda kwa timu zetu zote, kama vile Coastal Union, Kagera Sugar, Azam FC, Mtibwa Sugar, African Lyon, Toto African na nyinginezo, hivyo kuingiza mashabiki wengi katika mechi zao.

 

Mashabiki wa soka hawatachagua tena mechi za kuingia. Wataingia kwa kila mechi, maana wanapokwenda huko wanapata kitu kizuri. Nasema hivyo kwasababu, leo hii mashabiki wanaingia kwa Simba na Yanga kwakuwa ndio timu zao wanazopenda.

 

Hawapendi soka lao, ila wanapenda timu hizo kongwe. Kama hivyo ndivyo, tunawezaje kuwabadilisha watu juu ya mtazamo wao? Hakika ni mikakati. Mipango imara pamoja na kuacha ubabaishaji katika aina ya viongozi wetu.

 

Sheria zifuatwe na dhamira ya kweli iendelee kuwekwa kwa ajili ya kuinua kiwango cha michezo kwa nchi yetu. Huo ndio ukweli wa mambo. Tusipofanya hivyo, tutajiweka kwenye mtihani na kulaumu wakati hatuna mikakati.

 

Hakuna mtu asiyejuwa mambo mazuri ya kufanya. Wote waliokuwapo kwenye nafasi za uongozi wa soka, hakika ni wenye akili zao timamu. Hivyo watumie vichwa vyao kubuni na kuendeleza mambo yenye tija kwa Taifa letu.

 

Nasema haya kwa kujua kuwa tumekuwa na mapungufu mengi katika uendeshaji wa soka letu, hivyo nadhani huu  ni wakati sasa wa kujifanyia marekebisho kama kweli ipo chembechembe za kuinua soka la Tanzania.

 

Kwa sasa, bila kuangalia ni Simba inayoongoza ligi, Azam FC, Yanga, Mtibwa Sugar, ila hakuna soka linalosuuza nyoyo za watazamaji zaidi ya wengi wao kutumia rushwa aidha ya fedha au ya mapenzi yao kwa timu hizo, hasa hizo kongwe.

 

Kama tumeshindwa werevu sio mbaya tukiendelea kujifunza na ujinga, ila wasipite watu vichochoroni wakijifanya wana uchungu na soka letu, maana wakati huu wapo kimya wakiendelea kutafuna kile wanachopata.

 

Wakati ni huu. Tujisahihishe ili kulifanya Taifa lisiwe kichwa cha mwendawazimu kama alivyowahi kusema, Rais Mstaafu, Ali Hassan Mwinyi.

 

kambimbwana@yahoo.com

0712 053949

0753 806087

Wema, Aunt Ezekiel wawaomba radhi Watanzania

Na Kambi Mbwana, Dar es Salaam

WASANII wawili wa filamu wenye majina makubwa hapa nchini, Wema Sepetu na mwenzake Aunt Ezekiel wamewaangukia Watanzania kwa kusema hawajajua kama watawakera watu haswa baaada ya picha zao kuzagaa katika mitandao ya kijamii na vyombo vingine vya habari.

Wema na Aunt walipokuwa katika ziara ya tamasha la Fiesta, walipigwa picha za utupu, walipokuwa jukwaani hivyo kuwakera watu wengi, ukizingatia kwamba wao ni kioo cha jamii na wanastahili kuishi kwa staha na sio kuanika nyeti zao.

Hivi ndio vivazi vya Wema Sepetu kushoto na Aunt Ezekiel kulia vilivyozua balaa hadi kuomba radhi leo kwa Watanzania, katika Ukumbi wa Idara ya Habari Maelezo. Katikati ni JB wakati wapo kwenye shoo ya Fiesta ya mjini Moshi.

                                          Wema Sepetu akiomba radhi kwa Watanzania

Wema na Aunt Ezekiel waliitumia siku ya jana katika Ukumbi wa Idara ya Habari Maelezo kuzungumza na waandishi wa habari, ili wafikishe vilio vyao, wakisindikizwa na Katibu wa Shirikisho la Filamu Tanzania (TAF), Willsona Makubi pamoja na msanii mwingine wa fgilamu, Tino Muya.

Akizungumzia sakata hilo, Wema alisema hawana uzoefu wa kupanda katika majukwa makubwa, hivyo baada ya kufanya hivyo, baadhi ya wapiga picha na wananchi wengine waliingia kwenye kazi hiyo na kusambaza picha zao.

“Sikujua kabisa kama picha zangu zingezagaa kwenye mitandao maana sina uzoefu huo kama waliokuwa nao wasanii wengine wa muziki wanaopanda jukwaani kila wakati, ila kwa sasa nimejua na naamini sitawakera tena Watanzania.

“Nipo chini ya miguu yao na mkawaeleze kwamba tabia yangu inawachosha pia hata ndugu zangu, maana nao ni waathirika kwakuwa wanazipata kwenye vyombo vya habari na jinsi ninavyoonyeshewa vidole,” alisema Wema.

Naye Aunt alisema tangu sasa amekuwa msanii mpya naa kioo cha jamii, maana atajilinda katika kila jambo analofanya ili aendelee kuheshimiwa na kutumainiwa kama msanii mwenye dhamana na kutangaza utamaduni wa Mtanzania.

Huku akiwa na masikitikio makubwa, Aunt alisema,“ Hata mimi na mwenzangu Wema tunapata tabu sana, hivyo tuliamua kukutana na viongozi wetu ili tutumie fursa hii kuzungumza na nyie tukijua fika mtafikisha vilio vyetu kwa Watanzania wote,” alisema mwanadada huyo ambaye jana alivaa vazi la heshima na kuahidi kuwa mtu mwenye maadili.

Akielezea sakata hilo, Makubi alisema wanaamini wasanii hao watafuata maadili ya Mtanzania katika kujiheshimu katika maisha yao yote, ndio maana baada ya tabia zao kuwa mbaya waliamua kujishusha na kutaka suluhu na jamii yao.

“Wasanii hawa wasamehewe na naamini watakuwa watu wenye maadili kuanzia hapa, hivyo ni jukumu letu kujua kuwa kadri siku zinavyokwenda wanazidi kupanuka kiakili na kujua wataacha tabia zao za kukera,” alisema.

Katika tamasha la Fiesta liliiofanyika katika mikoa mbalimbali ya Tanzania Bara, wasanii hao waliambatana kwenye ziara hiyo na kupanda jukwaani kuwasalimia mashabiki wao, jambo ambalo hata hivyo liliwakera baadhi ya watu baada ya kupanda na vivazi vya utupu na kujiachia jukwaani hivyo kupigwa picha mbaya.

‘Bebaneni mkichoka mtaacha’

 

 

SIWEZI KUVUMILIA

 

 

Na Kambi Mbwana, Dar es Salaam

HUWEZI kumkataza mtu asitumie nafasi yake kufanya kile anachokipenda katika tasnia ya michezo, ukiwamo mpira wa miguu. Kila mtu anafanya kile anachokiona kwa manufaa yake na marafiki zake anaokula nao.

 

Katika hilo, hata kama watu wawe wakali vipi, lakini itatungwa sababu, uongo wa kila aina kusafisha au kusawazisha kinachopingwa na wadau wao. Kwangu mimi nasema, bebaneni mkikochoka mtaacha na kuendelea na maisha mengine.

 

Nayasema haya kwa uchungu mkubwa baada ya watu kulazimisha maji yapande mlima. Rais wa Shirikisho la Soka nchini (TFF), Leodgar Tenga, juzi aliwaambia waandishi wa habari kuwa elimu kwwenye kuongoza soka sio lazima.

 

Tenga anayasema haya huku akijua wanachama wao wengi, wamelazimika kusimamisha chaguzi zao, au kusogeza mbele ili wabadilishe katiba zao kwa ajili ya kuingiza kipengele cha elimu ya kidato cha nne kuingizwa.

 

Wengi wamekutana na kadhia hii. Mwenyekiti wa zamani wa Simba, Hassan Dalali, amekumbana nayo na kuachia nafasi yake ya uongozi wa Simba. Lakini leo hii kwakuwa kuna mtu anahitajiwa, ulazima huo unafutwa.

 

Tenga amelazimika kusema haya maana TFF inamuhitaji mgombea wa Chama cha Soka mkoa wa Dar es Salaam (DRFA), Amini Bakheresa. Bakheresa amekuwa akiwekewa pingamizi na wadau mbalimbali wa michezo.

 

Hata hivyo, wanaomuwekea pingamizi hushindwa baada ya watu wenye nafasi zao kuingilia kati kwa ajili ya kubebana. Ndio maana nasema, kwangu mimi siumizwi na suala hilo la kuwasaidia marafiki zenu, ila sioni haja ya kipengele cha elimu kuwa hoja.

 

Vinginevyo waheshimiwa watajizalilisha tu. Tenga na jopo lake la TFF linajipaka kinyesi, maana hawawezi kuwakataza wachache na kuwaruhusu wengine. Tangu mwanzo, sikuwahi kukubali mabadiliko ya katiba ili kuingizwa kipengele cha elimu.

 

Nilifanya hivyo kwakujua uongozi hausomewi kamwe. Uongozi ni kipaji na sio kila mtu anaweza kuwa viongozi. Nilifanya hivyo kwakuangalia viongozi wengi mahiri katika Taifa hili ambao hawak,uwa na elimu kubwa.

 

Hata kwenye soka, Dalali aliongoza kwa  mafanikio makubwa akiwa Simba. Aliweza kuipa ubingwa timu yake bila kufungwa hata mechi moja. Lakini kipengele cha elimu kikamuondoa, tena kwa kubarikiwa na TFF.

 

Leo hii vipi DRFA wembe huo usitumike? Kuna nini hapo kwenye ofisi za TFF na DRFA? Aibu hii itakwisha lini? Hakika siwezi kuvumilia. Aidha, iwekwe wazi kuanzia sasa kuwa yoyote anaweza kuwa kiongozi hata kama akiwa hana elimu ya kidato cha nne.

 

Kila mwenye uwezo huo wa kuongoza, apewe nafasi na sio kwa watu wachache. Nalisema hili hadharani, maana kuna siku kutatokea mkanganyiko wa kiuongozi na kuzua balaa. Hili linawekwa kwenye kumbukumbu na vizazi vijavyo watalifanyia kazi.

 

Hakika siwezi kuvumilia na nitaendelea kusubiri wenye mtazamo wao, harakati zao na wanaotaka kuweka kumbukumbu sawa kuwa wakali zaidi katika hilo.

 

Kwakuwa mimi sina nia yoyote ya kuwania nafasi hiyo kwa sasa, pia siwezi kulia wala kucheka ninapoona sheria hazifuatwi, maana najua fika hata niseme vipi, wakubwa hao wakiamua lao hakuna wa kuwazuia, ndio maana mbeleko yao kwa maswahiba zao zipo pale pale.

 

Tena kwa dharau tele. Eti wanasema kelele za chura hazimnyimi tembo kunywa maji na dua ya kuku haipati mwewe. Haya bwana nyie endeleeni kubebana hadi mtakapochoka wenyewe na kuanza kufuata sheria na taratibu mlizoweka wenyewe.

 

Tukutane wiki ijayo.

 

kambimbwana@yahoo.com

0712 053949

0753 806087

Chaguzi za ndani zikibebe Chama Cha Mapinduzi

MGODI UNAOTEMBEA

Na Kambi Mbwana, Dar es Salaam

KATIKA mikoa mbalimbali ya Tanzania, kumekuwa kukiendelea na chaguzi za ndani za Chama cha Mapinduzi CCM na kushuhudia majina kadhaa yakigonga vichwa vya watu wengi.

Chaguzi hizo zimeanza siku chache baada ya Mwenyekiti wake, Jakaya Mrisho Kikwete, kuwapasha wabaya wao kuwa chama hicho hakiwezi kufa, hasa kwa wanachama wao kujitokeza kwa wingi kuwania nafasi mbalimbali za chama hicho.

                                          Jakaya Kikwete, Mwenyekiti wa CCM

Nafasi kama vile Mwenyekiti wa Mkoa, Wilaya, Katibu, Mweka Hazina katika ngazi mbalimbali, pamoja na Mjumbe wa NEC Taifa.

Hizi ni nafasi zilizoombwa kwa wingi mno na kuonyesha jinsi chama hicho kinavyoendelea kuungwa mkono na wanachama wengi, ingawa baadhi ya wapinzani wanaona chama hakina mashiko na kinajichimbia kaburi.

Ni matokeo mazuri mno. Kila mtu anayapenda kwa wale wenye mapenzi mema na chama chao kinachojiweka katika umahiri wa aina yake na kushindana na vyama vinavyoendelea kuzaliwa kila siku na kuungwa mkono na watu wake.

Kama idadi ya watu walioomba kuteuliwa kugombea nafasi hizo zimeongezeka, kwanini waseme chama kimekufa?

Hata hivyo wahenga walisema lisemwalo lipo. Na katika kuwasikiliza wadau hao, lazima ukweli usemwe na juhudi ziwekwe kama tahadhari ya kukijenga chama.  Je, chaguzi hizo za ndani zina manufaa na chama?

Je, wale walioenguliwa katika nafafsi hizo wamekubali matokeo au ndio wanaanza kujenga matawi yao kwa ajili ya kukihujumu chama chao? Vipi wale walioshindwa katika chaguzi hizo, je wamekuabali kuwa hayo ni matokeo ya kawaida?

Hili linapaswa kueleweka vizuri. Leo wenye chama chao wanaweza kufurahia kuwa chama bado kinapendwa, lakini wachache wao wakawa tofauti. Kwa mfano, Waziri Mkuu wa zamani, Fredrick Sumaye ameshindwa nafasi ya Mjumbe wa Halmashauri Kuu ya Taifa (NEC), kupitia Wilaya ya Hanang, Mkoa wa Manyara.

Sumaye ameshindwa mbele ya mwanasiasa mwenzake wa CCM, Dk. Mary Nagu, ambaye pia Mbunge wa Jimbo la Hanang na Waziri wa Nchi, Ofisi wa Rais, Uwekezaji na Uwezeshaji.

Uchaguzi huo ni kati ya ile inayochanganya vichwa vya watu wengi, ukizingatia kwamba chaguzi za ndani za CCM zimekuwa na matokeo magumu na joto la ushindani kwa kila mgombea na yule anayepiga kura.

Haijulikani kwanini chaguzi za chama hicho ni ngumu. Labda ni kwasababu wanaopiga kura ni wenye kufanana itikadi, ingawa kwenye malengo hutofautiana kwa kiasi kikubwa.

Kujuana au kurubuniwa kwa rushwa nako ni hatua ngumu kwa chama chao. Ingawa rushwa hukumewa na kila mtu, lakini sio sababu ya kuamini kuwa kichocheo hicho ndani ya chaguzi kimeachwa.

Kikwete alitahadharisha kuwa yoyote atakayebainika anatoa rushwa kwenye uchaguzi huo, hatachekewa, akiwa na maana ya wagombea wote kuacha kutumia rushwa.

Wakati Kikwete anasema hivi, wale wagombea na wapiga kura wao wanapaswa kuwa na uzalendo na chama chao. Wao wasipokuwa makini, uwepo wao hauwezi kuwa na manufaa zaidi ya kukibomoa chama chao.

Wafanye siasa zenye mashiko na mvuto kwa kila mmoja wetu. Wawe kioo cha jamii ndani ya chama au nje ya chama. Wasifanye siasa za kujionyesha mbele ya hadhira, huku malengo halisi, yakiwamo kutetea maslahi ya chama yakiwa adimu.

Kila mgombea au kiongozi wa chama lazima avae uhusika na kukitetea chama chake mbele ya wapiga porojo wengine, hasa waliokuwa upande wa upinzani.

Kama Chama Cha Demokrasia na Maendeleo (Chadema), kinahaha kufanya mikutano yao mikoani kujenga chama chao, kwanini hawa wa CCM wakae hadi Uchaguzi Mkuu.

Chadema wanatamba na kauli mbiu zao, Dira ya Mabadiliko Movement for Change (M4C), wakati Chama cha Wananchi (CUF) wamekuja na kauli mbiu yao ya (Vision for Change) (V4C), tena wakianzia harakati zao hizo katika ngome ya Chadema, jijini Arusha.

Baada ya kuibuka hayo, Chadema na CUF walianza kurushiana makombora wakisema kuwa chama hicho kimedandia hoja na mwelekeo wao, ingawa CUF nao baadaye walijibu kwa kusema wao ndio waasisi wakubwa.

Kwa mujibu wa CUF, mwaka 2008 na kuiweka rasmi kwenye ilani ya Uchaguzi ya mwaka 2010, hivyo yoyote anayefikiri kuwa hoja yao imetoka Chadema wanajidanganya.

Sitaki kusema nani mkweli kati ya Chadema na CUF, ila hizo ni changamoto nzuri za siasa za Tanzania, zinazoongozwa na CCM iliyokaa madarakani kwa miaka mingi, tangu Taifa hili lilipopata Uhuru wake mwaka 1961.

CCM wala isisononeshwe na vuguvugu la mabadiliko kwa Chadema na CUF, au hata vyama vingine navyo vikifuata nyayo hizo kwa ajili ya kuwapatia elimu ya uraia Watanzania na kuleta ushindani katika Uchaguzi Mkuu utakaofanyika mwaka 2015.

Kikubwa kinachotakiwa kufanywa na hao wana CCM ni kukubali kujifunza kutokana na makosa, sambamba na lengo la kuendelea kukaa madarakani kwa kufanyia kazi kero za Watanzania.

Kwa siku za hivi karibuni, Serikali inayoongozwa na CCM, chini ya Kikwete, imekuwa ikifanyia kazi kero hizo, zikiwamo za usafiri, jambo linalowafanya watu waanze kuamini huenda mambo yakawa mazuri katika siku za usoni.

Haya yakiendelezwa na kubuniwa  miradi mingine ya maendeleo, watu wataichukia CCM kwa mambo mengine, likiwamo hilo la ukongwe wake.

Katika kulijua hilo, ni jukumu la kila kiongozi wa CCM, kijana au mzee, mwanamke au mwanaume kufanya kazi kwa ajili ya chama chake.

Najua mapungufu kwa baadhi ya waliochaguliwa au kupitishwa kuwania nafasi hizo haziwezi kukosekana, lakini kama wenyewe wanajua hilo wanaweza kuyafanyia kazi, ndio maana kamati ziliona wanafaa wagombee nafasi hizo.

Watu kama vile Amos Makalla, Juma Nkamia, Mwita Gachuma na wengineo ni kati ya wale waliofanikiwa kushinda katika nafasi walizoomba mwaka huu.

Makalla ambaye pia ni Naibu Waziri wa Habari, Utamaduni na Michezo, ameshinda Mjumbe wa NEC Taifa, kupitia Wilaya ya Mvomero, wakati Nkamia, ameshinda kwa Wilaya ya Nchemba.

Ukiangalia kwa haraka, utagundua kuwa wanachama wengi na wenye majina makubwa wameshindwa katika chaguzi hizo, hivyo wasipokuwa na moyo wa subira, wataongeza idadi ya makundi hasimu ndani ya CCM.

Kila mmoja akisema aumizwe na kuanguka kwake, hali ya mambo ndani ya CCM itakuwa tete, hivyo kukipasua zaidi katika uchaguzi Mkuu ujao. Hakuna anayebisha kuwa waliochaguliwa leo, ndio watakaoibeba au kukiangusha chama mwaka 2015.

Wakifanya siasa zenye tija na malengo ya dhati, sidhani kama chama kitaanguka, hasa kama wakikubali matokeo na kuwabeba kila anayetajwa na chama, iwe kwenye nafasi ya Urais, Ubunge, Udiwani au Uenyekiti wa Serikali za Mitaa.

Najua yapo machungu makubwa ya kuachwa au kushindwa bila sababu za msingi, lakini ifikie wakati wanachama wote wawe kitu kimoja. Kwa mujibu wa Kikwete, sio kila mmoja wao anaweza kuwa kiongozi ndani ya CCM.

Walioachwa au watakaoshindwa katika chaguzi zinazoendelea ndani ya chama, wote wawe kitu kimoja na kuleta ushirikiano kwa ajili ya kukiweka chama chao katika mazingra mazuri ya ushindi na kuonyesha kuwa bado wanakubalika.

Haya yatatimia kama wote wakiwa kitu kimoja na kuacha zile siasa za kupakana matope, kutukanana au kurushiana makombora yasiyokuwa na msingi wowote. Kunyukana kwao, ni hasara kwa chama chao na kuvipa kiburi cha majigambo vyama vya upinzani vinavyotembea kwa matao kwa kuona uwezo wa kufanya lolote kwa Watanzania wanao.

Vyama ambavyo vimekuzwa na Serikali ya CCM, vinavyokula ruzuku za Watanzania, huku vikiwa na jeuri kubwa au uchu wa kushika dola, ingawa katika harakati zao hizo, wanaweka mbele maslahi yao na kuacha moyo wa uzalendo nyuma, hali inayoweza kuleta vurugu kubwa kama kila mmoja atakuwa na uchu wa kushika dola.

Huo ndio ukweli. Kila mmoja wetu aujuwe na kuufanyia kazi, wakiwamo washindi au washindwa katika chaguzi za ndani za CCM zinazoendelea kutimua vumbi katika mikoa mbalimbali ya Tanzania na kuleta vicheko na vilio kwa wenye nia ya kuwa viongozi wa chama hicho, kama mwanzo wa kuweka dira ya kushika nafasi kubwa zaidi iwe kwenye chama au serikali.

kambimbwana@yahoo.com

0712 053949

0753 806087

Mwisho

Ukiona uchafu, huwezi kumuenzi mwenzi wako

MAMBO FULANI MUHIMU

Na Kambi Mbwana, Dodoma

MAPENZI ni jambo ambalo linaleta hisia mbili tofauti. Mosi; mapenzi yanaweza kukufanya uishi kwa raha kama mfalme. Pili, mapenzi hayo yakibadilika hukufanya uwe kama chizi.

Jambo hilo zuri linalofananishwa na sukari kwa yaliyowakalia vizuri, hubadilika na kuwafanya baadhi yao waone ugumu wa kuendelea kuishi, maana wanaowapenda wanawasumbua kwa kiasi kikubwa.

Ni kutokana na hilo, jamii inashauriwa kuwa makini katika suala hilo. Wasijaribu kukurupuka na kuchukua uamuzi wenye mashaka kwa namna moja ama nyingine, maana vinginevyo watatamani kujinyonga.

                                                     Kambi Mbwana

Hata hivyo, pamoja na yote hayo, lakini inajulikana wazi wazi kuwa dawa kubwa katika uhusiano wa kimapenzi ni kumfikisha mwenzako, kumuweka katika kilele cha ubora katika ulimwengu wa mapenzi.

Katu usiangalie umbo lako, sura yako katika kujigamba kwamba unaweza kupendwa na yoyote, wakati ni mzigo kitandani. Kama huna ujuzi katika suala la mapenzi, ondoa kupendwa, kuhitajiwa au kugandwa na yoyote.

Zaidi ya hapo, wachache wao watakupitia na kuchukua hamsini zao, maana huna ujanja wa kumuweka mwenzako katika furaha. Hivyo basi, ili jamii iwe kwenye ramani nzuri na furaha ya mapenzi, lazima tuwajulie watu wetu.

Tufahamu namna ya kuwachanganya kisaikolojia, bila kuangalia uzuri wetu, fedha zetu, maana hizo haziwezi kufanya penzi liwe na amani.

Wapo ambao wanaishi na wanaume wenye nazo kupita kiasi, lakini bado wake zao, wachumba zao au wapenzi wao wanajiingiza katika uhusiano na watu wa kawaida, wakiwamo wafanyakazi wa ndani.

Hata hivyo haitoshi, wapo pia wakina mama wenye nazo lakini wanachanganywa na wasichana wa kawaida, wenye sura za kawaida au hadhi za kawaida. Wenye mali zao wanalia na kusaga meno.

Wanasema“Hivi kwani mume wangu unatembea na yule mfanyakazi wa ndani wakati mimi nipo” Au sielewi unachofuata kwa yule kijana mchunga mbuzi wakati mimi nipo, tena mwenye fedha za kutosha tu”

Kama wewe ni miongoni mwa watu wenye mtazamo huo umeliwa. Fedha sio kila kitu katika mapenzi. Fedha zako usipoangalia zinaweza kuwanufaisha wapita njia, wajuzi wa mambo kwenye mambo fulani muhimu.

Huo ndio ukweli wa mambo. Mjuzi huyo hatafutwi ili mradi mtu ana mtu wa nje, ila umuhimu wake unakuja anapokuwa kwenye ulingo. Hayo lazima mimi na wewe tuyajuwe kwa ajili ya mapenzi yetu.

Unapokuwa na mpenzi wako, mume au mke wako lazima ujuwe yupo na wewe kwa ajili ya kujenga maisha ya wawili. Ili mwenzako afurahie uwepo wako, hakikisha kuwa walau unatumia muda wako hata kama kidogo kumridisha kimapenzi.

Kwa wale ambao kwa miaka mingi wameishi na wapenzi wao bila kutumia ujuzi wao, waanze leo. Na wale wanaoingia kwenye uhusiano leo, pia wawaangalie watu wao, namna gani walivyo na wanastahili aina gani ya mapenzi.

Ninaposema mapenzi, sio yale ya kukaa pamoja, kutembea pamoja au kumpigia simu kila baada ya dakika kumi. Mapenzi, tendo la ndoa lenye ujazo mkubwa linalostawisha uhusiano wa wawili wapendanao.

Hivyo basi tuwe makini katika kazi hiyo. Tukitaka kuwapa raha kweli wenzetu lazima tuache kazi na kufanya kazi. Tendo la ndoa sio mchezo mdogo. Sio kama kuwasha njiti ya kibiriti mahala palipotulia.

Inahitaji kusumbua akili na kusumbua pia mwili wako. Sina maana kama nataka muda wote muwe kwenye tendo la ndoa, ila mnapotaka kufunja amri hiyo ya sita, basi mfikishe mwenzako kileleni.

Usimchezee chezee tu ukamuacha. Nimeamua kuandika mada haya maana nimepata malalamiko mengi kutoka kwa wanawake. Baadhi ya wasomaji wangu, wamenipasha kwamba waume zao ni watu wa kwenda raundi moja halafu wanaangalia ukutani.

Kwa bahati mbaya, watu hao wanapolala uzungu wa nne, wanakuwa wanawanyanyasa wenzao, kama unavyojua tena gari linapowaka. Hali hiyo inakera kiasi cha kutamani wapiti njia.

Haya nayasema kwa uchungu, maana usaliti mwingi huibuka kama wawili wapendanao hawaridhishani. Kama unaona huna ujuzi wa kumuweka katika kilele mwenzako, tafuta msaada kwa watu.

Kabla ya kuendelea, niseme tu kutokana na aina ya gazeti lako la Mtanzania, tunashindwa kuandika kiundani zaidi mada za mapenzi, badala yake tunakuwa wepesi kujibu maswali yenu kwa kupitia simu au barua pepe.

Tunafanya hivyo baada ya kugundua kwamba watoto wengi nao hujifunza kinachoandikwa kwenye gazeti, jambo linalonifanya niandike kwa kuficha au yale yasiyokuwa ya ndani zaidi.

Tukutane wiki ijayo.

kambimbwana@yahoo.com

0712 053949

0753 806087

Mwisho

Fiesta ilivyowapagawisha Dodoma na Morogoro

                          FIESTA 2012 DODOMA NA MOROGORO

                                                       AT akiwajibika jukwaani

                                               Linah Sanga, akifanya mambo

                                          Shetta akifanya mambo jukwaaani.

 

Na Kambi Mbwana, Dar es Salaam

MASHABIKI wa muziki wa mkoani Dodoma, Septemba 14, walipata burudani za aina yake katika Uwanja wa Jamhuri, lilipofanyika tamasha la Fiesta 2012, lilioanza kutimua vumbi mapema mwezi uliopita, mkoani Kilimanjaro.

Mbali na Dodoma, tamasha hilo pia liliendelea katika Uwanja wa Jamhuri mjini Morogoro, Jumapili ya Septemba 16, huku mashabiki wao wakibaki na hara mtindo mmoja kutokana na tamasha hilo.

Wasanii ambao walitoa burudani katika tamasha la Dodoma na Morogoro ni pamoja na Recho, Dayna, Linah, Mwana FA, Godzilla, Shetta, Stamina, AT, Juma Nature, Diamond, Rich Mavoco na Ben Pol.

Mbali na wasanii hao wanaokubalika hapa nchini, pia wasanii wachanga kama kawaida walianza kutoa burudani katika uwanja huo wa Jamhuri Dodoma, ikiwa ni utangulizi wa tamasha hilo na kiu ya kuibua wasanii wapya.

Burudani hizo zilianza jioni kwa wasanii wachanga kupanda jukwaani kutangaza vipaji vyao katika tamasha linaloingiza watu wengi kwa wakati mmoja, jambo ambalo linasababisha uwanja kujaa pande zote.

Kila msanii mchanga wa Morogoro na Dodoma, walikuwa na shauku ya kufanya vyema kwa kuimba nyimbo moja nzuri, ikiwa ni dalili njema ya kutangaza cheche zao kwa wadau wao katika uwanja huo.

Mara baada ya kumaliza kwa taratibu za burudani za wasanii wachanga, moto ulianza kwa kuwapa nafasi washindi watatu wa Super Nyota, wakiongozwa na Young Killer, mwimbaji mdogo mwenye makali ya kutisha.

Wasanii hao wamewekwa katika tamasha hilo kama sehemu ya kuonyesha cheche zao, baada ya kupatikana katika shindano la kusaka vipaji, ikiwa pia ni utangulizi wa ufunguzi wa tamasha hilo la Fiesta.

Baada ya kumaliza kwa wasanii hao watatu wa Super Nyota, msanii aliyeibukia mkoani Morogoro na wimbo wake ‘Mafungu ya Nyanya’, Mwanaisha Said, maarufu kwa jina la ‘Dayna’ alipanda jukwaani akifanya vitu vya aina yake.

Dayna kwanza aliwatanguliza madansa wake walioingia jukwaani kwa mbwembwe za aina yake, wakicheza na kujipanga kishujaa na kupandisha Bendera ya Taifa ya Tanzania, wakifuatiwa na kupiga wimbo wa Taifa.

Wakati wanakatisha kuimba wimbo huo, Dayna alipanda jukwaani, akisababisha shangwe kwa mashabiki wengi uwanjani hapo, wakifurahia alivyojipanga katika shoo yake kwenye tamasha hilo.

Alipomaliza kuimba nyimbo zake, ukiwamo ule wa Mafungu ya Nyanya, Nivute Kwako na nyinginezo, mwanadada huyo alishuka na kupanda jukwaani kwa msichana kutoka Tanzania House of Talents (THT), Reyker, akifuatiwa na Rehema Sundi pamoja na Recho, anayetamba na wimbo wake wa Kizunguzungu, Upepo na huu wa Nashukuru Umerudi unaofanya vizuri kwa sasa.

Recho anatamba katika chati za muziki kutokana na umahiri wake wa kushambulia jukwaa, huku akitokea kwenye taasisi hiyo ya kulea na kukuza muziki ya THT, iliyoibua wasanii wengi wenye uwezo wa kutisha.

Mara baada ya mwanadada huyo kumaliza kuimba, alimuachia Ommy Dimpozi kuendelea kushusha burudani. Hata hivyo, Ommy ni kama alipanda kwa mkosi, maana umeme ulisumbua kwa dakika kadhaa.

Cha kushangaza ni kwamba, licha ya umeme kusumbua uwanjani hapo kwa dakika kadhaa, lakini Ommy aliendelea kushangiliwa na wadau kuimba kama kawaida, hivyo kuonyesha kuwa msanii huyo anakubalika kupita kiasi.

Kitendo cha kumaliza kuimba kwa mkali huyo aliyeacha historia mkoani Dodoma, alipanda jukwaani Rich Mavoco, akifuatiwa na Stamina, msanii aliyetingisha uwanja mzima kwenye shoo hiyo.

Wasanii wengine waliofuata kutoa burudani katika tamasha hilo ni Shetta, Ben Pol, Linah, Mwana FA, aliyesindikizwa na AY, ambaye hata hivyo hakuwa kwenye ratiba ya kupanda jukwaani kutoa burudani.

Msanii ambaye pia atakumbukwa ni AT aliyepanda jukwaani mara baada ya kushuka wakali wa Hip Hop na R&B Ben Poli, yeye alipanda jukwaani na kuwashawishi mashabiki wamsikilize na kucheza nyimbo zake.

Wengi katika shoo kubwa kama hizo hushindwa kuwafanya watu wacheze, hasa hawa wa mduara kama AT, anayetokea mjini Zanzibar.

Shoo ya Dodoma ilimalizwa na Juma Nature usiku wa manane, baada ya kumaliza wakali wote, akiwamo Godzilla, mkali mwenye maskani yake mitaa ya Salasala.

Utaratibu kama huo ulionekana pia katika mji wa Morogoro, ambapo mashabiki wengi walionekana kupagawa kabla ya shoo hiyo wakiwachekea wasanii na kujipanga kwa ajili ya kuingia kwenye shoo hiyo.

Hata hivyo, mashabiki walipoingia kwenye uwanja huo wa Jamhuri mjini Morogoro, walikuwa wazito sana kucheza na kupagawa kama ilivyokuwa kwa wakazi na mashabiki wa mkoani Dodoma.

Fiesta inaandaaliwa na Kampuni ya Prime Time Promotion pamoja na Clouds Media Group, likifanyika kila mwaka. Kwa mwaka huu, Fiesta ilianza kutimua vumbi katika mji wa Moshi, mkoani Kilimanjaro.

Katika kila mkoa wanapofanya shoo hiyo, kunatanguliwa na kazi za kijamii, ikiwamo kutembelea vituo vya watoto yatima na kuwapa misaada ya aina mbalimbali pamoja na kupata fursa ya kubadilishana nao mawazo.

Kwa mkoa wa Dodoma, wasanii na waandaaji wa tamasha hilo walitembelea kituo cha watoto yatima kinachojulikana kama Kijiji Cha Matumaini, kilichoanzishwa rasmi mwaka 2002.

Usiku wa shoo hiyo ulifunguliwa na Mkuu wa Mkoa, Rehema Nchimbi, wakati ile ya Morogoro ilihudhuliwa pia na Mkuu wa Mkoa wake, Joel Bendera, ambapo pia wakuu hao husisitiza suala la amani kwa tamasha hilo.

Mikoa iliyofuata kwa burudani hiyo ni pamoja na Tanga, Musoma mkoani Mara, Shinyanga, Mwanza, Dodoma, Morogoro, huku wiki hii likipangwa kufanyika jana Ijumaa katika mkoa wa Mbeya, wakati kesho Jumapili tamasha hilo pia litafanyika mkoani Iringa, Uwanja wa Samora.

kambimbwana@yahoo.com

0712 053949

0753 806087

Mwisho

Na Kambi Mbwana, Dar es Salaam
HALI ndani ya Chama cha Mapinduzi CCM, inazidi kuwa mbaya, kutokana na baadhi ya wanachama na viongozi wake, kushindwa kuwekana sawa katika kipindi hiki kigumu. Wapo wapo tu. Kila mmoja anajifanya yeye ni zaidi ya mwenzake.

Wenaonyeshana nani ana sauti zaidi ya mwenzake. Hali hii ni mbaya mno. Maana, wakati wao wakiendelea kulumbana, wapinzani wao wanaitumia nafasi hiyo kujinufaisha, maana siku zote adui yako muombee njaa.

Ndio maana nasema CCM inauliwa na mengi, hivyo ipo haja ya kila mfuasi wa chama hicho, hasa vijana kukaa na kuliangalia hilo kwa mapana. Hatuwezi kuwa na maisha bora kama chama kinachoongoza nchi kinakuwa legelege, ama kinachotawaliwa na migogoro ya kimaslahi kila siku ya Mungu.


Mambo ya aina hiyo, yanasababisha msuaguano hata kwenye baraza la Mawaziri, kwenye ofisi mbalimbali kuwa chungu. Mfano, malumbano ya kimaslahi ya baadhi ya mawaziri wetu, hayawezi kutegua kitendawili cha maisha bora kwa kila Mtanzania. Hali hii ni mbaya mno. Angalia.
Licha ya Waziri Mkuu wa zamani aliyejiuzulu, Edward Lowassa, kutoa wazo la kujenga shule za Kata, lakini leo shule hizo ni kama mtu aliyevaa shati huku sehemu zake za siri zikiwa wazi. Unategemea nini hapo? Mtu gani anaweza kusifia shati zuri lililovaliwa, zaidi ya kucheka kila anapotupa macho yake na kugundua kwamba anayemuangalia hajajistiri?

Hakuna wa kuziendelesha shule hizo, maana anajua fika ni mtaji mkubwa wa kisiasa wa waziri huyo, ambaye kwa hakika bado yupo kwenye kikaango na makundi hasimu ndani ya CCM. Wenyewe wanasema vita ya Urais 2015. Kila mmoja anamsurubu mwenzake kwa faida yake. Pamoja na hayo, Watanzania, hawawezi kukosoa hata yale wenye faida nayo.

Hili la shule za kata, ni kubwa linaloweza kuboresha maisha ya Watanzania, kwa kuhakikisha kwamba watoto wao wanakwenda shule. Ni kwenye shule za kata tu. Nasema hivyo maana wengi wao hawawezi kumudu gharama za shule za binafsi zinazohitaji fedha nyingi.

Wakati hayo yakiendelea, shule za kata zinakabiriwa na changamoto nyingi, ikiwamo uhaba wa walimu, maabara na hata vifaa vingine vya kufundishia watoto wetu. Hapo huwezi kutarajia matokeo mazuri katika shule za kata, zenye maana kubwa na kizazi cha Tanzania, yenye kasumba za kila aina.

Tembelea katika kata, wilaya na mikoa mbalimbali ya Tanzania uone mambo. Hawana upendo. Ubinafsi, umimi ni matokeo ambayo hakika yananiweka CCM mahali pagumu. Haya lazima yasemwe kama kweli tunahitaji kujifanyia marekebisho kwa ajili ya kujiandaa na uchaguzi Mkuu ujao.

Kadri miaka inavyozidi kwenda mbele, ndivyo uchaguzi unavyozidi kuwa mgumu. Idadi kubwa ya vijana wanaona CCM tena sio mahali pao ndio maana wameingia zaidi kwenye vyama vya upinzani. Tena wamevaa upinzani kiasi cha kuwaona wenzao kinyaa, kisa wamebaki kwenye chama tawala.

Hutoa maneno ya kejeli na dharau za aina nyingi, wakiamini chama hicho sio sehemu sahihi na mkombozi wa wanyonge. Tuwaache na mtazamo wao. Lakini, kama wana CCM wenyewe hawatakuwa tayari kwa mabadiliko ama maono ya mbali, hakika hawawezi kufanya lolote katika mabadiliko haya.

Chama kitaanguka, maana wao wenyewe wamekubali kife. Tena wapo watakaotembea kifua mbele, wakijisifia kukiangusha kabla ya kuhamia upande mwingine wakipokelewa kwa shangwe kwa kukamilisha kazi waliyotumwa.

Huo ndio ukweli wa mambo. Kama sio ukweli, basi upo mbali na uongo. Upo wapi ukweli halisi wa muanzilishi wa Chama cha Kijamii (CCJ)? Je, sio kweli kama wengi waliokuwa ndani ya CCM ndio waanzilishi wake? Kama ni kweli, hao unategemea wana mapenzi mema na chama chao, kiasi cha kukiombea mema?


Unafiki wa aina hiyo ndio sumu. Niliwahi kusema katika makala zangu huko nyuma, hasa lile la mfanyabiashara maarufu, Mustafa Sabodo, kumwaga fedha zake kwa Chama cha Demokrasia na Maendeleo (CHADEMA), huku akijifanya ni mwana CCM damu.

Wapo walioniunga mkono na walionitukana ama kuniparua kadri walivyoweza wao hawakukosena. Nakubali kukosolewa kama name ninavyowakosoa wenzangu, maana huo ndio uungwana unaotakiwa katika Dunia ya leo. Yale makundi yasiyokuwa na tija ndani ya chama yakomeshwe, ili kama ni kulia tulie wote.

Na wale ambao wamekosa mapenzi mema na chama chao, ni wakati wao kuondoka, ili wachache wanaobakia wakijenge chama chao. Waswahili wamesema akheri ya ndege mmoja mkonono kuliko ndege kumi mtini.

Kujisifia una wanachama wengi, wakati ni wanafiki, ni wafitina, wazandiki, huko ni kutwanga maji kwenye kinu. Mengi yanasemwa, ila yanamezewa tu. Wapo ambao wametembea kwa furaha mara baada ya Sioi Sumari kukosa

Ubunge katika Uchaguzi Mdogo wa Arumeru Mashariki. Bado hao utawaita ni wana CCM? Kwalipi? Mapenzi yao kwa chama yapo vipi? Hao hao ndio wanaofanya mambo kinyume, wakitoa siri ya chama hadharani kwa ajili ya kujenga mtandao kwa watu, bado nao ni wana CCM?

Inauma sana. Chama sasa kimebaki kama mti mkavu ambao umeliwa ndani na kubaki magome tu. Ni dahiri utaanguka. Kama sio leo basi kesho. Kitu gani cha kuufanya usianguke? Mbona umeshakwisha kwa kuliwa na mchwa watu, usiku na mchana?

Kulisema ama kuliona hili bado kunahitaji elimu ya Chuo Kikuu? Nani anayefurahishwa na hali inayoendelea ndani ya chama? CCM leo imebaki kidogo tu kuanguka. Na wale wenye mapenzi mema ndio watakaoumia, maana wenzao, wale wanafiki watahamia kwenye vyama vyao walivyoanzisha, ama vilivyoanzishwa na wale wanaofanana nao.

Wamebaki wana CCM usoni wakivaa skafu na kofia, wakati mioyoni mwao ni wapinzani wa kutupwa, ndio maana hawapendi kuona wanapatana, wanafanya kazi pamoja. Ni roho ngumu tu, ila hata leo hii, Mwenyekiti wao, Jakaya Kikwete, ambaye pia ni Rais wa Jamhuli ya Muungano wa Tanzania, angeinua mikono juu na kusema ameshindwa.

Anashindwa kufanya hivyo, akikumbuka imani kubwa kwa Watanzania juu yake, hivyo anajipa moyo wa kuendelea na mapambano. Hii ndio Tanzania ya leo. Hii ndiyo CCM ya Muasisi wa Taifa letu, Mwalimu Julius Kambarage Nyerere na kizazi kipya cha leo.

Mbele za watu wanasema kidumu chama cha Mapinduzi, wakati vichochoroni wanasema watajuta kutufahamu. Katika hili, waungwana wamekubali kuiua CCM, wakiona kupo watakapokimbilia. Tukutane wiki ijayo.

kambimbwana@yahoo.com

Mwanamke aliyeacha Jeshi kwa ajili ya sanaa

KELVINA JOHN

Mwanamke aliyeacha Jeshi kwa ajili ya sanaa

WAHENGA walikuwa na semi zao ambazo zilikuwa na maana sana. Kati ya hizo, upo ule wa ‘Umdhaniaye ndiye kumbe siye’, huu unastahili kabisa kupigiwa mfano kwa Kelvina John.

Je, unajua kwa nini mwandishi wa makala haya anatolea mfano wa usemi huo kwa Kelvina? Hiyo ni kutokana na kuamua kuvua gwanda za Jeshi la Wananchi Tanzania  (JWTZ) kwa ajili ya kujikita katika kucheza filamu, fani ambayo anaendeshea maisha yake kwa sasa.

Katika mahojiano, Kelvina alisema uamuzi wake huo ulitokana na uthubutu wake kwa sababu kazi hiyo ya kuwa muigizaji na mtengeneza (Prodyuza) filamu alikuwa akiipenda tangu utoto.

“Maisha ni kujaribu, inakupasa mtu kujaribu na hasa kwa kile unachokipenda na hakika utafanikiwa kwa sababu utakifanya kwa ufanisi wa hali ya juu, ndivyo ilivyojitokeza kwangu na kufikia uamuzi wa kuachana na kazi ya Jeshi na kujikita katika filamu.

“Ingawa nilipata wakati mgumu kuanzia katika Jeshi, lakini namshukuru Mungu hivi sasa nafanya kile ambacho nafsi yangu inapenda na naweza kuendesha maisha yangu kutokana na kazi hii ya kuandaa na kucheza filamu,” ndivyo alivyoanza kuzungumza Kelvina.

Kwa wasiomfahamu vema, Kelvina John ni muandaaji wa filamu (Prodyuza) ambaye alianza kujikita katika fani hiyo mwaka 2000 kwa kuandaa filamu yake ya kwanza kabisa ambayo aliamua kuiita Mtazamo.

Ingawa pia na yeye ni muigizaji, lakini anapenda zaidi kufanya kazi ya uandaaji, kazi ambayo hapa nchini imekuwa ikifanywa zaidi na wanaume  na ndiyo maana upo uwezekano mkubwa kabisa akawa ni mwanamke pekee aliyeamua kujiiingiza katika fani hiyo ya uandaaji.

Pengine ujasiri huo umetokana na kuwa mwajiriwa wa Jeshi la Wananchi (JWTZ) ambaye alihitimu mafunzo na kupewa namba ya kazi 2712MTM na kupangiwa kazi katika kikosi namba 312 KJ Lugalo, kabla ya kuamua kuvua gwanda na kujikita katika filamu.

Katika mahojiano yake na Mtanzania, Kelvina alisema aliamua kuachana na kazi hiyo ya jeshi aliyoifanya kwa uadilifu ili akafanye kazi ya kuandaa na kuigiza filamu kwa sababu ni kitu kilichokuwa moyoni mwake tangu utoto.

“Ki ukweli katika maisha kila mmoja ana jambo ambalo anapenda, kwa sababu siku zote mimi nilikuwa naipenda fani hii, hata nilipokuwa jeshini nilihisi kama bado moyoni mwangu kuna jambo napungukiwa.

“Kwa sababu sikutaka kuidhulumu nafsi, niliamua ‘kusarender’ kazi ya jeshi na kuamua kujikita zaidi katika kuandaa filamu sambamba na kuigiza, kazi ninayoifanya hadi leo inayoniingizia kipato na kufanya nitatue matatizo yangu,” alisema.

Alisema aliamua kujitoa Jeshini mwaka 2003 baada ya kuona kazi yake ya kwanza aliyoandaa mwenyewe ambayo aliiita Mtazamo ikifanya vizuri, hivyo kuona ipo haja kutumia muda zaidi katika fani hiyo.

Kwa sababu inafahamika kazi hiyo ya Jeshi ni ‘bize’ sana kama angeendelea kuifanya, basi asingekuwa na muda wa kutosha kuandaa filamu zake, ndipo alipoamua kujivua gamba.

Mpaka sasa amefanikiwa kuandaa filamu tano, ikiwamo ambayo iko katika mchakato wa mwisho wa maandalizi ambayo inaitwa Leave or Die. Ni filamu ya action iliyowashirikisha mastaa kibao wa fani hiyo na kati yao mbali ya yeye mwenyewe, yupo Anti Fifi, Winter, Shilole na wengine.

Nyingine ambazo Kelvina amekwishatoa ni ile ya Penzi la Baba, Machozi na The Dadaz, ambayo aliitoa mwaka juzi. Aliwataka wanawake kuwa na uthubutu wa maamuzi ya mambo yao ili kufikia ndoto wanazohitaji, kwani hakuna lisiloshindikana endapo utakuwa na nia.

“Naomba wanawake wenzangu waache kubweteka, mimi unavyoniona dada yangu, naendesha maisha yangu kwa kazi hii, kwani imeniwezesha kuwapeleka watoto wangu wawili shule ambao Mungu amenijaalia.

“Na sasa nimeanza ujenzi wa kibanda cha kuishi huko jijini Mwanza, ambako ndiko ninapotokea, hivyo wale wenye mtazamo hasi juu ya kazi hii waachane nao kabisa,”  alisema.

Akizungumzia maisha binafsi nje ya shughuli hizo za uandaaji wa filamu pamoja na kuvua kwake gwanda za Jeshi, Kelvina anasema yeye ni mama wa watoto wa kike wawili aliobahatika kuwapata kati ya miaka minane iliyopita.

Hata hivyo, ilimlazimu kuachana na mumewe ambaye naye alitaka kumtia kiwingu kutokana na kutokubaliana naye kujihusisha na kazi hizo za uandaaji filamu, jambo ambalo hakukubaliana nalo ingawa awali alifanya hivyo.

“Kwa kweli hii ni sehemu ya changamoto katika maisha, namshukuru sana Mungu kuendelea kunipa ujasiri, hasa baada ya kupitia wakati mgumu na kufikia uamuzi wa kuachana na mume wangu ambaye hakuridhia nifanye kazi hii,” alisema.

Kwa sasa anaishi Mbezi jijini Dar es Salaam na ni mtoto wa kwanza katika familia yao ya watoto wanne, huku akiwa ndiye mtoto wa kike pekee. Akizungumzia ushirikiano anaoupata katika familia, alisema hakuna, kwa sababu hawafurahii fani aliyojikita.

“Baba yangu hataki hata kidogo nifanye kazi hii, yeye alitamani sana niwe ‘Air Hostess’ kwani ndiyo fani aliyonipeleka kusoma kabla ya mimi kuikacha na kujiingiza katika Jeshi, ingawa hakuvutiwa nayo sana, lakini aliipenda baada ya kusikia nimehitimu mafunzo na kuajiriwa.

“Nilikuja kumtibua tena nilipoamua kuvua gwanda na kujikita katika filamu. Simlaumu sana kwa sababu najua yeye, familia, ndugu na jamaa bado wana mtazamo hasi wa kazi ninayoifanya, lakini nataka niwaonyeshe kwamba sivyo wanavyofikiria.

“Ndio maana nahitaji kufanya mambo makubwa katika fani hii yatakayonifanya niwe msanii mkubwa ninayetambulika ndani na nje ya nchi na hapo nafikiri wataelewa nini nafanya na sasa nimeishaanza kuwaonyesha, hasa nilipofanikisha kumiliki kampuni yangu ya ‘Production’ ya kazi za filamu inayoitwa KJ Production,” alisema.

Kila kazi inakabiliwa na changamoto mbalimbali. Je, unajua fani hii ya filamu inakabiliwa na changamoto gani?

“Changamoto kubwa tunazokabiliana nazo katika fani hii hapa kwetu ni kama tatu hivi: Sehemu za kuigizia, wasanii wengi ni wasumbufu, hasa baada ya kulewa sifa, hivyo kitu unachotakiwa kufanya siku mbili inaweza kuchukua hata wiki, soko la kazi zetu na tatizo la wizi wa kazi ni kubwa mno, tunaomba Chama cha Hakimiliki (COSOTA) kisimame imara, wasanii tunaumizwa sana hatufaidiki vilivyo,” alisema.

Ushauri wake kwa Serikali, watambue vema umoja wao waliounda unaoitwa Tanzania Films Federation (TAFF) na kuupa nguvu uweze kufanya kazi ipasavyo pengine utasaidia kuzuia wimbi la wizi wa kazi zao.

Lakini kwa upande wa wasanii wenzake, aliomba kujenga tabia ya kuheshimiana, kushirikiana na kuifanya kazi hiyo kwa ufanisi kwa maendeleo yao binafsi na Taifa kwa ujumla. Huyo ndiyo Kelvina John.

xxxxxxMWISHO

 

Serikali izivunje COSOTA na BASATA

JUMATANO ya wiki hii nilikuwa miongoni mwa wadau wa sanaa waliohudhuria kikao cha Kamati ya Huduma za Kudumu ya Bunge la Jamhuri ya Muungano wa Tanzania , kilichoongozwa na Mwenyekiti wake Jenista Mhagama.

 

Kikao hicho kilichohuduriwa pia na wasanii wa aina mbalimbali, kilifanyika katika viungwa vya Baraza la Sanaa la Taifa (BASATA), kikiwa na maana kubwa ya kujadili masuala mbalimbali ya sanaa na wasanii nchini.

 

                                          Waandishi wa habari wakiserebuka.

Kikao hicho kilikuja wakati muafaka. Wakati ambao kwa miaka kadhaa sasa, bado wasanii wamekuwa wakiishi maisha ya kubahatisha huku wengine wakiindelea kuishi maisha mazuri kwa kupitia migongo ya wasanii.

 

Mengi yalisemwa. Wasanii wengi walichangia pamoja na wajumbe ambao ndio wabunge na wageni waarikwa. Inasikitisha sana . Kwani kwa kiasi kikubwa, matatizo mengi yalihjitokeza, huku chanzo chake kikiwa ni BASATA na ndugu zao COSOTA.

 

Hata hao wezi wanaodaiwa kuwapo, ilionekana dhahiri wanabebwa na wakubwa wao, ukizingatia kuwa BASATA ina uwezo wa kuwa wakali kwa ajili ya kuwakomboa watoto wao, yani wasanii ambao kwa Tanzania wanaishi kama omba omba.

 

Licha ya kuwa na vipaji vya hali ya juu, lakini wanachopata ni sifuri. Ni kutokana na hilo , nadiliki kusema kuwa ipo haja ya Serikali, kupitia Wizara yake ya Habari, Vijana, Utamaduni na Michezo, ili kuokoa maisha ya wasanii.

 

Kuvunjwa huko kunatokana na taasisi hizo kushindwa kufanya kazi zake kama inavyotakiwa, licha ya kupewa memo na wasimamizi wa sanaa kwa ujumla. Ndio, ingawa kwa COSOTA wao wanaweza kuyumba na msimamo wa Serikali, yani kuripoti kwa Wizara tofauti, kama ile ya Viwanda na Biashara pamoja na Wizara ya Habari, Vijana, Utamaduni na Michezo.

 

Pamoja na hayo, bado hainifanyi niamini kuwa COSOTA na BASATA wanaweza kukomboa maisha ya wasanii wetu. Kwa sasa uwezo huo hawana. Maana kwa miaka kadhaa wamekuwa wakifanya kazi kwa kuleana zaidi badala ya kusimama kwenye ukweli.

 

Angalia, ukweli huu umedhihirika zaidi, maana viongozi hao wa COSOTA waliweza kuingia mitini, japo walijua kuwa walitembelewa na Serikali yao , iliyowekwa madarakani kihalali, huku ikiongozwa na watu makini.

 

Jamani, hakuna haja ya kulumbana. Hapa hakuna haja ya kuogopana. Kwanini BASATA waachwe na ndugu zao COSOTA? Kwa wale waliokwenda katika mjadala huo watakubaliana na mimi. Malalamiko mengi yalielekezwa kwao.

 

Usimamizi wao ni mdogo zaidi. Kuingizwa katika biashara za kujinyoji hiyo ndio kazi yao , hata kama wanajua hazina umuhimu kwa Watanzania. Kwa mfano, BASATA kuingizwa kwenye tuzo za Kilimanjaro Music Award huo ni umbumbumbu.

 

Tuzo hizo zinayumba. Hazina maana. Wasanii bora wanaachwa na wale wabaya wanapata tuzo. Sasa kwanini washiriki? Hawaoni ni kuwayumbisha Watanzania? Haya ni maswali ambayo majibu yake ni rahisi, endapo viongozi watajivua gamba.

 

Hayo yatakwisha kama viongozi hao watakubali kuwajibika. Moja ya sera ya uongozi bora ni kusimama kwenye ukweli kwa ajili ya manufaa ya watu wako. Inapotokea mambo yanakwenda tofauti, huo ni wizi.

 

Tuuseme hadharani, maana vikao kama hivyo havitakuwa na maana kama yanayojadiliwa yanaachwa na wale wezi kiuendelea kula raha. Inasikitisha mno. COSOTA wao kushiriki kwenye kampeni za mtu mmoja kuna nini ndani yake?

 

Wasanii kuendelea kuibiwa wakati wao wapo inaonyesha wameshindwa kazi. Kuyasema haya ni lazima kwa faida ya kizazi cha sanaa. Kuna haja gani msanii kuimba pasi kupata chochote cha maana?

 

Kwanini maisha yake ya sanaa asiyatumie kwenye kilimo? Nadhani hili la kuvunjwa kwa mabaraza hayo na kupewa kazi watu wengi wengine kutachangia kwa kiasi kikubwa kuibua ari ya utendaji kwa wasanii na wasimamizi wao.

 

Ikumbukwe kwamba sanaa ni kazi na inaweza kuleta utajiri mkubwa kwa Taifa. Nchi za wenzetu wao wanafanikiwa kwa kupitia ulingo huo wa sanaa. Ndio, maana nasema katika majumuisho ya kikao hicho, ipo haja ya viongozi waliopo wa BASATA na ndugu zao COSOTA wawekwe pembeni kama wameshindwa wenyewe kuwajibika.

 

Huu sio wakati wa kuoneana haya. Tusimame kwenye ukweli na hapana shaka, Jenista Mhagama, mwenyekiti wa kamati hiyo ya Huduma za Jamii pamoja na Waziri wa Habari, Vijana, Utamaduni na Michezo watapata dawa hiyo kwa manufaa ya Taifa.

 

Mungu ibariki Tanzania

Mungu wabariki wasanii wetu

 

kambimbwana@yahoo.com

0712 053949

0753 806087