Chaguzi za ndani zikibebe Chama Cha Mapinduzi

MGODI UNAOTEMBEA

Na Kambi Mbwana, Dar es Salaam

KATIKA mikoa mbalimbali ya Tanzania, kumekuwa kukiendelea na chaguzi za ndani za Chama cha Mapinduzi CCM na kushuhudia majina kadhaa yakigonga vichwa vya watu wengi.

Chaguzi hizo zimeanza siku chache baada ya Mwenyekiti wake, Jakaya Mrisho Kikwete, kuwapasha wabaya wao kuwa chama hicho hakiwezi kufa, hasa kwa wanachama wao kujitokeza kwa wingi kuwania nafasi mbalimbali za chama hicho.

                                          Jakaya Kikwete, Mwenyekiti wa CCM

Nafasi kama vile Mwenyekiti wa Mkoa, Wilaya, Katibu, Mweka Hazina katika ngazi mbalimbali, pamoja na Mjumbe wa NEC Taifa.

Hizi ni nafasi zilizoombwa kwa wingi mno na kuonyesha jinsi chama hicho kinavyoendelea kuungwa mkono na wanachama wengi, ingawa baadhi ya wapinzani wanaona chama hakina mashiko na kinajichimbia kaburi.

Ni matokeo mazuri mno. Kila mtu anayapenda kwa wale wenye mapenzi mema na chama chao kinachojiweka katika umahiri wa aina yake na kushindana na vyama vinavyoendelea kuzaliwa kila siku na kuungwa mkono na watu wake.

Kama idadi ya watu walioomba kuteuliwa kugombea nafasi hizo zimeongezeka, kwanini waseme chama kimekufa?

Hata hivyo wahenga walisema lisemwalo lipo. Na katika kuwasikiliza wadau hao, lazima ukweli usemwe na juhudi ziwekwe kama tahadhari ya kukijenga chama.  Je, chaguzi hizo za ndani zina manufaa na chama?

Je, wale walioenguliwa katika nafafsi hizo wamekubali matokeo au ndio wanaanza kujenga matawi yao kwa ajili ya kukihujumu chama chao? Vipi wale walioshindwa katika chaguzi hizo, je wamekuabali kuwa hayo ni matokeo ya kawaida?

Hili linapaswa kueleweka vizuri. Leo wenye chama chao wanaweza kufurahia kuwa chama bado kinapendwa, lakini wachache wao wakawa tofauti. Kwa mfano, Waziri Mkuu wa zamani, Fredrick Sumaye ameshindwa nafasi ya Mjumbe wa Halmashauri Kuu ya Taifa (NEC), kupitia Wilaya ya Hanang, Mkoa wa Manyara.

Sumaye ameshindwa mbele ya mwanasiasa mwenzake wa CCM, Dk. Mary Nagu, ambaye pia Mbunge wa Jimbo la Hanang na Waziri wa Nchi, Ofisi wa Rais, Uwekezaji na Uwezeshaji.

Uchaguzi huo ni kati ya ile inayochanganya vichwa vya watu wengi, ukizingatia kwamba chaguzi za ndani za CCM zimekuwa na matokeo magumu na joto la ushindani kwa kila mgombea na yule anayepiga kura.

Haijulikani kwanini chaguzi za chama hicho ni ngumu. Labda ni kwasababu wanaopiga kura ni wenye kufanana itikadi, ingawa kwenye malengo hutofautiana kwa kiasi kikubwa.

Kujuana au kurubuniwa kwa rushwa nako ni hatua ngumu kwa chama chao. Ingawa rushwa hukumewa na kila mtu, lakini sio sababu ya kuamini kuwa kichocheo hicho ndani ya chaguzi kimeachwa.

Kikwete alitahadharisha kuwa yoyote atakayebainika anatoa rushwa kwenye uchaguzi huo, hatachekewa, akiwa na maana ya wagombea wote kuacha kutumia rushwa.

Wakati Kikwete anasema hivi, wale wagombea na wapiga kura wao wanapaswa kuwa na uzalendo na chama chao. Wao wasipokuwa makini, uwepo wao hauwezi kuwa na manufaa zaidi ya kukibomoa chama chao.

Wafanye siasa zenye mashiko na mvuto kwa kila mmoja wetu. Wawe kioo cha jamii ndani ya chama au nje ya chama. Wasifanye siasa za kujionyesha mbele ya hadhira, huku malengo halisi, yakiwamo kutetea maslahi ya chama yakiwa adimu.

Kila mgombea au kiongozi wa chama lazima avae uhusika na kukitetea chama chake mbele ya wapiga porojo wengine, hasa waliokuwa upande wa upinzani.

Kama Chama Cha Demokrasia na Maendeleo (Chadema), kinahaha kufanya mikutano yao mikoani kujenga chama chao, kwanini hawa wa CCM wakae hadi Uchaguzi Mkuu.

Chadema wanatamba na kauli mbiu zao, Dira ya Mabadiliko Movement for Change (M4C), wakati Chama cha Wananchi (CUF) wamekuja na kauli mbiu yao ya (Vision for Change) (V4C), tena wakianzia harakati zao hizo katika ngome ya Chadema, jijini Arusha.

Baada ya kuibuka hayo, Chadema na CUF walianza kurushiana makombora wakisema kuwa chama hicho kimedandia hoja na mwelekeo wao, ingawa CUF nao baadaye walijibu kwa kusema wao ndio waasisi wakubwa.

Kwa mujibu wa CUF, mwaka 2008 na kuiweka rasmi kwenye ilani ya Uchaguzi ya mwaka 2010, hivyo yoyote anayefikiri kuwa hoja yao imetoka Chadema wanajidanganya.

Sitaki kusema nani mkweli kati ya Chadema na CUF, ila hizo ni changamoto nzuri za siasa za Tanzania, zinazoongozwa na CCM iliyokaa madarakani kwa miaka mingi, tangu Taifa hili lilipopata Uhuru wake mwaka 1961.

CCM wala isisononeshwe na vuguvugu la mabadiliko kwa Chadema na CUF, au hata vyama vingine navyo vikifuata nyayo hizo kwa ajili ya kuwapatia elimu ya uraia Watanzania na kuleta ushindani katika Uchaguzi Mkuu utakaofanyika mwaka 2015.

Kikubwa kinachotakiwa kufanywa na hao wana CCM ni kukubali kujifunza kutokana na makosa, sambamba na lengo la kuendelea kukaa madarakani kwa kufanyia kazi kero za Watanzania.

Kwa siku za hivi karibuni, Serikali inayoongozwa na CCM, chini ya Kikwete, imekuwa ikifanyia kazi kero hizo, zikiwamo za usafiri, jambo linalowafanya watu waanze kuamini huenda mambo yakawa mazuri katika siku za usoni.

Haya yakiendelezwa na kubuniwa  miradi mingine ya maendeleo, watu wataichukia CCM kwa mambo mengine, likiwamo hilo la ukongwe wake.

Katika kulijua hilo, ni jukumu la kila kiongozi wa CCM, kijana au mzee, mwanamke au mwanaume kufanya kazi kwa ajili ya chama chake.

Najua mapungufu kwa baadhi ya waliochaguliwa au kupitishwa kuwania nafasi hizo haziwezi kukosekana, lakini kama wenyewe wanajua hilo wanaweza kuyafanyia kazi, ndio maana kamati ziliona wanafaa wagombee nafasi hizo.

Watu kama vile Amos Makalla, Juma Nkamia, Mwita Gachuma na wengineo ni kati ya wale waliofanikiwa kushinda katika nafasi walizoomba mwaka huu.

Makalla ambaye pia ni Naibu Waziri wa Habari, Utamaduni na Michezo, ameshinda Mjumbe wa NEC Taifa, kupitia Wilaya ya Mvomero, wakati Nkamia, ameshinda kwa Wilaya ya Nchemba.

Ukiangalia kwa haraka, utagundua kuwa wanachama wengi na wenye majina makubwa wameshindwa katika chaguzi hizo, hivyo wasipokuwa na moyo wa subira, wataongeza idadi ya makundi hasimu ndani ya CCM.

Kila mmoja akisema aumizwe na kuanguka kwake, hali ya mambo ndani ya CCM itakuwa tete, hivyo kukipasua zaidi katika uchaguzi Mkuu ujao. Hakuna anayebisha kuwa waliochaguliwa leo, ndio watakaoibeba au kukiangusha chama mwaka 2015.

Wakifanya siasa zenye tija na malengo ya dhati, sidhani kama chama kitaanguka, hasa kama wakikubali matokeo na kuwabeba kila anayetajwa na chama, iwe kwenye nafasi ya Urais, Ubunge, Udiwani au Uenyekiti wa Serikali za Mitaa.

Najua yapo machungu makubwa ya kuachwa au kushindwa bila sababu za msingi, lakini ifikie wakati wanachama wote wawe kitu kimoja. Kwa mujibu wa Kikwete, sio kila mmoja wao anaweza kuwa kiongozi ndani ya CCM.

Walioachwa au watakaoshindwa katika chaguzi zinazoendelea ndani ya chama, wote wawe kitu kimoja na kuleta ushirikiano kwa ajili ya kukiweka chama chao katika mazingra mazuri ya ushindi na kuonyesha kuwa bado wanakubalika.

Haya yatatimia kama wote wakiwa kitu kimoja na kuacha zile siasa za kupakana matope, kutukanana au kurushiana makombora yasiyokuwa na msingi wowote. Kunyukana kwao, ni hasara kwa chama chao na kuvipa kiburi cha majigambo vyama vya upinzani vinavyotembea kwa matao kwa kuona uwezo wa kufanya lolote kwa Watanzania wanao.

Vyama ambavyo vimekuzwa na Serikali ya CCM, vinavyokula ruzuku za Watanzania, huku vikiwa na jeuri kubwa au uchu wa kushika dola, ingawa katika harakati zao hizo, wanaweka mbele maslahi yao na kuacha moyo wa uzalendo nyuma, hali inayoweza kuleta vurugu kubwa kama kila mmoja atakuwa na uchu wa kushika dola.

Huo ndio ukweli. Kila mmoja wetu aujuwe na kuufanyia kazi, wakiwamo washindi au washindwa katika chaguzi za ndani za CCM zinazoendelea kutimua vumbi katika mikoa mbalimbali ya Tanzania na kuleta vicheko na vilio kwa wenye nia ya kuwa viongozi wa chama hicho, kama mwanzo wa kuweka dira ya kushika nafasi kubwa zaidi iwe kwenye chama au serikali.

kambimbwana@yahoo.com

0712 053949

0753 806087

Mwisho

Ukiona uchafu, huwezi kumuenzi mwenzi wako

MAMBO FULANI MUHIMU

Na Kambi Mbwana, Dodoma

MAPENZI ni jambo ambalo linaleta hisia mbili tofauti. Mosi; mapenzi yanaweza kukufanya uishi kwa raha kama mfalme. Pili, mapenzi hayo yakibadilika hukufanya uwe kama chizi.

Jambo hilo zuri linalofananishwa na sukari kwa yaliyowakalia vizuri, hubadilika na kuwafanya baadhi yao waone ugumu wa kuendelea kuishi, maana wanaowapenda wanawasumbua kwa kiasi kikubwa.

Ni kutokana na hilo, jamii inashauriwa kuwa makini katika suala hilo. Wasijaribu kukurupuka na kuchukua uamuzi wenye mashaka kwa namna moja ama nyingine, maana vinginevyo watatamani kujinyonga.

                                                     Kambi Mbwana

Hata hivyo, pamoja na yote hayo, lakini inajulikana wazi wazi kuwa dawa kubwa katika uhusiano wa kimapenzi ni kumfikisha mwenzako, kumuweka katika kilele cha ubora katika ulimwengu wa mapenzi.

Katu usiangalie umbo lako, sura yako katika kujigamba kwamba unaweza kupendwa na yoyote, wakati ni mzigo kitandani. Kama huna ujuzi katika suala la mapenzi, ondoa kupendwa, kuhitajiwa au kugandwa na yoyote.

Zaidi ya hapo, wachache wao watakupitia na kuchukua hamsini zao, maana huna ujanja wa kumuweka mwenzako katika furaha. Hivyo basi, ili jamii iwe kwenye ramani nzuri na furaha ya mapenzi, lazima tuwajulie watu wetu.

Tufahamu namna ya kuwachanganya kisaikolojia, bila kuangalia uzuri wetu, fedha zetu, maana hizo haziwezi kufanya penzi liwe na amani.

Wapo ambao wanaishi na wanaume wenye nazo kupita kiasi, lakini bado wake zao, wachumba zao au wapenzi wao wanajiingiza katika uhusiano na watu wa kawaida, wakiwamo wafanyakazi wa ndani.

Hata hivyo haitoshi, wapo pia wakina mama wenye nazo lakini wanachanganywa na wasichana wa kawaida, wenye sura za kawaida au hadhi za kawaida. Wenye mali zao wanalia na kusaga meno.

Wanasema“Hivi kwani mume wangu unatembea na yule mfanyakazi wa ndani wakati mimi nipo” Au sielewi unachofuata kwa yule kijana mchunga mbuzi wakati mimi nipo, tena mwenye fedha za kutosha tu”

Kama wewe ni miongoni mwa watu wenye mtazamo huo umeliwa. Fedha sio kila kitu katika mapenzi. Fedha zako usipoangalia zinaweza kuwanufaisha wapita njia, wajuzi wa mambo kwenye mambo fulani muhimu.

Huo ndio ukweli wa mambo. Mjuzi huyo hatafutwi ili mradi mtu ana mtu wa nje, ila umuhimu wake unakuja anapokuwa kwenye ulingo. Hayo lazima mimi na wewe tuyajuwe kwa ajili ya mapenzi yetu.

Unapokuwa na mpenzi wako, mume au mke wako lazima ujuwe yupo na wewe kwa ajili ya kujenga maisha ya wawili. Ili mwenzako afurahie uwepo wako, hakikisha kuwa walau unatumia muda wako hata kama kidogo kumridisha kimapenzi.

Kwa wale ambao kwa miaka mingi wameishi na wapenzi wao bila kutumia ujuzi wao, waanze leo. Na wale wanaoingia kwenye uhusiano leo, pia wawaangalie watu wao, namna gani walivyo na wanastahili aina gani ya mapenzi.

Ninaposema mapenzi, sio yale ya kukaa pamoja, kutembea pamoja au kumpigia simu kila baada ya dakika kumi. Mapenzi, tendo la ndoa lenye ujazo mkubwa linalostawisha uhusiano wa wawili wapendanao.

Hivyo basi tuwe makini katika kazi hiyo. Tukitaka kuwapa raha kweli wenzetu lazima tuache kazi na kufanya kazi. Tendo la ndoa sio mchezo mdogo. Sio kama kuwasha njiti ya kibiriti mahala palipotulia.

Inahitaji kusumbua akili na kusumbua pia mwili wako. Sina maana kama nataka muda wote muwe kwenye tendo la ndoa, ila mnapotaka kufunja amri hiyo ya sita, basi mfikishe mwenzako kileleni.

Usimchezee chezee tu ukamuacha. Nimeamua kuandika mada haya maana nimepata malalamiko mengi kutoka kwa wanawake. Baadhi ya wasomaji wangu, wamenipasha kwamba waume zao ni watu wa kwenda raundi moja halafu wanaangalia ukutani.

Kwa bahati mbaya, watu hao wanapolala uzungu wa nne, wanakuwa wanawanyanyasa wenzao, kama unavyojua tena gari linapowaka. Hali hiyo inakera kiasi cha kutamani wapiti njia.

Haya nayasema kwa uchungu, maana usaliti mwingi huibuka kama wawili wapendanao hawaridhishani. Kama unaona huna ujuzi wa kumuweka katika kilele mwenzako, tafuta msaada kwa watu.

Kabla ya kuendelea, niseme tu kutokana na aina ya gazeti lako la Mtanzania, tunashindwa kuandika kiundani zaidi mada za mapenzi, badala yake tunakuwa wepesi kujibu maswali yenu kwa kupitia simu au barua pepe.

Tunafanya hivyo baada ya kugundua kwamba watoto wengi nao hujifunza kinachoandikwa kwenye gazeti, jambo linalonifanya niandike kwa kuficha au yale yasiyokuwa ya ndani zaidi.

Tukutane wiki ijayo.

kambimbwana@yahoo.com

0712 053949

0753 806087

Mwisho

Fiesta ilivyowapagawisha Dodoma na Morogoro

                          FIESTA 2012 DODOMA NA MOROGORO

                                                       AT akiwajibika jukwaani

                                               Linah Sanga, akifanya mambo

                                          Shetta akifanya mambo jukwaaani.

 

Na Kambi Mbwana, Dar es Salaam

MASHABIKI wa muziki wa mkoani Dodoma, Septemba 14, walipata burudani za aina yake katika Uwanja wa Jamhuri, lilipofanyika tamasha la Fiesta 2012, lilioanza kutimua vumbi mapema mwezi uliopita, mkoani Kilimanjaro.

Mbali na Dodoma, tamasha hilo pia liliendelea katika Uwanja wa Jamhuri mjini Morogoro, Jumapili ya Septemba 16, huku mashabiki wao wakibaki na hara mtindo mmoja kutokana na tamasha hilo.

Wasanii ambao walitoa burudani katika tamasha la Dodoma na Morogoro ni pamoja na Recho, Dayna, Linah, Mwana FA, Godzilla, Shetta, Stamina, AT, Juma Nature, Diamond, Rich Mavoco na Ben Pol.

Mbali na wasanii hao wanaokubalika hapa nchini, pia wasanii wachanga kama kawaida walianza kutoa burudani katika uwanja huo wa Jamhuri Dodoma, ikiwa ni utangulizi wa tamasha hilo na kiu ya kuibua wasanii wapya.

Burudani hizo zilianza jioni kwa wasanii wachanga kupanda jukwaani kutangaza vipaji vyao katika tamasha linaloingiza watu wengi kwa wakati mmoja, jambo ambalo linasababisha uwanja kujaa pande zote.

Kila msanii mchanga wa Morogoro na Dodoma, walikuwa na shauku ya kufanya vyema kwa kuimba nyimbo moja nzuri, ikiwa ni dalili njema ya kutangaza cheche zao kwa wadau wao katika uwanja huo.

Mara baada ya kumaliza kwa taratibu za burudani za wasanii wachanga, moto ulianza kwa kuwapa nafasi washindi watatu wa Super Nyota, wakiongozwa na Young Killer, mwimbaji mdogo mwenye makali ya kutisha.

Wasanii hao wamewekwa katika tamasha hilo kama sehemu ya kuonyesha cheche zao, baada ya kupatikana katika shindano la kusaka vipaji, ikiwa pia ni utangulizi wa ufunguzi wa tamasha hilo la Fiesta.

Baada ya kumaliza kwa wasanii hao watatu wa Super Nyota, msanii aliyeibukia mkoani Morogoro na wimbo wake ‘Mafungu ya Nyanya’, Mwanaisha Said, maarufu kwa jina la ‘Dayna’ alipanda jukwaani akifanya vitu vya aina yake.

Dayna kwanza aliwatanguliza madansa wake walioingia jukwaani kwa mbwembwe za aina yake, wakicheza na kujipanga kishujaa na kupandisha Bendera ya Taifa ya Tanzania, wakifuatiwa na kupiga wimbo wa Taifa.

Wakati wanakatisha kuimba wimbo huo, Dayna alipanda jukwaani, akisababisha shangwe kwa mashabiki wengi uwanjani hapo, wakifurahia alivyojipanga katika shoo yake kwenye tamasha hilo.

Alipomaliza kuimba nyimbo zake, ukiwamo ule wa Mafungu ya Nyanya, Nivute Kwako na nyinginezo, mwanadada huyo alishuka na kupanda jukwaani kwa msichana kutoka Tanzania House of Talents (THT), Reyker, akifuatiwa na Rehema Sundi pamoja na Recho, anayetamba na wimbo wake wa Kizunguzungu, Upepo na huu wa Nashukuru Umerudi unaofanya vizuri kwa sasa.

Recho anatamba katika chati za muziki kutokana na umahiri wake wa kushambulia jukwaa, huku akitokea kwenye taasisi hiyo ya kulea na kukuza muziki ya THT, iliyoibua wasanii wengi wenye uwezo wa kutisha.

Mara baada ya mwanadada huyo kumaliza kuimba, alimuachia Ommy Dimpozi kuendelea kushusha burudani. Hata hivyo, Ommy ni kama alipanda kwa mkosi, maana umeme ulisumbua kwa dakika kadhaa.

Cha kushangaza ni kwamba, licha ya umeme kusumbua uwanjani hapo kwa dakika kadhaa, lakini Ommy aliendelea kushangiliwa na wadau kuimba kama kawaida, hivyo kuonyesha kuwa msanii huyo anakubalika kupita kiasi.

Kitendo cha kumaliza kuimba kwa mkali huyo aliyeacha historia mkoani Dodoma, alipanda jukwaani Rich Mavoco, akifuatiwa na Stamina, msanii aliyetingisha uwanja mzima kwenye shoo hiyo.

Wasanii wengine waliofuata kutoa burudani katika tamasha hilo ni Shetta, Ben Pol, Linah, Mwana FA, aliyesindikizwa na AY, ambaye hata hivyo hakuwa kwenye ratiba ya kupanda jukwaani kutoa burudani.

Msanii ambaye pia atakumbukwa ni AT aliyepanda jukwaani mara baada ya kushuka wakali wa Hip Hop na R&B Ben Poli, yeye alipanda jukwaani na kuwashawishi mashabiki wamsikilize na kucheza nyimbo zake.

Wengi katika shoo kubwa kama hizo hushindwa kuwafanya watu wacheze, hasa hawa wa mduara kama AT, anayetokea mjini Zanzibar.

Shoo ya Dodoma ilimalizwa na Juma Nature usiku wa manane, baada ya kumaliza wakali wote, akiwamo Godzilla, mkali mwenye maskani yake mitaa ya Salasala.

Utaratibu kama huo ulionekana pia katika mji wa Morogoro, ambapo mashabiki wengi walionekana kupagawa kabla ya shoo hiyo wakiwachekea wasanii na kujipanga kwa ajili ya kuingia kwenye shoo hiyo.

Hata hivyo, mashabiki walipoingia kwenye uwanja huo wa Jamhuri mjini Morogoro, walikuwa wazito sana kucheza na kupagawa kama ilivyokuwa kwa wakazi na mashabiki wa mkoani Dodoma.

Fiesta inaandaaliwa na Kampuni ya Prime Time Promotion pamoja na Clouds Media Group, likifanyika kila mwaka. Kwa mwaka huu, Fiesta ilianza kutimua vumbi katika mji wa Moshi, mkoani Kilimanjaro.

Katika kila mkoa wanapofanya shoo hiyo, kunatanguliwa na kazi za kijamii, ikiwamo kutembelea vituo vya watoto yatima na kuwapa misaada ya aina mbalimbali pamoja na kupata fursa ya kubadilishana nao mawazo.

Kwa mkoa wa Dodoma, wasanii na waandaaji wa tamasha hilo walitembelea kituo cha watoto yatima kinachojulikana kama Kijiji Cha Matumaini, kilichoanzishwa rasmi mwaka 2002.

Usiku wa shoo hiyo ulifunguliwa na Mkuu wa Mkoa, Rehema Nchimbi, wakati ile ya Morogoro ilihudhuliwa pia na Mkuu wa Mkoa wake, Joel Bendera, ambapo pia wakuu hao husisitiza suala la amani kwa tamasha hilo.

Mikoa iliyofuata kwa burudani hiyo ni pamoja na Tanga, Musoma mkoani Mara, Shinyanga, Mwanza, Dodoma, Morogoro, huku wiki hii likipangwa kufanyika jana Ijumaa katika mkoa wa Mbeya, wakati kesho Jumapili tamasha hilo pia litafanyika mkoani Iringa, Uwanja wa Samora.

kambimbwana@yahoo.com

0712 053949

0753 806087

Mwisho

Na Kambi Mbwana, Dar es Salaam
HALI ndani ya Chama cha Mapinduzi CCM, inazidi kuwa mbaya, kutokana na baadhi ya wanachama na viongozi wake, kushindwa kuwekana sawa katika kipindi hiki kigumu. Wapo wapo tu. Kila mmoja anajifanya yeye ni zaidi ya mwenzake.

Wenaonyeshana nani ana sauti zaidi ya mwenzake. Hali hii ni mbaya mno. Maana, wakati wao wakiendelea kulumbana, wapinzani wao wanaitumia nafasi hiyo kujinufaisha, maana siku zote adui yako muombee njaa.

Ndio maana nasema CCM inauliwa na mengi, hivyo ipo haja ya kila mfuasi wa chama hicho, hasa vijana kukaa na kuliangalia hilo kwa mapana. Hatuwezi kuwa na maisha bora kama chama kinachoongoza nchi kinakuwa legelege, ama kinachotawaliwa na migogoro ya kimaslahi kila siku ya Mungu.


Mambo ya aina hiyo, yanasababisha msuaguano hata kwenye baraza la Mawaziri, kwenye ofisi mbalimbali kuwa chungu. Mfano, malumbano ya kimaslahi ya baadhi ya mawaziri wetu, hayawezi kutegua kitendawili cha maisha bora kwa kila Mtanzania. Hali hii ni mbaya mno. Angalia.
Licha ya Waziri Mkuu wa zamani aliyejiuzulu, Edward Lowassa, kutoa wazo la kujenga shule za Kata, lakini leo shule hizo ni kama mtu aliyevaa shati huku sehemu zake za siri zikiwa wazi. Unategemea nini hapo? Mtu gani anaweza kusifia shati zuri lililovaliwa, zaidi ya kucheka kila anapotupa macho yake na kugundua kwamba anayemuangalia hajajistiri?

Hakuna wa kuziendelesha shule hizo, maana anajua fika ni mtaji mkubwa wa kisiasa wa waziri huyo, ambaye kwa hakika bado yupo kwenye kikaango na makundi hasimu ndani ya CCM. Wenyewe wanasema vita ya Urais 2015. Kila mmoja anamsurubu mwenzake kwa faida yake. Pamoja na hayo, Watanzania, hawawezi kukosoa hata yale wenye faida nayo.

Hili la shule za kata, ni kubwa linaloweza kuboresha maisha ya Watanzania, kwa kuhakikisha kwamba watoto wao wanakwenda shule. Ni kwenye shule za kata tu. Nasema hivyo maana wengi wao hawawezi kumudu gharama za shule za binafsi zinazohitaji fedha nyingi.

Wakati hayo yakiendelea, shule za kata zinakabiriwa na changamoto nyingi, ikiwamo uhaba wa walimu, maabara na hata vifaa vingine vya kufundishia watoto wetu. Hapo huwezi kutarajia matokeo mazuri katika shule za kata, zenye maana kubwa na kizazi cha Tanzania, yenye kasumba za kila aina.

Tembelea katika kata, wilaya na mikoa mbalimbali ya Tanzania uone mambo. Hawana upendo. Ubinafsi, umimi ni matokeo ambayo hakika yananiweka CCM mahali pagumu. Haya lazima yasemwe kama kweli tunahitaji kujifanyia marekebisho kwa ajili ya kujiandaa na uchaguzi Mkuu ujao.

Kadri miaka inavyozidi kwenda mbele, ndivyo uchaguzi unavyozidi kuwa mgumu. Idadi kubwa ya vijana wanaona CCM tena sio mahali pao ndio maana wameingia zaidi kwenye vyama vya upinzani. Tena wamevaa upinzani kiasi cha kuwaona wenzao kinyaa, kisa wamebaki kwenye chama tawala.

Hutoa maneno ya kejeli na dharau za aina nyingi, wakiamini chama hicho sio sehemu sahihi na mkombozi wa wanyonge. Tuwaache na mtazamo wao. Lakini, kama wana CCM wenyewe hawatakuwa tayari kwa mabadiliko ama maono ya mbali, hakika hawawezi kufanya lolote katika mabadiliko haya.

Chama kitaanguka, maana wao wenyewe wamekubali kife. Tena wapo watakaotembea kifua mbele, wakijisifia kukiangusha kabla ya kuhamia upande mwingine wakipokelewa kwa shangwe kwa kukamilisha kazi waliyotumwa.

Huo ndio ukweli wa mambo. Kama sio ukweli, basi upo mbali na uongo. Upo wapi ukweli halisi wa muanzilishi wa Chama cha Kijamii (CCJ)? Je, sio kweli kama wengi waliokuwa ndani ya CCM ndio waanzilishi wake? Kama ni kweli, hao unategemea wana mapenzi mema na chama chao, kiasi cha kukiombea mema?


Unafiki wa aina hiyo ndio sumu. Niliwahi kusema katika makala zangu huko nyuma, hasa lile la mfanyabiashara maarufu, Mustafa Sabodo, kumwaga fedha zake kwa Chama cha Demokrasia na Maendeleo (CHADEMA), huku akijifanya ni mwana CCM damu.

Wapo walioniunga mkono na walionitukana ama kuniparua kadri walivyoweza wao hawakukosena. Nakubali kukosolewa kama name ninavyowakosoa wenzangu, maana huo ndio uungwana unaotakiwa katika Dunia ya leo. Yale makundi yasiyokuwa na tija ndani ya chama yakomeshwe, ili kama ni kulia tulie wote.

Na wale ambao wamekosa mapenzi mema na chama chao, ni wakati wao kuondoka, ili wachache wanaobakia wakijenge chama chao. Waswahili wamesema akheri ya ndege mmoja mkonono kuliko ndege kumi mtini.

Kujisifia una wanachama wengi, wakati ni wanafiki, ni wafitina, wazandiki, huko ni kutwanga maji kwenye kinu. Mengi yanasemwa, ila yanamezewa tu. Wapo ambao wametembea kwa furaha mara baada ya Sioi Sumari kukosa

Ubunge katika Uchaguzi Mdogo wa Arumeru Mashariki. Bado hao utawaita ni wana CCM? Kwalipi? Mapenzi yao kwa chama yapo vipi? Hao hao ndio wanaofanya mambo kinyume, wakitoa siri ya chama hadharani kwa ajili ya kujenga mtandao kwa watu, bado nao ni wana CCM?

Inauma sana. Chama sasa kimebaki kama mti mkavu ambao umeliwa ndani na kubaki magome tu. Ni dahiri utaanguka. Kama sio leo basi kesho. Kitu gani cha kuufanya usianguke? Mbona umeshakwisha kwa kuliwa na mchwa watu, usiku na mchana?

Kulisema ama kuliona hili bado kunahitaji elimu ya Chuo Kikuu? Nani anayefurahishwa na hali inayoendelea ndani ya chama? CCM leo imebaki kidogo tu kuanguka. Na wale wenye mapenzi mema ndio watakaoumia, maana wenzao, wale wanafiki watahamia kwenye vyama vyao walivyoanzisha, ama vilivyoanzishwa na wale wanaofanana nao.

Wamebaki wana CCM usoni wakivaa skafu na kofia, wakati mioyoni mwao ni wapinzani wa kutupwa, ndio maana hawapendi kuona wanapatana, wanafanya kazi pamoja. Ni roho ngumu tu, ila hata leo hii, Mwenyekiti wao, Jakaya Kikwete, ambaye pia ni Rais wa Jamhuli ya Muungano wa Tanzania, angeinua mikono juu na kusema ameshindwa.

Anashindwa kufanya hivyo, akikumbuka imani kubwa kwa Watanzania juu yake, hivyo anajipa moyo wa kuendelea na mapambano. Hii ndio Tanzania ya leo. Hii ndiyo CCM ya Muasisi wa Taifa letu, Mwalimu Julius Kambarage Nyerere na kizazi kipya cha leo.

Mbele za watu wanasema kidumu chama cha Mapinduzi, wakati vichochoroni wanasema watajuta kutufahamu. Katika hili, waungwana wamekubali kuiua CCM, wakiona kupo watakapokimbilia. Tukutane wiki ijayo.

kambimbwana@yahoo.com

Mwanamke aliyeacha Jeshi kwa ajili ya sanaa

KELVINA JOHN

Mwanamke aliyeacha Jeshi kwa ajili ya sanaa

WAHENGA walikuwa na semi zao ambazo zilikuwa na maana sana. Kati ya hizo, upo ule wa ‘Umdhaniaye ndiye kumbe siye’, huu unastahili kabisa kupigiwa mfano kwa Kelvina John.

Je, unajua kwa nini mwandishi wa makala haya anatolea mfano wa usemi huo kwa Kelvina? Hiyo ni kutokana na kuamua kuvua gwanda za Jeshi la Wananchi Tanzania  (JWTZ) kwa ajili ya kujikita katika kucheza filamu, fani ambayo anaendeshea maisha yake kwa sasa.

Katika mahojiano, Kelvina alisema uamuzi wake huo ulitokana na uthubutu wake kwa sababu kazi hiyo ya kuwa muigizaji na mtengeneza (Prodyuza) filamu alikuwa akiipenda tangu utoto.

“Maisha ni kujaribu, inakupasa mtu kujaribu na hasa kwa kile unachokipenda na hakika utafanikiwa kwa sababu utakifanya kwa ufanisi wa hali ya juu, ndivyo ilivyojitokeza kwangu na kufikia uamuzi wa kuachana na kazi ya Jeshi na kujikita katika filamu.

“Ingawa nilipata wakati mgumu kuanzia katika Jeshi, lakini namshukuru Mungu hivi sasa nafanya kile ambacho nafsi yangu inapenda na naweza kuendesha maisha yangu kutokana na kazi hii ya kuandaa na kucheza filamu,” ndivyo alivyoanza kuzungumza Kelvina.

Kwa wasiomfahamu vema, Kelvina John ni muandaaji wa filamu (Prodyuza) ambaye alianza kujikita katika fani hiyo mwaka 2000 kwa kuandaa filamu yake ya kwanza kabisa ambayo aliamua kuiita Mtazamo.

Ingawa pia na yeye ni muigizaji, lakini anapenda zaidi kufanya kazi ya uandaaji, kazi ambayo hapa nchini imekuwa ikifanywa zaidi na wanaume  na ndiyo maana upo uwezekano mkubwa kabisa akawa ni mwanamke pekee aliyeamua kujiiingiza katika fani hiyo ya uandaaji.

Pengine ujasiri huo umetokana na kuwa mwajiriwa wa Jeshi la Wananchi (JWTZ) ambaye alihitimu mafunzo na kupewa namba ya kazi 2712MTM na kupangiwa kazi katika kikosi namba 312 KJ Lugalo, kabla ya kuamua kuvua gwanda na kujikita katika filamu.

Katika mahojiano yake na Mtanzania, Kelvina alisema aliamua kuachana na kazi hiyo ya jeshi aliyoifanya kwa uadilifu ili akafanye kazi ya kuandaa na kuigiza filamu kwa sababu ni kitu kilichokuwa moyoni mwake tangu utoto.

“Ki ukweli katika maisha kila mmoja ana jambo ambalo anapenda, kwa sababu siku zote mimi nilikuwa naipenda fani hii, hata nilipokuwa jeshini nilihisi kama bado moyoni mwangu kuna jambo napungukiwa.

“Kwa sababu sikutaka kuidhulumu nafsi, niliamua ‘kusarender’ kazi ya jeshi na kuamua kujikita zaidi katika kuandaa filamu sambamba na kuigiza, kazi ninayoifanya hadi leo inayoniingizia kipato na kufanya nitatue matatizo yangu,” alisema.

Alisema aliamua kujitoa Jeshini mwaka 2003 baada ya kuona kazi yake ya kwanza aliyoandaa mwenyewe ambayo aliiita Mtazamo ikifanya vizuri, hivyo kuona ipo haja kutumia muda zaidi katika fani hiyo.

Kwa sababu inafahamika kazi hiyo ya Jeshi ni ‘bize’ sana kama angeendelea kuifanya, basi asingekuwa na muda wa kutosha kuandaa filamu zake, ndipo alipoamua kujivua gamba.

Mpaka sasa amefanikiwa kuandaa filamu tano, ikiwamo ambayo iko katika mchakato wa mwisho wa maandalizi ambayo inaitwa Leave or Die. Ni filamu ya action iliyowashirikisha mastaa kibao wa fani hiyo na kati yao mbali ya yeye mwenyewe, yupo Anti Fifi, Winter, Shilole na wengine.

Nyingine ambazo Kelvina amekwishatoa ni ile ya Penzi la Baba, Machozi na The Dadaz, ambayo aliitoa mwaka juzi. Aliwataka wanawake kuwa na uthubutu wa maamuzi ya mambo yao ili kufikia ndoto wanazohitaji, kwani hakuna lisiloshindikana endapo utakuwa na nia.

“Naomba wanawake wenzangu waache kubweteka, mimi unavyoniona dada yangu, naendesha maisha yangu kwa kazi hii, kwani imeniwezesha kuwapeleka watoto wangu wawili shule ambao Mungu amenijaalia.

“Na sasa nimeanza ujenzi wa kibanda cha kuishi huko jijini Mwanza, ambako ndiko ninapotokea, hivyo wale wenye mtazamo hasi juu ya kazi hii waachane nao kabisa,”  alisema.

Akizungumzia maisha binafsi nje ya shughuli hizo za uandaaji wa filamu pamoja na kuvua kwake gwanda za Jeshi, Kelvina anasema yeye ni mama wa watoto wa kike wawili aliobahatika kuwapata kati ya miaka minane iliyopita.

Hata hivyo, ilimlazimu kuachana na mumewe ambaye naye alitaka kumtia kiwingu kutokana na kutokubaliana naye kujihusisha na kazi hizo za uandaaji filamu, jambo ambalo hakukubaliana nalo ingawa awali alifanya hivyo.

“Kwa kweli hii ni sehemu ya changamoto katika maisha, namshukuru sana Mungu kuendelea kunipa ujasiri, hasa baada ya kupitia wakati mgumu na kufikia uamuzi wa kuachana na mume wangu ambaye hakuridhia nifanye kazi hii,” alisema.

Kwa sasa anaishi Mbezi jijini Dar es Salaam na ni mtoto wa kwanza katika familia yao ya watoto wanne, huku akiwa ndiye mtoto wa kike pekee. Akizungumzia ushirikiano anaoupata katika familia, alisema hakuna, kwa sababu hawafurahii fani aliyojikita.

“Baba yangu hataki hata kidogo nifanye kazi hii, yeye alitamani sana niwe ‘Air Hostess’ kwani ndiyo fani aliyonipeleka kusoma kabla ya mimi kuikacha na kujiingiza katika Jeshi, ingawa hakuvutiwa nayo sana, lakini aliipenda baada ya kusikia nimehitimu mafunzo na kuajiriwa.

“Nilikuja kumtibua tena nilipoamua kuvua gwanda na kujikita katika filamu. Simlaumu sana kwa sababu najua yeye, familia, ndugu na jamaa bado wana mtazamo hasi wa kazi ninayoifanya, lakini nataka niwaonyeshe kwamba sivyo wanavyofikiria.

“Ndio maana nahitaji kufanya mambo makubwa katika fani hii yatakayonifanya niwe msanii mkubwa ninayetambulika ndani na nje ya nchi na hapo nafikiri wataelewa nini nafanya na sasa nimeishaanza kuwaonyesha, hasa nilipofanikisha kumiliki kampuni yangu ya ‘Production’ ya kazi za filamu inayoitwa KJ Production,” alisema.

Kila kazi inakabiliwa na changamoto mbalimbali. Je, unajua fani hii ya filamu inakabiliwa na changamoto gani?

“Changamoto kubwa tunazokabiliana nazo katika fani hii hapa kwetu ni kama tatu hivi: Sehemu za kuigizia, wasanii wengi ni wasumbufu, hasa baada ya kulewa sifa, hivyo kitu unachotakiwa kufanya siku mbili inaweza kuchukua hata wiki, soko la kazi zetu na tatizo la wizi wa kazi ni kubwa mno, tunaomba Chama cha Hakimiliki (COSOTA) kisimame imara, wasanii tunaumizwa sana hatufaidiki vilivyo,” alisema.

Ushauri wake kwa Serikali, watambue vema umoja wao waliounda unaoitwa Tanzania Films Federation (TAFF) na kuupa nguvu uweze kufanya kazi ipasavyo pengine utasaidia kuzuia wimbi la wizi wa kazi zao.

Lakini kwa upande wa wasanii wenzake, aliomba kujenga tabia ya kuheshimiana, kushirikiana na kuifanya kazi hiyo kwa ufanisi kwa maendeleo yao binafsi na Taifa kwa ujumla. Huyo ndiyo Kelvina John.

xxxxxxMWISHO

 

Serikali izivunje COSOTA na BASATA

JUMATANO ya wiki hii nilikuwa miongoni mwa wadau wa sanaa waliohudhuria kikao cha Kamati ya Huduma za Kudumu ya Bunge la Jamhuri ya Muungano wa Tanzania , kilichoongozwa na Mwenyekiti wake Jenista Mhagama.

 

Kikao hicho kilichohuduriwa pia na wasanii wa aina mbalimbali, kilifanyika katika viungwa vya Baraza la Sanaa la Taifa (BASATA), kikiwa na maana kubwa ya kujadili masuala mbalimbali ya sanaa na wasanii nchini.

 

                                          Waandishi wa habari wakiserebuka.

Kikao hicho kilikuja wakati muafaka. Wakati ambao kwa miaka kadhaa sasa, bado wasanii wamekuwa wakiishi maisha ya kubahatisha huku wengine wakiindelea kuishi maisha mazuri kwa kupitia migongo ya wasanii.

 

Mengi yalisemwa. Wasanii wengi walichangia pamoja na wajumbe ambao ndio wabunge na wageni waarikwa. Inasikitisha sana . Kwani kwa kiasi kikubwa, matatizo mengi yalihjitokeza, huku chanzo chake kikiwa ni BASATA na ndugu zao COSOTA.

 

Hata hao wezi wanaodaiwa kuwapo, ilionekana dhahiri wanabebwa na wakubwa wao, ukizingatia kuwa BASATA ina uwezo wa kuwa wakali kwa ajili ya kuwakomboa watoto wao, yani wasanii ambao kwa Tanzania wanaishi kama omba omba.

 

Licha ya kuwa na vipaji vya hali ya juu, lakini wanachopata ni sifuri. Ni kutokana na hilo , nadiliki kusema kuwa ipo haja ya Serikali, kupitia Wizara yake ya Habari, Vijana, Utamaduni na Michezo, ili kuokoa maisha ya wasanii.

 

Kuvunjwa huko kunatokana na taasisi hizo kushindwa kufanya kazi zake kama inavyotakiwa, licha ya kupewa memo na wasimamizi wa sanaa kwa ujumla. Ndio, ingawa kwa COSOTA wao wanaweza kuyumba na msimamo wa Serikali, yani kuripoti kwa Wizara tofauti, kama ile ya Viwanda na Biashara pamoja na Wizara ya Habari, Vijana, Utamaduni na Michezo.

 

Pamoja na hayo, bado hainifanyi niamini kuwa COSOTA na BASATA wanaweza kukomboa maisha ya wasanii wetu. Kwa sasa uwezo huo hawana. Maana kwa miaka kadhaa wamekuwa wakifanya kazi kwa kuleana zaidi badala ya kusimama kwenye ukweli.

 

Angalia, ukweli huu umedhihirika zaidi, maana viongozi hao wa COSOTA waliweza kuingia mitini, japo walijua kuwa walitembelewa na Serikali yao , iliyowekwa madarakani kihalali, huku ikiongozwa na watu makini.

 

Jamani, hakuna haja ya kulumbana. Hapa hakuna haja ya kuogopana. Kwanini BASATA waachwe na ndugu zao COSOTA? Kwa wale waliokwenda katika mjadala huo watakubaliana na mimi. Malalamiko mengi yalielekezwa kwao.

 

Usimamizi wao ni mdogo zaidi. Kuingizwa katika biashara za kujinyoji hiyo ndio kazi yao , hata kama wanajua hazina umuhimu kwa Watanzania. Kwa mfano, BASATA kuingizwa kwenye tuzo za Kilimanjaro Music Award huo ni umbumbumbu.

 

Tuzo hizo zinayumba. Hazina maana. Wasanii bora wanaachwa na wale wabaya wanapata tuzo. Sasa kwanini washiriki? Hawaoni ni kuwayumbisha Watanzania? Haya ni maswali ambayo majibu yake ni rahisi, endapo viongozi watajivua gamba.

 

Hayo yatakwisha kama viongozi hao watakubali kuwajibika. Moja ya sera ya uongozi bora ni kusimama kwenye ukweli kwa ajili ya manufaa ya watu wako. Inapotokea mambo yanakwenda tofauti, huo ni wizi.

 

Tuuseme hadharani, maana vikao kama hivyo havitakuwa na maana kama yanayojadiliwa yanaachwa na wale wezi kiuendelea kula raha. Inasikitisha mno. COSOTA wao kushiriki kwenye kampeni za mtu mmoja kuna nini ndani yake?

 

Wasanii kuendelea kuibiwa wakati wao wapo inaonyesha wameshindwa kazi. Kuyasema haya ni lazima kwa faida ya kizazi cha sanaa. Kuna haja gani msanii kuimba pasi kupata chochote cha maana?

 

Kwanini maisha yake ya sanaa asiyatumie kwenye kilimo? Nadhani hili la kuvunjwa kwa mabaraza hayo na kupewa kazi watu wengi wengine kutachangia kwa kiasi kikubwa kuibua ari ya utendaji kwa wasanii na wasimamizi wao.

 

Ikumbukwe kwamba sanaa ni kazi na inaweza kuleta utajiri mkubwa kwa Taifa. Nchi za wenzetu wao wanafanikiwa kwa kupitia ulingo huo wa sanaa. Ndio, maana nasema katika majumuisho ya kikao hicho, ipo haja ya viongozi waliopo wa BASATA na ndugu zao COSOTA wawekwe pembeni kama wameshindwa wenyewe kuwajibika.

 

Huu sio wakati wa kuoneana haya. Tusimame kwenye ukweli na hapana shaka, Jenista Mhagama, mwenyekiti wa kamati hiyo ya Huduma za Jamii pamoja na Waziri wa Habari, Vijana, Utamaduni na Michezo watapata dawa hiyo kwa manufaa ya Taifa.

 

Mungu ibariki Tanzania

Mungu wabariki wasanii wetu

 

kambimbwana@yahoo.com

0712 053949

0753 806087

Pigania ndoa yako mwanamama

NIANZE kwa kukushukuru wewe uliyepata nafasi ya kusoma kazi zangu, ikiwamo hii inayoelezea mambo ya uhusiano na maisha, yanayogusa hisia za wengi duniani.

Nasema hivyo maana suala la uhusiano ni zito kuliko inavyochukuliwa na baadhi ya watu. Baadhi yao wanafikiri kuwa wakiachana na waume zao leo, basi kesho atapata mwingine.

Sawa, ila sio jambo zuri. Sio njia nzuri katika maisha yako. Ni tabia mbaya inayotakiwa ipingwe na wote. Utajisikiaje ukiwa na umati wa watu ambao uliwahi kuwa na uhusiano nao?

Sio ajabu unaweza kuonekana wewe ni muhuni, maana kwanini uachwe na waume zaidi ya watano? Kwanini? Kuna nini hapo? Je, wewe ndio tatizo au mwenzako?

Haya ni maswali tunayotakiwa kujiuliza wote kwa pamoja ili kulinda ndoa zetu au uhusiano sisi wote. Msomaji wangu mpendwa, binadamu wengi tabia zao hufanana japo sio sana .

Japo kuwa kuna tabia mbaya na nzuri, ila mwisho wa siku, kwako wewe zinaweza kuwa kero. Hivyo, ukiona mwenzako anakwenda njia tofauti, unaweza kumuweka chini.

Lakini sio sababu ya kuvunja uhusiano wako haraka, maana umekutana na mtu njiani amekuvutia zaidi ya yule uliyekuwa naye. Ukifanya hivyo, ni kujiweka matatani.

Nasema hivyo maana unaweza kuondoka na kwenda kwa mwingine, ila ukakuta kasumba kubwa mno. Hapo hutafurahia zaidi ya kulia na kusaga meno. Ni baada ya kujidanganya mwenyewe.

Utashangaa kwanini ulifanya hivyo? Siku zote majuto ni mjukuu. Huna haja ya kulia. Ni wakati wako wa kuangalia mwenzako anakwendaje kwa kumuweka chini.

Ndio anaweza kuwa mnywaji sana wa pombe. Kwa bahati mbaya tabia yake ya ulevi wewe huitaki. Nadhani kwa kupitia wewe mwenyewe anaweza kuacha.

Ni baada ya kumwambia kistaarabu na kumuelezea jinsi gani anatakiwa awe ili aweze kuwa na wewe. Endapo yupo kwenye msingi wa kujenga nyumba yenu ya upendo anaweza kupunguza kama sio kuacha.

Nadhani hiyo ni tabia nzuri mno inayotakiwa ifanywe na wote, maana mapenzi mazuri siku zote ni kusikilizana. Hakuna njia ya mkato katika hilo . Ndio maana nasema pigania uhusiano wako.

Na kwa yule aliyejaliwa kufunga ndoa, basi ahakikishe kuwa analinda ndoa yake kwa kuzima zile dosari zinazoweza kuhatarisha usalama wa ndoa yake kwa sababu moja ama nyingine.

Wapo watu ambao kosa kidogo tayari wamedai talaka. Kwao wao ni bora wakimbilie talaka maana wameona mitaani wapo watu wanaoweza kuishi naye na kuendelea kujaza idadi ya wapenzi.

Inakera mno. Inatia aibu kama mtaa mzima umeumaliza kwa njia hiyo hiyo. Tabia ambazo baadhi yao zinaepukika endapo kwa mikono yako, mdomo wako na miguu yako itapigania kwa dhati suala hilo .

Watu watakucheka. Mwanamke kubadilisha wanaume zaidi ya watano kwa kipindi kifupi huo ni uhuni. Unajipakaza matope na kuonekana kituko mtaani na kuitwa majina mengi ya karaha.

Hutaweza kuwakataza watu kukuita wewe ni cha wote, jamvi la wageni na mengine lukuki. Kwanini uwakataze wakati ni kweli? Ajabu, utakapoitwa hivyo, watu watakusikia na kukuonea huruma.

Sio wote wanaweza kuwapenda wasichana wenye sifa mbaya kama hizo, hivyo ni wakati wako kujifunza kutokana na makosa. Muweke chini mtu wako kwa ajili yako.

Mfundishe tabia nzuri na upiganie kikweli uhusiano wako kwa faida yako na sio kukimbilia talaka au kuvunja mkataba wenu, maana sio vizuri na hakuna haja ya kujaza wanaume.

Serikali ipige jicho lake BASATA

KUJADILI vitu vya maendeleo kwa Tanzania kunahitaji moyo wa chuma kama alivyowahi kusema muasisi wa Taifa hili, Hayati, Mwalimu Julius Kambarage Nyerere juu ya masuala nyeti ya Azimio la Arusha.

                                                        Dayna Nyange, msanii

Mwalimu, mmoja wa viongozi wanaopendwa barani Afrika, Oktoba 14, ilikuwa ni kumbukumbu ya kifo chake, baada ya kumaliza siku zake za kuishi duniani, akitumika kama mkombozi kwa Taifa hili, linaloongozwa na Rais wake, Jakaya Mrisho Kikwete.

 

Nasema moyo wa chuma, maana hata kama uwe mjuzi wa kujadili mambo hayo kwa kiasi gani, hao wanaojadiliwa kubadilika kwao ni kazi ngumu. Katu hawataki kusikia au kuona yale wanayofanya kwa faida ya nchi yao .

 

Hata hivyo, sio jambo la busara kubaki kimya. Taifa linazidi kutumbukia kwenye shimo baya la umasikini na wachache wao wakizidi kuneemeka. Utajiri ni wa kwao, wakati wenzao wanazidi kuwa masikini wa kutupwa.

 

Tanzania ya leo, ni kazi ngumu kupata ajira kama huna fedha. Suala kama hilo , linaonyesha ni jinsi gani mambo yanavyotakiwa kubadilika kwa faida ya wananchi wake. Tuache hayo turudi kwenye lengo la makala haya.

 

Wakati Waziri wa Habari, Vijana, Utamaduni na Michezo akiteua safu mpya ya uongozi ya baraza la Michezo Tanzania , nadhani ipo haja pia ya kuangalia upya mwenendo wa uongozi wa Baraza la Sanaa la Taifa (BASATA).

 

Baraza hili muhimu kwa Tanzania naweza kusema limekufa. Viongozi wake wengi hawaonyeshi jitihada zao za dhati kwa maendeleo ya sanaa ya Tanzania . Wasanii waliokuwapo bado kazi zao hazina jipya, huku wengineo tungo zao zikikosa sifa.

 

Ni hao wanaoacha kutunga nyimbo za kukosoa madawa ya kulevya, kubweteka majumbani au kwenye vijiwe vya kahawa, huzama zaidi kwenye tungo za kidunia. Hapa lazima niwe muwazi na bila ya kuweka woga wowote kwa ajili ya Tanzania .

 

Sitaki kusema viongozi wa BASATA wote wameshindwa kazi, ila Serikali lazima iwapige jicho ama kuwaelekeza vitu vizuri kwa ajili ya maendeleo ya Taifa. Nimepata nafasi ya kuchunguza utendaji kazi wa BASATA na kubaki mdomo wazi.

 

Mengi wanayofanya, si maendeleo kwa sanaa ya Tanzania . Uchunguzi wangu unaonyesha kila msanii wa nje anayekuja hapa nchini hutakiwa alipe fedha nyingi kama gharama za kuja kufanya kazi Tanzania , zisizopungua milioni moja.

 

Kwa mfano, wapo wanaotozwa hadi kiasi cha shilingi miliona moja, huku wakitakiwa walipe fedha za faini, kama mtu huyo ameanza kutoa habari kwa wanahabari kwa ajili ya kuwajulisha Watanzania.

 

Sawa, ila wakati mwingine wadau hao huonewa kwa makosa ambayo sio yao . Nasema hivyo huku nikiangalia upekuzi wa waandishi kujua habari hata zile wasizotakiwa wazifahamu kwa wakati huo.

 

Pamoja na hayo, kama ndivyo hivyo, fedha hizo za faini kiasi cha milioni moja hupelekwa wapi? Je, nchi hii inafanya juhudi gani kutangaza sanaa ya Tanzania ? Wasanii wetu wa ndani wanafanyiwa vitu gani kwa mafanikio yao ?

 

Msanii wa ndani kubaki kuimba peke yake ni jambo linaloweza kuangamiza kipaji chake. Inatakiwa apate ushindani, ama kusoma kutoka kwa wenzake. Hivyo basi, kitendo cha BASATA wao kujifanyia mambo kienyeji ni kuharibu mfumo mzima wa sanaa.

 

BASATA wao huku wakiweka mbele fedha, lazima utendaji kazi wao uwe mzuri, maana uliopo sasa ni kubuluzana na uliojaa maslahi binafsi. BASATA iliyopo sasa ni kuwakomoa wadau wenye uwezo wa kukuza sanaa kwa manufaa yao .

 

Sitaki nionekane tofauti juu ya hili, ndio maana hapo mwanzo wa makala haya nikatahadharisha maana wanaopewa ukweli hupayuka wakisema wanayojua wenyewe. Inatia aibu, kama kila mtu anahifanyia anavyojua mwenyewe.

 

Huku wadau tukipigania utendaji mbovu wa Shirikisho la Soka nchini (TFF), bado kuna vitengo nyeti vinaachwa tu bila kukosolewa. Nisema tu, nitakuwa mkweli kusema kila ninalojua kwa maendeleo ya Taifa langu, hata kama nitachukuliwa tofauti.

 

Kuna mambo mabaya mno yasiyofaa kufanywa na viongozi wetu, iwe ni kwenye michezo ama sanaa inayofaa kuheshimiwa Dunia nzima. Angalia Barani Ulaya, wengi wanafanikiwa. Muangalie mwanadada Rihannah, Jay Z na mke wake Beyonce, utakubali kuwa sanaa inalipa.

 

Sio huyo tu, bado wapo wakali wengine wanaovuna fedha lukuki, kutokana na kukuta mfumo mzuri katika nchi zao, ikiwamo hakimiliki. Siamini kama wasanii wetu wa ndani wataendelea kuachwa tu, hali ya kuwa wana utajiri wa vipaji.

 

Ni wakati wao Serikali kupitia Wizara ya Habari, Vijana, Utamaduni na Michezo kuangalia upya sera zao na sera za mabaraza yake, likiwamo hilo la BASATA. Sioni juhudi na harakati za kukuza sanaa ya Tanzania zaidi ya kuidumaza.

 

Je, ni wasanii wote wanatakiwa walipe fedha hizo zikiwamo faini au ni wachache? Ushahidi unaonyesha kuwa, kama ni kweli, basi BASATA wanavuna fedha nyingi, maana wengi wanakiuka masharti hayo. Yani kupata kibali, kabla ya kuvuja kwa ujio wao.

 

Hivi kweli, mwandishi kuandika ujio wa msanii fulani ni kitendo kibaya kiasi cha kuwafanya BASATA walazimike kutoza faini hizo? Jamani, kwanini Tanzania tunakwenda ovyo namna hiyo?

 

Kwanini tamaa ya kujaza matumbo yetu ipo mbele kuliko kusudio la kweli la kuwakomboa Watanzania kwenye vita hii ngumu ya maradhi, ujinga na umasikini? Sikatai, msanii alipe gharama za kuishi nchini, ila nyingine ni wizi tu.

 

BASATA unaweza kufuatilia kibali kwa muda mrefu bila hata kukupatia. Nia yao ni mdau huyo avunje amri yao ya kuzungumzia ujio huo hata kwa marafiki zake, ili wapate hiyo shilingi laki tano au milioni moja.

 

Yuko wapi Emmanuel Nchimbi, waziri wa Wizara hiyo? Hivi kweli ndivyo BASATA wanavyotakiwa wajiendeshe? Sina nia mbaya, ila kusudio ni kujiendesha vema kwa manufaa ya Tanzania na sio kwenda ndivyo sivyo.

 

BASATA wanatakiwa wasome alama za nyakati. Wanatakiwa wawe na fikra pevu juu ya sanaa ya Tanzania , inayozidi kuyumba. Wengi kazi zao ni mbaya na zinakosa maudhui na maana halisi ya sanaa ya Tanzania , hata kwenye matamshi.

 

Bado sanaa nyingine zinakosa mwamko, ikiwamo ya nyimbo za asili, zile za makabila tofauti, zilizokuwa zikivuma wakati huo. Sanaa kama ususi, uchongaji, uchoraji sasa zimeadimika kabisa katika Taifa hili.

 

Wanaotamba ni Bongo Fleva, tena kwa kazi ambazo nyepesi, zimekosa soko na mvuto linapokuja soko la Kimataifa. Wengi wao mavazi yao ni karaha tupu. Bado wabunifu ni mavazi wapo wapo tu. Ukienda nchi za wenzetu wamefanikiwa, kiasi cha sasa kuangalia mazuri yao .

 

Sisi tuna wasanii wengi tu, lakini bado Makhirikhiri wamekuja kuteka soko la Tanzania, bila kusahau ndugu zao Dikakapa Traditional Dance, ambao hadi sasa wapo mikoani huko wakitangaza muziki wao wa asili.

 

Sawa, waje tu, maana najua ni somo kwa wadau, viongozi na wasanii wa ndani. Lakini kuwekewa ngumu, au wadau kutozwa fedha nyingi ni kuwadhulumu wao na kuibananga sanaa ya Tanzania , inayotakiwa itangazwe na kila mmoja wetu.

 

Kiu yangu ni kuona sanaa inapiga hatua kwa kuwa na viongozi wenye uelewa, mipango na uthubutu katika kazi zao, sio wale wanaotamani zaidi kumiliki vitu vya thamani katika utawala wao, huku wanavyoviongoza vikijikongoja.

 

Ndio maana naitaka Serikali, kuangalia zaidi mfumo mzima wa BASATA na ndugu zao COSOTA, maana ni muhimu na wameshika funguo za mafanikio kisanaa ya wasanii wa Tanzania , wanaoshi kama njiwa, kula chini kulala juu.

 

Naomba kutoa hoja waungwana

kambimbwana@yahoo.com

0712 053949

0753 806087

TFF rekebisheni mwenendo wenu

WAKATI mwingine kusema ukweli ni jambo jema japokuwa hao wanaosemwa au kupewa ushauri huo, watajisikia tofauti kwa namna moja ama nyingine.

Inawezekana sisi ni watu wa karibu kabisa katika ufanyaji kazi huo, ila linapokuja suala la ukweli hakuna jinsi. Tuambiane tu kwa nia ya kufika pale tunapohitaji.

Jamani, kwenye ukweli siku uongo hujitenga. Hivyo hakuna haja ya kuogopana. Ni kutokana na hilo, acha niseme kuwa Shirikisho la Soka nchini (TFF), chini ya Rais wake, Leodgar Tenga, tujiandaye kulia zaidi.

Katu tusijidanganye kupiga hatua kamwe. Wala tusitarajie kupanda viwango vya soka vya juu zaidi au kucheza michuano mikubwa duniani, ikiwamo Kombe la Dunia.

Tunachotakiwa sisi ni kujiandaa kulia zaidi kwa kuporomoka kwenye michezo, maana viongozi wengi wanafanya kazi zao kisiasa zaidi wakiwa na nia ya kulindana hata pale watu hao wanapoharibu na kuwakera watu.

Nikiwa kama mdau wa michezo, nitamlaumu Tenga kwakuwa ndiyo Rais, ila zaidi wa kubeba lawama hizo ni Katibu Mkuu wake, Angetile Osiah.

 Tenga kulia na Sunday Kayuni

Ndio, maana yeye ndio mtendaji mkuu wa yote japo kuwa amekuwa mwepesi mno kujitetea au kumtetea yule anayeonekana tofauti kwenye utendaji kazi wake.

Angalia mwenendo wa timu ya taifa, Taifa Stars. Ni utumbo mtupu. Kila mara kumekuwa na kasumba za hapa na pale. Klabu zinakwenda ndivyo sivyo.

Osiah bila kujua analofanya, anajichanganya zaidi kwa kumuondolea majukumu yake, Mkurugenzi wa Ufundi, Sunday Kayuni. Eti kuboronga kote huko hakusababishwi na yeye, wakati anajua fika ufundi wote upo chini yake.

Kwa madai yake, wa kulaumiwa ni watu wengine wakiwamo wakuu wa mashindano. Jamani, kabla ya kufika huko kwenye mashindano, lazima ufundi utangulie.

Ni yeye wa kuangalia ratiba zinakwendaje ili mambo yaende vizuri. Kubadilishwa ovyo kwa mechi za ligi kuu au vitu kuingiliana kumesababishwa nay eye.

Wala sina haja ya kutoana kafara hapa, kama walivyomtoa kafara Ofisa Habari wao wa zamani, Florian Kaiajage kwenye tukio la kugoma CD ya wimbo wa Taifa, ila ukweli lazima usemwe maana baadhi ya Watanzania, hawajui wajibu wao.

Hakuna mipango kabisa TFF. Hawasimamii michakato ya kupiga hatua katika sekta ya michezo, ukiwamo mpira wa miguu, zaidi ya kukalia vyeo wasivyoviweza.

Kwa bahati mbaya au nzuri, wanaojitolea kusema ukweli huonekana tofauti katika nyuso zao na kusemwa kupita kiasi, wakijifanya wao ni miungu watu wasioweza kukosea.

Eti, ndio tatizo na watapekelekea wadhamini wawatose kwa namna moja ama nyingine. Jamani, hakuna malaika hapo. Hakuna aliyekamilika. Kukoselewa kuna maana ya kujipanga ili Taifa lipige hatua kutoka hapa lilipo.

TFF wamekosa changamoto na ari kwa wadau na wachezaji wote, kuanzia Taifa Stars na wale wanaocheza ligi. Ndio maana ligi inakosa mvuto kwa ratiba mbovu.

Mara kadhaa timu ya taifa, Taifa Stars, inakosa mechi za kujipima nguvu, kitu kinachoifanya ishindwe kupiga hatua kutokana na maandalizi yao hafifu.

Ni matatizo makubwa. Kwa timu kama hiyo isiyokuwa na jipya, inahitaji maandalizi ya uhakika na wala sio kuzima moto kama wanavyofanya sasa na kufuja fedha za walalahoi.

Ona, hawa wameanza kulinganisha uwepo wa Osiah na ule wa Fredrick Mwakalebela. Mwakalebela ni Katibu Mkuu wa zamani, aliyemaliza muda wake na kuhamia kwenye siasa.

Huko alishindwa kuingia bungeni kwa sababu anazojua mwenyewe na chama chake. Sitaki kuingia huko kwenye siasa, maana ndizo zinazoharibu mfumo wetu wa maendeleo ya michezo.

Wakati wa Mwakalebela, hakujatokea hayo yanayotokea sasa. Na hata kama yaliyotokea, basi si kwa kiwango kikubwa kama inavyokuwa sasa kiasi cha kukosa kusafiri kwa timu ya Taifa, huku klabu ikifanikiwa kwenda Sudan.

wachezaji wa Tanzania wanayecheza soka la kulipwa nje walikuwa wakiwasili kwa wakati tofauti na sasa. Hakuna mawasiliano mazuri wao na Mashirikisho mengine duniani.

Kulikuwa na mawasiliano ya uhakika. Mechi za kujipima nguvu zilikuwa za kutosha. Hali hiyo ilimfanya hata kocha wa wakati huo, Mbrazil, Marcio Maximo, afanye kazi yake vizuri.

Leo hii baadhi ya wadau wameanza kumtupia lawama kocha wa sasa wa Stars, Mdenmark, Jan Borge Poulsen. Hoja wanayo, ila pia wasisahu na ubabaishaji huu wa TFF.

Nadhani wanafanya hivyo kwasababu kocha ndiyo mwenye jukumu hilo, lakini wakati mwingine tunaweza kumuonea na kumtupia mzigo wa bure, wakati anashindwa kusimamiwa na viongozi hao wa TFF wanaojaribu kukwepa majukumu yao.

Hasaidiwi huyu. Hata akisaidiwa, wakubwa hao huangalia namna ya kupambana na wezi wa milangoni na kusahau mengine, maana nia yao ni kuingiza mapato ya kutosha.

Kwanini viongozi wasikubali kushindwa na kuweka mipango mingine? Hatuna ligi nzuri yenye ushindani.

Hatuna msingi imara wa kuendeleza vijana wadogo, bado tunaota ndoto ya kuwa na kiwango imara. TFF wa leo, wakiulizwa vijana wanaopatikana kwenye michuano ya Copa Coca-cola leo wanafanya nini hawatakuwa na jibu hilo.

Uwapi umuhimu wa kuwa na ligi hiyo? Huko wilayani kwenye vijana wengi kuna endelea na nini? Mkurugenzi wa Ufundi, Kayuni kazi zake ni zipi pale TFF?

Ziwekwe wazi ili wadau wazijuwe. Ni hapo ndipo ninapojikuta nikishindwa kuwaelewa TFF.

Najua ni kazi ngumu kusema ukweli, ila kwa hali ilivyo, Watanzania wajiandaye kulia zaidi, maana mafanikio kwetu ni ngumu na tusijidanganyane kwa hilo.

Hatuwezi kufanikiwa wakati tunafanya kazi midomoni. Ni ngumu kupiga hatua wakati sisi tunachojua ni kusawazisha kauli zinazopingwa na wadau, ili waonekane viongozi wazuri kwa jamii wakati ni uongo mtupu.

Osiah ambaye ndio mtendaji mkuu wa TFF, kazi yake imekuwa ngumu mno. Ameshindwa kuwa na ushawishi kwa wadau na upo uwezekano wa kuwapoteza hata wadhamini waliokuwapo sasa kwenye timu zetu.

Najua Osiah ni ndugu yetu ila kumuangalia anavyokwenda ni kumuharibia. Watu wanamuona. Sifa yake inazidi kupotea kwa ubabaishaji wake.

Binafsi napenda kuona anakwenda vizuri na ndio maana nakuwa muwazi kwa ufanyaji wake wa kazi. Hana jipya. Ajaribu kuangalia namna anavyoweza kujiendesha.

Kama ni mpole awe mkali zaidi. Zipo tetesi zinazodai kuwa Osiah licha ya kuwa na cheo hicho, lakini wapo watu wa chini yake wanamuendesha.

Sitaki kuliamini hilo japokuwa najua lisemwalo lipo, maana nia ni kuwekana sawa ili Tanzania ipige hatua katika sekta ya michezo, ukiwamo huo mpira wa miguu.

Kwanini? Hivi kweli sisi tunakuwa watu wa kuchekelea mafanikio ya wenzetu, wakati tuna idadi kubwa ya wanamichezo waliozagaa katika wilaya mbambali.

Fanya uchunguzi utakubaliana na mimi. Huko Handeni mkoani Tanga, Iringa, Mtwara, Tarime, Morogoro na kwengineko kumejaa vipaji vya hali ya juu ila hawaendelezwi wala hawaibuliwi kutokana na mipango yenye tija na Tanzania.

Vijana hao wanakosa walau jezi za kuvaa wakati tuna TFF inayoungwa mkono na wadau wakubwa tu. Sitaki kuamini kama muda umekwisha, maana wanaweza kujirekebisha na kusonga mbele wakiacha kasumba zao.

Kwa sasa TFF hawana jipya. Viongozi wapo wapo tu kwenye viti vyao vya kuzuunguka. Kusua sua huku kukiendelea, lawama hizi ni zenu, maana wadau wanawaunga mkono.

Tatizo lipo wapi?  Siasa? Ubinafsi ama ni kuogopana? Kila mtu lazima afanye kazi yake kama inavyotakiwa. Tenga, lazima awe mkali kwa vijana wake ili mambo yaende.

Osiah lazima akubali kukosolewa na watu wakiwamo wanahabari ambao kifani ni ndugu zake kabisa. Naye ni mwanahabari hivyo uwepo wake TFF ni mafanikio kwa waandishi wote nchini wakiona mwenzao anakwenda vema.

Malalamiko mengi yamekuwa kwa vyama vingine vya michezo miaka nenda rudi maana ufanyaji kazi wao ni wa midomoni.

Faida yao wanaijua, ndio maana kila siku malalamiko yao ni fedha za maandalizi na hakuna anaewasikiliza.

Wakati huo TFF wao walitulia lakini kwa bahati mbaya sasa kibao kinaanza kuwaugeukia wao. Zindukeni nyie? Kumbushaneni wajibu wenu. Punda hawezi kwenda bila mchapo.

Binafsi nipo tayari kwa lawama maana najua siku zote sio mzigo ili mradi ujumbe wangu umewafikia.

Kwa mwendo huu wa TFF, kikweli maendeleo ya soka ni ndoto ya kuku kutamani kunyonyesha watoto wake.

Naomba kutoa hoja waungwana.

kambimbwana@yahoo.com

0712 053949

0753 806087

Meneja wa Sinta amwaga sera

MENEJA wa msanii wa filamu aliyewahi kutamba mno miaka ya nyuma, Christina Manongi, Richard Methew, amesema filamu itakayowakutanisha mwanadada huyo na Juma Kassim maarufu kama ‘Juma Nature’, itakuwa moto wa kuotea mbali, endapo makubaliano yao yatafikiwa na wawili hao.

Kwa siku kadhaa sasa wawili hao wamekuwa wakikutanishwa kwa nia ya kupatanishwa ili wacheze filamu hiyo, baada ya kuingia kwenye malumbano, yaliyosababisha Juma Nature atunge vibao viwili vya ‘Sitaki Demu’ na ‘Inaniuma Sana’.

Akizungumza jijini Dar es Salaam jana, Methew alisema hadi sasa Sinta bado hajakuwa tayari, licha ya kuonekana kuelekea kwenye makubaliano hayo.

Alisema mara baada ya kufikia makubaliano yao, wawili hao watacheza filamu hiyo na kutangazwa kwa wadau kwa nia ya kuona kazi yao inakuwa nzuri.

“Nimejaribu kuangalia vipi Sinta anaweza kurudi kwenye sanaa yake, huku nikiamini kuwa akicheza na Nature inaweza kuwa kazi nzuri zaidi na kumrudisha kileleni.

“Najivunia kuwa na msanii kama Sinta, hivyo naamini akifikia makubaliano kwa kusahau yote yaliyopita, mambo yanaweza kuwa mazuri zaidi,” alisema Mathew.

Hata hivyo, Sinta alipozungumza na Gazeti hili jana, alisema hana nia ya kurudi kwenye uhusiano wa kimapenzi na Juma Nature, hivyo wadau wanapaswa kuelewa katika hilo.

                                 Juma Nature chini na Sinta juu.  

Mwanadada huyo ni miongoni mwa wasanii wa kike mahiri na wanaosubiriwa kwa hamu kubwa katika ulingo wa filamu, huku umbo na sura yake likichanganya wengi, tangu wakati huo anashiriki katika michezo ya kundi la Kaole Sanaa Group.

Kago kwaheri Simba

WAKATI klabu ya Simba, ikitarajiwa kuanza mazoezi leo kwa ajili ya kujiandaa zaidi na mechi za ligi kuu, mshambuliaji wa Kimataifa, Gervas Kago, ameombwa na nchi yake kwenda kujiunga na timu yake ya Taifa.

Hiyo ni baada ya Afrika ya Kati, kuwasilisha barua yao jana, wakati tayari alishajua kuwa ataanza mazoezi na wenzake, licha ya nyota wanne wa Simba, kuitwa kwenye kikosi cha timu ya Taifa, Taifa Stars, kinachonolewa na Mdenmark, Jan Poulsen.

Wachezaji hao wa Simba walioingia kambini wakijiandaa na safari yao ya Morocco, ni Juma Kaseja, Juma Nyoso, Victor Costa na Amir Mafta.

Akizungumza jijini Dar es Salaam jana, Ofisa Habari wa Simba, Ezekiel Kamwaga, alisema kuwa kupokea barua hiyo kunaonyesha kuwa naye hatajiunga na wenzake kwa ajili ya kujiandaa na patashika ya ligi ya Vodacom.

Simba wanaendelea na mikakati yao wakati Yanga wao wamesimama mazoezi kwa ajili ya kupisha maandalizi ya Stars, kitu kilichomfanya kocha wao, Mganda, Sam Timbe, kurudi kwao kwa muda.

                               Gervas Kago

“Tunashughulikia usafiri wao kuanzia sasa, nadhani naye hatakuwapo kwenye timu yetu kwa ajili ya kuwakilisha Taifa lake, Afrika ya Kati.

“Ni jambo zuri mchezaji kuwamo kwenye kikosi cha timu ya Taifa, hivyo wale wote ambao hawapo kwenye timu zao za Taifa, kesho (leo) wataanza mazoezi,” alisema Kamwaga.

Simba inaongoza ligi ikiwa na pointi 18, ikifuatiwa na Azam FC yenye pointi 15, wakati Yanga wao wana pointi 12, wakizinduka katika mechi mbili zilizopita na kuonyesha kiu ya kutaka kutetea ubingwa wao huo.