Wazee wa Ngwasuma hapatoshi leo Njombe

Na Kambi Mbwana, Dar es Salaam

BENDI ya FM Academia, Wazee wa Ngwasuma, leo inafanya shoo ya nguvu katika Ukumbi wa Turbo, uliopo mjini Njombe.

Shoo hiyo itakuwa ya mwisho kwa bendi hiyo iliyokuwa katika ziara ya mikoani, ambapo walipitia katika mikoa mbalimbali, wakianza Mkoa wa Morogoro, Jumatano iliyopita.

Akizungumza kwa njia ya simu, Mkurugenzi wa Fedha na Utawala wa bendi hiyo, Kelvin Mkinga, alisema kuwa shoo hiyo itakuwa ya aina yake kwa mshabiki wa Njombe.

“Tumekuwa na kawaida ya kufanya ziara ya mara kwa mara katika mikoa Tanzania, hivyo kesho (leo), mashabiki wa Njombe wataona kwanini sisi tupo kileleni.

“FM Academia ni miongoni mwa bendi imara na zenye mashabiki wengi sambamba na mikakati ya kuendelea kutesa kileleni,” alisema.

Wazee wa Ngwasuma wapo chini ya Nyosh El Saadat, akishirikiana kwa karibu na wakali kibao, akiwamo Patchou Mwamba, Pablo Masai, Totoo Kalala na wengineo.

Kibanda ataka waandishi wayape uzito matukio mabaya ya waandishi ili wayakomeshe

Na Waandishi Wetu, Arusha

Mwenyekiti wa Jukwaa la Wahariri (TEF), Absalom Kibanda ametoa wito kwa waandishi wa habari nchini kuyapa uzito matukio yanayowatokea waandishi wa habari na kuyapigia kelele kwa nguvu zote ili kuyakomesha.

Mwanakamati wa maandilizi ya maadhimisho ya Kongamano la Uhuru wa Vyombo vya Habari Duniani 2014, Usia Nkhoma Ledama wa Kitengo cha Habari cha Umoja wa Mataifa (UNIC), akibadilishana mawazo na Mwenyekiti wa Jukwaa la Wahariri (TEF), Absalom Kibanda nje ya ukumbi wa Kimataifa wa mikutano wa AICC jijini Arusha.

Baadhi ya waandishi wa habari na wadau kutoka asasi mbalimbali nchini wakifanya usajili kwenye kongamano la siku moja lilioandiliwa kuadhimisha Uhuru wa vyombo vya Habari Duniani 2014 lililofanyika jijini Arusha.

Afisa Mipango Kitengo cha Mawasiliano, Habari na Tehama UNESCO, Bw. Al Amin Yusuph, akiwasilisha mada kuhusu mchango wa uhuru wa vyombo vya habari katika utawala bora, kukuza uwezo na kupunguza umaskini kongamano la waandishi wa habari lilioandaliwa kama sehemu ya maadhimisho ya siku ya Uhuru wa Vyombo vya Habari Duniani yanayofanyika jijini. Arusha.

Mhadhiri wa Chuo Kikuu cha Dar es Salaam Kitivo cha Sheria , Bw. James Jesse, akitoa mada kuhusu umuhimu wa sheria katika kulinda haki ya uhuru wa kujieleza kwa kila mtu wakati wa kongamano la waandishi wa habari lilioandaliwa kama sehemu ya maadhimisho ya siku ya uhuru wa vyombo vya habari duniani yanayofikia kilele leo jijini Arusha.

Makamu wa Rais Dkt Bilal alipongeza kanisa la Methodist Tanzania

Na Mwandishi Wetu, Dar es Salaam

MAKAMU wa Rais, Dk Mohamed Gharib Bilal, amelipongeza Kanisa la Methodist Tanzania, chini ya uongozi wa Baba Askofu Mkuu, Dkt. Byamungu kwa hatua nzuri ya kuchangia harakati za kimaendeleo nchini.

 Makamu wa Rais wa Jamhuri ya Muungano wa Tanzania, Dkt. Mohammed Gharib Bilal, akimpongeza Askofu Mteule, Alen Legeza Siso, baada ya kumkabidhi Katiba na Kanuni za Kanisa la Methodist Tanzania, wakati wa Ibada Maalum ya Kuwekwa Wakfu (kusimikwa) askofu huyo, iliyofanyika kwenye Kanisa la Imanueli dhehebu la Methodox, Jimbo teule la Pwani na Mashariki lililopo Bunju Jijini Dar es Salaam, leo Mei 3, 2014. Picha na OMR.

Akizungumza katika sherehe la kusimikwa Askofu Mteule Alen Siso, zilizofanyika Jimbo Teule la Mashariki na Pwani, jijini Dar es Salaam, Dk Bilal alisema kuwa kanisa hilo linapanuka sanjari na kuchangia mambo mengi ya kimaendeleo.

Alisema kuwa Kanisa la Methodist Tanzania, lilianza kutoa huduma ya kiroho hapa nchini, Juni 12 mwaka 1991 lakini ndani ya miaka 23 tu, limeweza kuchangia nyanja mbalimbali za maendeleo ya jamii.

“Ujenzi wa hospitali tano mkoani Geita, shule mkoani Arusha, uchimbaji visima virefu kwa shule na magereza  katika mikoa ya Dar es Salaam na Pwani, na ujenzi wa Chuo cha Theolojia  huko Dodoma na Arusha, ni baadhi tu ya mambo mengi mema, yanayofanywa na kanisa hili. 

“Kwa niaba ya Serikali, nawapongeza  kwa kazi kubwa mnayofanya, huku nikiwataka tuendelee kuwa karibu nanyi,   kwa kila jambo mtakaloona tunapaswa kushirikiana,” alisema.

Jengo la PCSP kugharimu Sh milioni 46

Na Mwandishi Wetu, Mwanza

JENGO la Shirika Population Culture and  Sport Program (PCSP), linalojihusisha na  masuala  ya michezo na utamaduni  wilayani Nyamagana,  mkoani  Mwanza, litagharimu Sh Milioni 46 kwa ukarabati wake.

Akizungumzia hilo mjini Mwanza, Katibu Tawala wa PCSP,  Fredrick  Tingatinga,  alisema kukamilika kwa jengo hilo kutasaidia kupanua shughuli za kijamii na michezo, ukiwamo mpira wa miguu.

Tingatinga alisema hivi sasa jengo hilo lina uchakavu hali inayorudisha nyuma mipango ya kuinua vipaji na kuendeleza tamaduni za Watanzania.

Kwa upande wa Mwenyekiti wa PCSP, Juma Maiko, alivitaka vikundi vyote kujiunga na shirika hilo ili kuboresha suala la michezo hapa nchini.

Hata  hivyo ,wajumbe   walishauliwa kufanya    kazi bila mzaha ili kuboresha     suala      la  michezo.

Bodi ya Mikopo elimu ya juu na mipango kawakomboa wanafunzi

Na Kambi Mbwana, Dar es Salaam

JUHUDI za kukuza kiwango cha elimu kinachagizwa na vitu mbalimbali, bila kusahau taasisi zilizoundwa kwa ajili ya kufanya kazi kwa ushirikiano kwa maendeleo ya Taifa.

Juhudi hizo zinakwenda sanjari na será zenye tija, ukizingatia kuwa ndio mfumo bora kwa sekta hiyo nyeti. Hapa Tanzania, miongoni mwa será na mikakati kabambe ni pamoja na ile ya uchangiaji wa elimu ya juu. Sera hiyo imekuwa ikitekelezwa nchini kwa wanafunzi wa vyuo vya elimu ya juu tangu mwanzoni mwa miaka ya 1990.

Katika mazungumzo yaliyofanyika jijini Dar es Salaam, Mkurugenzi Msaidizi wa Habari, Elimu na Mawasiliano wa HESLB, Cosmas Mwaisobwa (pichani), anasema kuwa será hiyo imezidi kushika kasi, ingawa ilikuwapo tangu wakati wa ukoloni na baada ya uhuru hasa baada ya kuanzishwa kwa Azimio la Musoma mwaka 1974.

Anasema kuwa katika mfumo mpya ulioanza miaka ya 1990, mwanafunzi alitakiwa  kuchangia sehemu ya gharama za elimu tofauti na ilivyokuwa mwanzo ambapo alikuwa akipata bure elimu ya juu. Kabla ya kuanza kwa mfumo wa uchangiaji, serikali ilikuwa ikitoa kila kitu kwa wanafunzi waliopata fursa ya kujiunga na elimu ya juu.

“Hata hivyo, kuanzishwa kwa mfumo huo, kulitokana na mabadiliko ya kiuchumi na kijamii, hivyo kuwezesha kuanzishwa kwa mfumo wa  wananchi kuchangia gharama mbalimbali badala ya serikali kugharimia  kila kitu katika elimu, afya na huduma nyingine.

“Awamu ya kwanza ya kuanzishwa kwa mfumo huo mwaka 1992, wanafunzi walianza kugharamia nauli za kwenda na kurudi kutoka chuoni, ada za maombi ya kujiunga na vyuo, ada za kuandikishwa chuoni na fedha za  tahadhari,” alisema.

Aidha, wanafunzi walilipia ada za serikali za wanafunzi vyuoni. Awamu ya pili ya uchangiaji katika elimu ya juu ilitekelezwa kuanzia Julai, 1994.  Pamoja na gharama zilizohamishiwa kwa wanafunzi na wazazi katika awamu ya kwanza, wanafunzi waligharamia mahitaji ya chakula na malazi.

Hata hivyo, gharama hizo zilionekana kuwa kubwa na serikali kuanzisha utaratibu wa utoaji mikopo kwa wanafunzi kwa ajili ya gharama za chakula na malazi, huku utaratibu huo ukianzishwa rasmi awamu ya tatu chini ya Rais Benjamin William Mkapa, mwaka 2005. Ndio hapo ilipoanzishwa Bodi ya Mikopo ya Wanafunzi wa Elimu ya Juu (HESLB), ambayo ilianza shughuli zake rasmi shughuli zake Julai, 2005.   

Yanga yaufyata kukimbiwa na wachezaji wake

Na Kambi Mbwana, Dar es Salaam

UONGOZI wa klabu ya  Yanga, umesema hautasema lolote kwa sasa, licha ya kuandamwa na wimbi la wachezaji wake wanaodaiwa kukimbilia Azam FC.

Baada ya kusajiliwa kwa Didier Kavumbagu, Azam haikutosheka na kufanikiwa kuinasa saini ya Frank Domayo, hivyo kuongeza machungu kwa mashabiki wake.

Akizungumza jana jijini Dar es Salaam, Ofisa Habari wa Yanga, Baraka Kizuguto, alisema kwamba hawatafungua mdomo wao kuzungumzia sakata la kuondoka kwa wachezaji hao, badala yake wanaendelea na taratibu nyingine za kuijenga klabu hiyo yenye maskani yake mitaa ya twiga na jangwani.

Alisema suala la wachezaji kusajiliwa kwa klabu nyingine ni jambo la kaiwada, hivyo si lazima wakurupuke kutoa msimamo wao kwa kushinikizwa na watu.

“Hatuwezi kuzungumzia chochote kwa sasa wasababu ya kuondoka kwa wachezaji hao, maana Yanga ni klabu kubwa na yenye mipango endelevu.

“Tutazungumzia mambo yetu kwa utaratibu tuliojiwekea, ukizingatia kuwa kuna wachezaji wengi wazuri na vipenzi vya Yanga waliondoka nab ado timu ikaendelea kuwa imara,” alisema Kizuguto.

Kado: Viongozi Coastal kaeni mmalize tatizo

Na Kambi Mbwana, Dar es Salaam

KIPA wa timu ya Coastal Union ambaye kwa sasa mkataba wake umefikia ukingoni, Shaban Kado, amewataka viongozi wa klabu yake kukaa ili kumaliza tatizo la mgogoro liliojitokeza.

Akizungumza jana jijini Dar es Salaam, Kado alisema kuwa mgogoro huo unazungumzika ili kuisuka upya timu hiyo kwa ajili ya msimu mpya wa Ligi.

Alisema endapo uongozi utakaa chini kuangalia wapi wamekwama na kwanini kumeibuka mzozo utakaoifanya Coastal ipoteze mwelekeo.

“Nimeishi Tanga kwa mapenzi makubwa kwa timu ya Coastal Union, hivyo nadhani huu ni wakati wa kuzima mgogoro uliojitokeza kwakuwa hautakuwa na tija.

“Mzozo unazungumzika kwa maslahi ya klabu hii yenye kuungwa mkono na wadau wengi wa Tanga, jambo linalohitaji kuzimwa kwa mgogoro huu,” alisema.

Kwa mujibu wa Kado ambaye mkataba wake umekwisha, mgogoro huo ukiendelea inaweza kuleta tatizo kubwa katika mipango ya kimaendeleo ya klabu hiyo.

TFF yaingilia kati usajili wa Frank Domayo

Kutokana na tukio lililotokea jana (Aprili 30 mwaka huu) kwenye kambi ya timu ya Taifa (Taifa Stars) iliyopo Tukuyu mkoani Mbeya likihusisha usajili wa baadhi ya timu, Rais wa Shirikisho la Mpira wa Miguu Tanzania (TFF), Jamal Malinzi amemteua Wakili Wilson Ogunde kuchunguza mlolongo mzima wa tukio hilo.

Baada ya kukamilisha uchunguzi wake, Wakili Ogunde ataishauri TFF kuhusu hatua za kisheria na kikanuni za kuchukua.

TFF inatoa wito kwa wachezaji, klabu na wadau wa mpira wa miguu kufuata kanuni na taratibu katika utendaji wao.