Vibaka wamliza Ally Choki

Na Mwandishi Wetu, Dar es Salaam

AMA kweli kwenye msafara wa mamba kenge hawakosekani. Mkurugenzi wa bendi ya muziki wa dansi Extra Bongo Next Level 'Kamarade' 'wazee wa Kimbembe' Ally Choki alijikuta akimwaga machozi baada ya watu wanaodhaniwa kuwa vibaka kujipenyeza wakati wa uzinduzi wa albamu ya 'Mtenda Akitendewa' Februari 22 mwaka huu na kumuibia saa ya silva yenye thamani ya dola 300 sawa na sh.500,000. 

Ally Choki, pichani.

Extra Bongo ilizindua albamu hiyo ndani ya Ukumbi wa Dar Live Mbagala jijini Dar es Salaam na kuhudhuriwa na mamia ya mashabiki na wadau wa muziki wa dansi ambapo Choki aliingia ukumbini akiwa ndani ya gari la kubeba wagonjwa 'Ambulance' na kulakiwa juu kwa juu. 

Choki, alieleza, tukio la kuibiwa lilimkuta wakati akishuka kwenye ambulance ambapo ndani ya kundi la mashabiki waliompokea kulikuwepo na vibaka waliofanikwa kumvua saa hiyo pasipo yeye kujitambua. "Kwa kweli saa yangu inaniuma sana nililetewa zawadi na rafiki yangu kutoka Qatar lakini ndo hivyo vibaka wameniingiza mjini alisema Choki kwa masikitiko na kuongeza. 

"Wakati nimepanda jukwaani ndiyo nikashtukia nimelambwa saa, bahati nzuri simu na vitu vyangu vingine vya thamani nilikuwa nimeviacha kwa mlinzi wangu vinginevyo hali maumivu yangekuwa makali zaidi ya hivi. 

Recho aahidi makamuzi makubwa kisanaa

Na Kambi Mbwana, Dar es Salaam

MWIMBAJI wa muziki wa kizazi kipya, Winfirda Josephat (Recho), mwishoni mwa wiki alifurahia siku yake ya kuzaliwa, huku akiahidi kufanya kazi nzuri zaidi kwa ajili ya kuonyesha makali yao kisanaa.

Recho akiwa na Linah

Sherehe hiyo ya kuzaliwa kwa mwanadada huyo ilifanyika katika Ukumbi wa Business Park, Kijitonyama na kuhudhuriwa na watu mbalimbali, wakiwamo wasanii wenzake.

Akizungumza jijini Dar Dar es Salaam, Recho alisema kuwa anamshukuru Mungu kwa kumpa kipaji kiasi cha kukitumikia kwa mafanikio.

“Haya ni mambo mazuri kwangu kwa kuonyesha kuwa sauti yangu inavuma ndani na nje ya nchi kwa kukitumikia vyema kipaji change.

“Nitaendelea kufanya kazi nzuri ili niwape raha mashabiki wangu, hivyo wakati huu ninaposherehekea siku ya kutimiza miaka kadhaa tangu kuzaliwa kwangu, sina cha kuahidi isipokuwa kazi nzuri,” alisema.

Recho ni miongoni mwa wasanii mahiri wanaotokea katika taasisi ya kukuza na kulea vipaji Tanzania House of Talents (THT), ikiwa chini ya Ruge Mutahaba.

Kaijage: Zambia ni mwisho wa maandalizi yetu

Na Kambi Mbwana, Dar es Salaam

KOCHA Mkuu wa timu ya Taifa ya wanawake, Twiga Stars, Rogasian Kaijage, amesema kwamba wapinzani wao Zambia, walijiandaa zaidi kuliko wao, hivyo wametolewa kwa haki.

Katika mechi ya juzi iliyopigwa katika Uwanja wa Azam Complex, Twiga Stars, ilitoka sare ya bao 1-1 dhidi ya Zambia ‘Shipolopolo,’ hivyo kutolewa kwa bao 3-2 kufuatia matokeo ya mechi ya kwanza iliyochezwa nchini Zambia baada ya kupigwa bao 2-1.

Akizungumza jana jijini Dar es Salaam, Kaijage alisema kuwa maandalizi yao hayakuwa mazuri tofauti na wenzao, hivyo ujuzi wao ulishindwa kufanya vyema dhidi ya wapinzani wao.

Alisema ingawa walipania kuwatoa wapinzani wao, lakini kiwango chao na maandalizi yao hayakuwa mazuri kiasi cha kuwaaminisha kusonga mbele.

“Tumekuwa na matamanio ya kusonga mbele katika michuano ya Kimataifa, ila lazima tufahamu namna ya kuandaa wachezaji wetu.

“Tumevuna kile tulichokipanda dhidi ya timu ya Zambia, ambapo wametufunga bao 3-2, hivyo sisi kutoka katika michuano ya kuwania kufuzu Kombe la Mataifa ya Wanawake Afrika (AWC),” alisema.

Licha ya kuwa na wachezaji kadhaa wenye kutajwa kama hodari wa kucheza soka, timu ya Twiga Stars, imeondoshwa katika michuano hiyo, hivyo kushindwa kuwapa raha Watanzania.

Maandalizi ya mbio za Kilimanjaro Marathon leo mkoani Kilimanjaro

Zoezi la uandikashaji ukiendelea katika Hoteli ya Kiss, jioni ya jana

Watu waendelea kujitokeza kujiandikisha katika Hoteli ya Kiss

Uandiskishaji unaendelea

Yanga yaitungua Al Ahly Uwanja wa Taifa jijini Dar es Salaam leo

MABINGWA wa Tanzania Bara, Yanga SC, leo wameanza vizuri kwa ushindi wa bao 1-0 dhidi ya timu ya Al Ahly ya Misri, mechi iliyopigwa katika Uwanja wa Taifa, jijini Dar es Salaam na kuhudhuriwa na mashabiki lukuki wa kandanda.

Bao pekee la ushindi lilifungwa dakika ya 82 na Nadir Haroub Cannavaro aliyetumia mbinu nzuri za kukwamisha mpira kimiani na kuwapa raha mashabiki wao. Kwa kushinda bao pekee uwanjani katika mechi ya leo, Yanga inatakiwa kuzuia sare au kushinda tena katika mechi itakayopigwa wiki mbili zijazo nchini Misri.

Hata hivyo mchezo huo wa marudiano utakuwa mgumu kutokana na histoa za timu za Misri zinavyoweza kusaka ushindi kwa hali yoyote ile. 

Yanga yapata bao safi dakika ya 37 kipindi cha pili kwa Cannavaro dhidi ya Al Ahly

Yanga inafanikiwa kupata bao dakika ya 37 kipindi cha pili kwa kupitia mchezaji wake Nadir Haroub ‘Cannavaro’, aliyewainua mashabiki wa timu yake, dhidi ya Al Ahly ya Misri.

Mpira ni mgumu na unaonyesha upinzani wa hali ya juu, huku nyota wa Yanga, Emmanuel Okwi, akihaha uwanjani kusaka bao.

Kaseba: Mashali hana uwezo wa kupambana na mimi

Na Kambi Mbwana, Dar es Salaam

BONDIA wa ngumi za kulipwa hapa nchini, Japhet Kaseba, amesema kwamba mpinzani wake Thomas Mashali hana uwezo wa kupambana nay eye Machi 29, pambano litakalopigwa katika Ukumbi wa PTA Sabasaba.

Japhet Kaseba, pichani

Akizungumza jijini Dar es Salaam jana, Kaseba alisema kuwa amekuwa na uchu wa kutoa kichapo kupita kiasi, hivyo haamini kama anaweza kupigwa na bondia mwingine yoyote.

Alisema kuwa kikubwa kinachompa imani ya kumchakaza Mashali ni umahiri wake wa kurusha masumbwi, jambo linalomfanya ajione yupo juu kimasumbwi.

“Najiandaa vizuri kuhakikisha kuwa umahiri wangu haufutwi na bondia mwingine yoyote, akiwamo Mashali ambaye nakutana naye nikiwa na hasira kupita kiasi.

“Naamini hawezi kuninyamazisha kwakuwa nimejipanga na hakuna jingine zaidi ya kujiandaa vyema ili nijiweke katika mazingira mazuri,” alisema.

Kaseba ni miongoni mwa mabondia wenye makali ya kutisha katika tasnia ya masumbwi nchini, huku pia akiwahi kuwa Bingwa wa Dunia wa ngumi na mateke.

Coastal Union yaipinda Ashant United

Na Kambi Mbwana, Dar es Salaam

BAADA ya kuwanyamazisha vijana wa Mbeya City, katika Uwanja wao wa nyumbani Mkwakwani mjini Tanga, timu ya Coastal Union sasa inaiwinda timu ya Ashanti United, mchezo utakaofanyika Machi 8 mwaka huu.

Mechi hiyo inayosubiriwa kwa hamu na mashabiki wa soka, itafanyika katika Uwanja wa Mkwakwani, ambapo Coastal wameipania vilivyo mechi hiyo ili kujiweka katika nafasi nzuri zaidi.

Akizungumza jana jijini Dar es Salaam, Msemaji wa Coastal, Hafidh Kido, alisema kuwa wanajiandaa vizuri kwa ajili ya kuwafunga Ashanti United, nyumbani kwao.

Alisema mechi ya Ashanti ni muhimu kwao, huku wakiamini kuwa wachezaji wao hawatafanya makosa katika kuwapa raha uwanjani.

“Tunaamini kuwa mechi itakuwa ngumu kwasababu ligi ipo katika ushindani, ila hakuna cha kupoteza, ukizingatia kuwa tuna dhamira ya kufanya vizuri katika mechi zilizosalia.

“Tunaomba wadau na mashabiki wetu waendelee kutuunga mkono kwasababu vijana wapo vizuri na hakuna cha kupoteza, dhidi ya Ashanti,” alisema.

Katika mechi iliyowakutanisha na Mbeya City, Coastal walishinda bao 2-0 na kuwashangaza wengi, hasa kwa kuangalia kiwango cha Mbeya City.

Mwambao Bonanza hapatoshi Mikocheni Jumapili

Na Henry Paul, Dar es Salaam

Mwambao Soccer Bonanza ambalo hufanyika kila baada ya miezi miwili litafanyika Jumapili katika Uwanja wa Mikocheni A. Shuleni kuanzia saa mbili asubuhi na linategemewa kumalizika saa kumi na mbili jioni.

Akizungumza Mwenyekiti wa Bonanza hilo, Lusozi Faza, alisema kuwa Bonanza hilo kama ilivyo kawaida litashirikisha timu saba ambazo ni Boko National Veteran, Wazee wa Kazi Veteran, Bagamoyo Veteran, Kunduchi Beach Veteran, Mwenge Benz Veteran, Mbezi Beach Veteran na wenyeji Mikocheni Veteran.

Mwenyekiti Faza alizungumzia Bonanza hilo na kusema kuwa ni mwisho katika mzunguko wa pili baada ya kuanzishwa  katika  mzunguko wa kwanza Mei 13, 2012.

Bonanza hilo ambalo linahusisha timu hizo za Ukanda wa Mwambao limekuwa kivutio kikubwa kwa wakazi wa maeneo hayo huku likitoa burudani tosha na kuwakumbusha wapenzi wa soka baadhi ya wachezaji mahiri waliotamba enzi hizo ambao hivi sasa wamesahulika.

Wachezaji hao ni kama vile Said Mrisho ‘Zicco wa Kilosa’, Issack Mwakatika waliochezea klabu ya Yanga na Athanas Michael aliyetamba akiwa na timu za Malindi, Pilsner, RTC Kagera, Tanzania Stars, Lusozi Father aliyechezea Pan African, Toto African ya Mwanza, Athumani Jumapili ‘Chama’ aliyechezea klabu ya Simba na wengine wengi.

Akimalizia Mwenyekiti Lusozi aliwataka wapenzi wote wa soka wa kuanzia Mikocheni, Mwenge, Mbezi Beach, Tegeta, Boko, Bunju na Bagamoyo kuhudhuria kwa wingi na kuja kuona Bonanza hilo ambalo linakutanisha wachezaji mahiri wa zamani waliotamba wakiwa na timu za ligi daraja la kwanza Tanzania Bara (sasa ligi kuu).