Manji arudisha fomu TFF, Poulsen aenda Afrika Kusini

Yusuf Manji, Mwenyekiti wa Yanga

 

Na Kambi Mbwana, Dar es Salaam

MFANYABIASHARA maarufu hapa nchini, Yusuf Manji, ambaye pia ni Mwenyekiti wa klabu ya Yanga, amerudisha fomu leo za kuwania nafasi ya Mwenyekiti wa Bodi ya Ligi Kuu (TPL Board), huku nafasi hiyo ikiombwa na watu watatu na uchaguzi huo uliopangwa kufanyika Februari 22 mwaka huu.

Kama kawaida, Manji alirudisha fomu akiongozana na mmiliki wa klabu ya African Lyon, Rahim Zamunda, wakati waliochukua fomu leo kwa nafasi hiyo ni Hamad Yahya, huku Christopher Peter wa Moro United na Kazimoto Miraji Muzo wa Pamba ya Mwanza, wao wakiomba ujumbe wa Bodi kuwakilisha klabu za Ligi Daraja la Kwanza.

Orodha kamili ya waombaji uongozi wa Bodi ya Ligi Kuu ni Hamad Yahya wa Kagera Sugar na Yusuf Manji wa Yanga wanaoomba uenyekiti wakati Makamu Mwenyekiti aliyeomba ni Said Mohamed wa Azam.

Kwa upande wa wajumbe wawili kuwakilisha klabu za Daraja la Kwanza ni Christopher Peter Lunkombe wa Moro United ya Dar es Salaam na Kazimoto Miraji Muzo wa Pamba ya Mwanza.

Katika hatua nyingine, Kocha Mkuu wa Taifa Stars, Kim Poulsen ameondoka leo mchana (Januari 18 mwaka huu) kwa ndege ya South African Airways kwenda Afrika Kusini kuzifuatilia timu za Ivory Coast na Morocco zinazoshiriki Fainali za 29 za Mataifa ya Afrika (AFCON) zinazoanza kesho (Januari 19 mwaka huu) nchini humo.